Husyas 3 - Hanunuu

Si Husyas ag Kay Asawa

¹ Magkun ti Panginuun sa kangku, “Paglakaw yi, pakakitan maan kanmu pagmahal sa kanmu asawa una waya nanguragin siya. Mahala siya parihu sa kang pagmahal sa nasakupan Israil una ngani nagsamba sida sa tuhay pag manga diyus sa panab-anan pagsagda manga pinauga ubas.”

² Nakan linukat niku siya sa halaga 15 ka bilug pilak ag upat ka saku sibada.

³ Ag sinabihan niku siya, “Pagpaminsan kawu sa kangku kadugay. Danga gid kawu mag-ulid sa iba ka lalaki. Una aku hanggan balaw dap mangulid sa kanmu.”

⁴ Dahil kay ibug sabihun, maduraan hari hanggan takinan ti nasakupan Israil sa kadugayun pag panahun. Maduraan diman manga handug hanggan aramirawan pag batu, katunda diman ti ipud garamitun sa panhula hanggan ti manga diyus-diyusan.

⁵ Dapat sa uryan pag manga sirang, mandangup di maan sida sa Panginuun nida Diyus hanggan sa kanda hari linahi ni Dabid. Pumakarani sida sa Panginuun may paggalang dahil sa kay kaayadan.