Husyas 14 - Hanunuu

Ti Panikluhud ni Husyas sa manga Taga Israil

¹ Magkun si Husyas, “Manga taga Israil, pagbalik kamu sa Panginuun niyu Diyus; nidamhak kamu dahil sa kanyu manga kasalanan.

² Pagbalik kamu sa Panginuun ag pagsabi sa kanya kuntay, ‘Panginuun, patawada duy kami sa tanan nimi manga kasalanan, tanggapa kami angay sa kanmu kaayadan hampay makahandug kami manga pagdayaw sa kanmu.

³ Balaw yi kami manhagad awat sa Asirya, balaw yi kami manarig sa manga kabayu pan-gira. Balaw yi nimi tawagun Diyus kanmi binwat manga diyus-diyusan. Dahil pagkaawaan nimu kami parihu sa manga ilu.’ ”

⁴ Magkun ti Panginuun, “Paayadun niku kang nasakupan sa kanda pagkamalinabagun, ag buluntad sa kang tagipusuun mahalun niku sida. Dahil nadura yi kang galit sa kanda.

⁵ Papaladan niku ti manga taga Israil; bumaliw parihu aku sa tun-ug magpakaun danum sa manga tanum. Lumangba sida parihu sa tanum liryu magbusang. Rumig-un sida parihu sa kayu sidru sa Libanun kay manga gamut arabasad.

⁶ Yumamu sida parihu sa manga sanga magsalingsing. Bumaliw bantug sida parihu sa marinu pag kayu ulibu hanggan sa mabanglu pag kayu sidru sa Libanun.

⁷ Bag-u mangulian maan sida sa kanda daga sa sirung niku pangalaga. Umabunda sida parihu sa uhay maglangba ngatay sa manga ubas magbusang. Bumaliw bantug sida parihu sa intus Libanun.

⁸ “Manga taga Israil, danga yi kamu magdangup sa manga diyus-diyusan. Aku ti sumagut kanyu manga darangin hanggan ti mangalaga sa kanyu. Alagaan niku kamu; parihu aku sa malangba pag kayu sipris, magpakaun hamuy. Aku ti magpadaka sa kanyu.”

Ti Uryan pag Paanyu

⁹ Mana masalman ag maintindihan may pan-intindi ti manga nakasurat sitay. Kang-ud gid ti palakaw Panginuun ag pagsundun inda manga matadlung, dapat nagbaliw karadayaanan sa manga malinabagun.