Husyas 13 - Hanunuu

¹ “Kaybi sa kabag-u, nu magbagaw yi ti lahi ni Ipraim pagtakigan sa kadalaan ti iba ka linahi Israil, ag paggalangun nida siya. Dapat nagkasala kay manga nasakupan dahil sa kanda pagsamba sa kan Baal. Nakan ngani nagkaramatay sida.

² Taynguna tugka, kamu pag manga taga Ipraim parargu magbuwat kadautan. Dahil magbuwat kamu manga histuda manga diyus-diyusan ginan sa kanyu manga pilak hampay kanyu sambahun. Dapat inda tanan buwat lang waydi tawu ag angay lang sa kanyu naisipan. Magkun waya kamu manhandug tawu sa inda pag manga diyus-diyusan baka ag mangaruk sa kanda.

³ Nakan madura kamu parihu sa anitay ngatay sa tun-ug sa surip, ngatay parihu sa upa sa giukan pag-ipayag durus ngatay anus magluwang sa kay ahusan.

⁴ “Aku ti Panginuun niyu Diyus ti nagpalwas sa kanyu sa Ihiptu. Unman yi kamu may iba kilalan-un Diyus ag Manugribri nu unman aku lang.

⁵ Inalagaan niku kamu sa pangawakawaan, sa tigangan pag rugar.

⁶ Dapat pagka pinapaladan niku kamu ag pinaabunda, nagmarapadayaw kamu ag kinalimtan yi niyu aku.

^7-8 Nakan girahun niku kamu ag rurisun parihu sa pagduksul maisug pag hayup sa kay mablay, parihu sa pagbuwatun liyun ngatay usu inagawan manga anak. Tanudan niku kamu sa dalan ag girahun parihu sa hayup liyupardu.

⁹ Rurisun niku kamu pag manga taga Israil, dahil pagkalabanun niyu aku kanyu manug-awat.

^10-11 Taynguna naan kanyu hari hanggan manga takinan sa kanyu banwa ti manribri sa kanyu? Naan yi ti hari hanggan ti manga takinan niyu hinagad sa kangku? Dahil sa kang pangagalit ipinakaun niku inda sa kanyu, ag dahil diman sa kang pangagalit bin-ul niku sida.

¹² Kanyu manga kasalanan balaw gid niku malimtan, parihu inda sa kasuratan sinaput ag itinagu.

¹³ “May panahun kamu magbag-u buhi dapat dahil unman kamu may intindi, pag-ipasipala niyu inda. Parihu kamu sa lapsag balaw magkaibug lumwas sa tiyan sa kay kaudasan.

¹⁴ Iribri aw niku kamu sa kamatayan? Unman! Sumabi waya ngani aku, ‘Kamatayan, naan yi kanmu manga sarut? Naan yi kanmu kaparusahan para sa inda pag manga tawu?’ “Balaw gid niku kamu kaawaan.

¹⁵ Una waya abunda kamu kaysa kanyu manga katawuhan, rurisun niku kamu. Ipadara niku ti mainit pag durus ginan sa pangawakawaan sa butlakan bag-u magkarak-at kanyu manga bulbugan hanggan manga bubun. Ag agawun kanyu mahalaga pag manga kasiyunan.

¹⁶ Kailangan parusahan ti manga taga Samarya dahil sa kanda paglaban sa kangku, kanda Diyus. Magkaramatay sida sa labanan. Runutun kanda manga anak dariit, ag kanda manga kababayihan magbuduy ririan kay tiyan.”