Husyas 12 - Hanunuu

¹ “Ti manga taga Israil magsarig sa manga bagay unman may pulus. Ti paglagsun nida sa buu sirang imaw ti manga bagay makapadamhak sa kanda. Mag-amat kanda pamudil hanggan pamuya. Magbuwat sida kasunduan sa Asirya hanggan sa Ihiptu, nakan ngani magdara sida lana ulibu sa Ihiptu bilang pamakaun.”

² Magkun si Husyas, “May pariga ti Panginuun laban sa manga taga Huda pag linahi ni Hakub. Parusahan niya sida angay sa kanda manga ugali; balusan niya sida angay sa kanda manga buwat.

³ Katpung ati di waya kanda ginurang si Hakub sa tiyan niya ina, gustu yi niya lamangan kay siing. Pagka nagdaka yi siya, nandumug siya sa Diyus

⁴ sa panab-anan usa ka anghil, ag nanalu siya. Maglumi siya habang maghagad papalad sa anghil. Nakitan niya ti Diyus sa Bitil, bag-u ati naghampang sa kanya ti Diyus.

⁵ Siya ti Panginuun Diyus Makamaskihan; Panginuun kay bantug pag ngaran.

⁶ “Nakan kamu pag manga linahi ni Hakub, pagbalik yi sa kanyu Diyus, ag ipakakit niyu ti pagmahal hanggan ti katadlungan. Bag-u parargu kamu sumarig sa kanyu Diyus.”

Dugang pag Pariga Diyus Laban sa Israil

⁷ Magkun ti Panginuun, “Maradaya kanyu manga manugnigusyu; maggamit sida balaw insaktu pag kiluhan.

⁸ Magpadayaw waya kamu pag manga taga Israil magkun, ‘Nakatipun kami kayamanan, mayaman yi kami. Unman may makasungyaw sa kanmi kuntay nakatipun kami kayamanan sa daut pag paraan, dahil kasalanan inda pag buruwatun.’

⁹ Nakan aku, ti Panginuun niyu Diyus ti nagpalwas sa kanyu sa Ihiptu, pauliun maan niku kamu sa manga payag, parihu sa pagbuwatun niyu sa udas Pista Pagpatindug manga Payag.

¹⁰ “Naghampang aku sa manga purupita ag pinakan-an niku sida mayamu pag manga pangakakitun. Sa panab-anan nida, pinasandaman niku kamu midamhak.

¹¹ Dapat parargu diman gid ti manga taga Gilyad sa kanda manga buruwatun daut unman gid may pulus, bag-u ti nasakupan Gilgal maghandug manga tudu baka sa manga diyus-diyusan. Pihu gid dautun kanda manga harandugan ag bumaliw inda parihu sa manga tinumpuk batu bin-ul sa inaradu pag daga.

¹² “Naglayas si Hakub atabug sa Aram, nagsirbi siya ati bilang manug-alaga manga hayup para mapasa-kanya kay arasawan-un.

¹³ Sa panab-anan ni purupita Muysis, ipinalwas niku kamu pag manga Israilita sa Ihiptu ag inalagaan.

¹⁴ Dapat ginalit gid niyu aku kanyu Panginuun dahil sa kanyu pagmatay, nakan parusahan niku kamu. Balusan niku kamu sa kanyu paglabag sa kangku.”