Husyas 11 - Hanunuu

Ti Pagmahal Diyus sa Israil

¹ Magkun ti Panginuun, “Katpung anak waya ti Israil, pagmahalun niku siya. Tinawag niku siya ginan sa Ihiptu bilang kang anak.

² Dapat taynguna, una sigi kang tawag sa kanda pag manga taga Israil, lalu di gid sida magpakarayu sa kangku. Magsagda sida ag magtuub manga kamangyan sa manga diyus-diyusan Baal.

³ Aku ti nag-alaga sa kanda. Inabat niku sida ag tinudluan maglakaw, dapat unman nida kinilala aku ti nag-alaga sa kanda.

⁴ Giniyahan niku sida may pagmahal. Ga bin-ul niku kanda singkaw sa liug ag yinmuk-ub aku hampay pakaunun sida.

⁵ Dapat dahil balaw nida gustu bumalik sa kangku, pihu bumalik sida sa Ihiptu, ag pangunahan sida Asirya.

⁶ Girahun manga kalaban kanda manga banwa ag dautun ti talakup manga sabian. Dautun diman manga kalaban kanda manga gayak.

⁷ Sida kang nasakupan nagpasya yi pumakarayu sa kangku. Nakan una waya manawag sida tanan sa kangku, balaw niku awatan.

⁸ “Manga taga Israil, balaw mahimu dayuun niku kamu ngatay pabay-anan. Balaw mahimu ipadamhak niku kamu lubus parihu sa binwat niku sa manga banwa Adma ag Sibuyim. Balaw maagwanta tagipusuun niku buwatun inda sa kanyu. Magkaawa gid aku sa kanyu.

⁹ Balaw yi ipalakaw niku kang masyadu pag pangagalit; balaw yi dautun niku ti Israil, dahil Diyus aku balaw tawu. Aku ti Banal pag Diyus kanyu kaibahan, balaw aku umasan sa kanyu may galit.

¹⁰ “Sumunud kamu sa kangku sa udas man-ngurub aku, ti Panginuun, ga liyun. Pihu gid man-ngurub aku, ag mandaldali kamu muli ginan sa isalpan.

¹¹ Rumas-ug kamu madali parihu sa manga manuk maglayang sa tungud ginan sa Ihiptu ngatay parihu sa manga kalampati ginan sa Asirya. Pauliun maan niku kamu sa kanyu manga balay. Aku, ti Panginuun, ti magsabi inda.”

Parusahan ti Israil ag ti Huda

¹² Magkun waya ti Panginuun, “Pirmi aku pagpudilan ag paglukuhun manga taga Israil. Ti manga taga Huda parargu magpakarayu sa kangku, ti Banal pag Diyus ag matinupadun.”