Husyas 10 - Hanunuu

¹ “Ti manga taga Israil parihu sa tanum ubas malangba ag mayamu kay burak. Mintaras mag-abunda sida magyamu diman kanda pag-ipatindug manga harandugan, ag pagparinuun nida ti aramirawan pag manga batu kanda pagsambahun.

² Manga madaya sida, nakan taynguna kailangan yi mangagwanta sida dahil sa kanda manga kasalanan. Dautun Panginuun kanda manga harandugan hanggan aramirawan pag manga batu.

³ Pihu aban sumabi sida, ‘Unman kami may hari dahil unman kami naggalang sa Panginuun. Dapat una may hari kami, unman diman siya may mabuwat mayad para sa kanmi.’

⁴ Sigi lang sida sa bagaw dapat unman diman sa buwat. Magsumpa sida pudil ag magbuwat kasunduan unman diman pagtupadun. Nakan ngani ti katadlungan nagbaliw ga ilamnun makahilu magtubu sa inaradu pag daga.

⁵ “Madala ti manga nasakupan Samarya dahil madura ti manga diyus-diyusan dumaraga baka sa Bit Abin. Sida hanggan kanda manga manughandug magbaya sa marinu nida pag manga diyus-diyusan manrukuan gid dahil bul-un tunda sa kanda

⁶ bag-u darahun sa Asirya bilang pamakaun sa makapangyarihan pag hari. Mangay-a ti Israil sa kanda magsarig sa manga diyus-diyusan.

⁷ Madura kay manga hari ga sanga kayu inanud danum.

⁸ Pandautun ti manga simbahan sa abwat pag manga rugar Abin, imaw ti pinun-an kasalanan manga taga Israil. Umarabwat ti dugihan pag manga ilamnun ag matabunan kanda manga harandugan. Bag-u sumabi sida sa manga bantud, ‘Tabuni kami!’ Ag sa manga tagudtud, ‘Rup-agi kami!’ ”

Sinintinsiyahan Diyus ti Israil

⁹ Magkun ti Panginuun, “Kamu pag nasakupan Israil parargu magbuwat kasalanan ginan di waya sa nagbuwat kasalanan kanyu manga ginurang sa Gibiya. Unman gid kamu magbag-u. Nakan kamu manga linahi daut girahun sa Gibiya.

¹⁰ Parusahan niku kamu angay sa kang kagustuhan. Magkaraminsan ti manga nasyun laban sa kanyu dahil parargu kamu magbuwat kadautan.

¹¹ Kaybi masalibagunan lang kamu; parihu kamu sa dumaraga baka naantigu maggiuk ag tunda kay pagkaibgan pag tarabahu. Dapat taynguna pakurianan niku kamu pag manga taga Israil hanggan taga Huda; bumaliw kamu ga dumaraga baka takudan singkaw ti marinu pag liug niya ag pakurianan sa mag-aradu.

¹² Sinabi niku sa kanyu, ‘Palug-uda kanyu tagipusuun parihu sa daga inaradu. Pagtanum kamu katadlungan ag pag-ani pagmahal. Dahil udas yi inda hampay dumangup kamu sa kangku tugka sa kang pagras-ug, bag-u padarahan niku kamu karibrihan parihu sa uran.’

¹³ “Dapat nagtanum kamu kadautan, nakan umani diman kamu kadautan. Nagpudil kamu, ag tunda ti burak niyu kadautan. Dahil sa magsarig kamu sa kanyu sadili kabisugan, parihu sa kanyu mayamu sundalu,

¹⁴ rumas-ug sa kanyu manga nasakupan ti girahan ag magkaradaut kanyu manga banwa may alad batu. Buwatun niyu manga kalaban ti binwat ni Salman sa banwa Bit Arbil — rinunut niya ti manga ina hanggan kanda manga anak.

¹⁵ Katunda diman ti mangyari sa kanyu manga taga Bitil dahil masyadu kanyu kadautan. Sa paghanag-hanag sa surip, pihu gid mamatay ti hari Israil.”