Husyas 1 - Hanunuu

¹ Inda ti bagaw ibinarita Panginuun sa kan Husyas kay anak ni Biri katpung panahun hari sa Huda si Usyas, si Hutam, si Akas ag si Isikyas, hanggan katpung panahun hari sa Israil si Hirubuam kay anak ni Huas.

Kay Asawa ag manga Anak ni Husyas

² Inda ti ka bag-u sinabi Panginuun sa kan Husyas: “Pag-asawa kawu babayi magpanguragin, ag kanyu manga anak kilalan-un anak babayi uragin. Dahil inda ti mustara magpanguragin niku nasakupan sa panab-anan nida pagpatlikud sa Panginuun hanggan pagsamba sa manga diyus-diyusan.”

³ Nakan inasawa ni Husyas si Gumir anak ni Diblaim. Bag-u namuduy si Gumir, nanganak usa ka lalaki,

⁴ magkun ti Panginuun sa kan Husyas, “Ingarni ti anak Hisriil, dahil udyi dumugay parusahan niku ti hari Israil dahil sa manga binwat pagmatay niya ginurang si Hihu sa banwa Hisriil. Duraun niku ti kaharian Israil.

⁵ Sa tunda pag sirang, ipatalu niku ti manga sundalu Israil sa Karatagan Hisriil.”

⁶ Namuduy maan si Gumir ag nanganak babayi. Magkun ti Panginuun sa kan Husyas, “Ingarni ti anak Lu Ruhama, dahil balaw niku kaawaan ngatay patawadun ti nasakupan Israil.

⁷ Dapat kaawaan niku ti nasakupan Huda. Aku, ti Panginuun nida Diyus, ti rumibri sa kanda sa panab-anan niku kamaskihan, balaw sa panab-anan labanan: pamana, baladaw, manga kabayu ngatay manga manugkabayu.”

⁸ Pagka mag-iblag yi sa susu si Lu Ruhama, namuduy maan si Gumir ag nanganak lalaki.

⁹ Magkun ti Panginuun sa kan Husyas, “Ingarni ti anak Lu Ami, dahil ti nasakupan Israil balaw niku nasakupan ag aku balaw kanda Diyus.

¹⁰ Dapat rumas-ug ti sirang kaawaan niku sida ag papaladan; bumaliw sida ga baras sa baybay dagat kay kayamu unman matakal ngatay mabilang. Taynguna pag-ingarnan sida, ‘Balaw kang nasakupan,’ dapat aban ingarnan sida, ‘Manga anak buhi pag Diyus.’

¹¹ Manmirinsanan maan ti manga nasakupan Huda hanggan Israil, bag-u manpili sida usa ka takinan. Manyamu maan sida sa kanda daga. Magmasulung maan sida sa tunda pag sirang para sa banwa Hisriil.