Huswi 9 - Hanunuu

Dinaya manga Taga Gibyun ti manga Israilita

¹ Taynguna, nasaydan tanan hari sa isalpan Hurdan ti pagpanalu manga Israilita. (Inda imaw ti manga hari manga Hitiyu, Amuriyu, Kananiyu, Pirisiyu, Hibiyu, ag manga Hibusiyu.) Mag-uli sida sa manga kabantudan, sa manga tagudtud sa isalpan, ag sa baybay Dagat Miditiranyu tugka sa Libanun.

² Nagminsan sida tanan hampay lumaban sa kan Huswi ag sa Israil.

³ Dapat pagka nadnugan manga taga Gibyun ti binwat ni Huswi sa Hiriku hanggan sa Hay,

⁴ nanhanap sida paraan hampay dayaun si Huswi. Nanpadara sida manga tawu sa kan Huswi, kanda manga asnu may manga karga manga daan saku, gitas ag linupnan pag manga paknul sukadan intus.

⁵ Nansulung sida manga daan rutay ag linupnan pag manga lapak, namalun sida maganit ag may kalmu pag manga tinapay.

⁶ Bag-u nag-ati sida sa kan Huswi sa kampu Israil sa Gilgal ag magkun sa kanya hanggan sa manga Israilita, “Nagsitay kami ginan sa arayu pag rugar hampay hagadun sa kanyu pagbuwat kamu kasunduan sa kanmi kuntay balaw niyu unhun kanmi nasakupan.”

⁷ Dapat nagsagut ti manga Israilita, “Barang taga sitay lang kamu sa kanmi arani. Nakan balaw kami mahimu mamwat kasunduan sa kanyu.”

⁸ Namaawa-awa sida sa kan Huswi, “Alistu duy kami sumirbi sa kanyu.” Nagpaingana sa kanda si Huswi, “Si unu kamu ag taga naan ginan kamu?”

⁹ Nagsagut sida, “Ginan kami sa arayu gid pag rugar. Nagsitay kami dahil nadnugan nimi ti tungkul sa Panginuun niyu Diyus. Nadnugan nimi ti tanan niya binwat sa Ihiptu,

¹⁰ hanggan sa duwa ka hari Amuriyu sa butlakan Hurdan. Inda pag manga hari imaw sida ni Hari Sihun sa Hisbun, ag si Hari Ug sa Basan ati pag mag-uli sa Astarut.

¹¹ Nakan sinugu kami nimi manga takinan ag manga kasimanwa pag-alistu manga balun karan-unun bag-u pag-atay sa kanyu hampay sabihun sa kanyu alistu kami sumirbi sa kanyu, basta pagbuwat lang kamu kasunduan sa kanmi kuntay balaw niyu kami unhun.

¹² Bantayi niyu kanmi balun tinapay, mainit waya inda kanmi magginan, dapat kainda maganit yi ag pagkalmuhun yi.

¹³ Inda pag manga sukadan paknul bag-u waya kanmi nagsukad intus, dapat malu bantayi, gitas yi. Kanmi manga rutay hanggan manga lapak nadaan yi dahil sa arayu gid pag linakaw.”

¹⁴ Sinamitan manga Israilita kanda manga karan-unun. Dapat unman sida nagpaingana sa Panginuun tungkul siyun.

¹⁵ Namwat si Huswi kasunduan sa kanda kuntay balaw nida sida unhun ngatay matyun. Ag nanumpa ti manga takinan manga nasakupan Israil sa tunda pag kasunduan.

¹⁶ Pagkalawuy tulu ka sirang ginan sa kanda nagbuwat kasunduan, nabaritaan manga Israilita arani lang maaw sa kanda pag-ulian tunda pag manga tawu.

¹⁷ Nakan naglakaw ti manga Israilita, bag-u pagka nakalawuy ti tulu ka sirang nakaaput sida sa manga banwa pag-ulian tunda pag manga tawu. Inda pag manga banwa Gibyun, Kipira, Biirut ag Kiryat Harim.

¹⁸ Dapat unman nansalakay ti manga Israilita sa kanda dahil ti manga takinan may sinumpaan yi kasunduan sa kanda sa ngaran Panginuun, ti Diyus Israil. Nanriklamu ti tanan kadamlan sa kanda manga takinan,

¹⁹ dapat sinmagut ti tanan takinan, “May taratu yi kita sa kanda sa ngaran Panginuun, ti Diyus Israil, nakan taynguna balaw nita sida unhun.

²⁰ Kaindaay yi lang kanta buwatun: Balaw nita sida matyun dahil barang parusahan waya kita Diyus dahil sa kanta taratu sa kanda.

²¹ Pabay-ani niyu sida mabuhi. Dapat buwatun nita sida manughanap kayu ag manugtaas danum para sa tanan kadamlan.” Katunda ngani ti nangyari sa manga taga Gibyun angay sa sinabi manga takinan tungkul sa kanda.

²² Ipinatawag ni Huswi ti manga taga Gibyun ag sinabihan, “Hayga dinaya niyu kami? Hayga nagsabi kamu ginan waya kamu sa arayu pag rugar, taga sitay lang waydi maaw kamu sa kanmi arani?

²³ Dahil sa kanyu binwat saadan kamu Diyus: Kainda ginan, manirbi kamu bilang manughanap kayu ag manugtaas danum para sa balay niku Diyus.”

²⁴ Magkun sida sa kan Huswi, “Binwat nimi inda dahil magkadala kami barang matyun niyu kami. Dahil nabaritaan gid nimi sinugu Panginuun nimu Diyus si Muysis kay suruguun ipakaun sa kanyu inda pag daga ag matyun ti tanan mag-uli sitay.

²⁵ Kainda atay kami sa kanmu sirung kapangyarihan, mabuwat nimu ti una hintay kanmu ipabwat sa kanmi.”

²⁶ Balaw pinasnuan ni Huswi matyun sida manga Israilita.

²⁷ Dapat binwat niya sida manughanap kayu ag manugtaas danum para sa kadamlan ag sa harandugan Panginuun. Tugka kainda pagbuwatun nida inda pag buruwatun sa rugar pinili Panginuun nu naan siya pag sambahun.