Huswi 7 - Hanunuu

Ti Kasalanan ni Akan

¹ Dapat linabag gid manga Israilita ti sugu Panginuun kuntay danga magbuul una hintay pag ihinandug yi buu para sa Panginuun. Dahil namuul si Akan manga bagay balaw dapat bul-un, nakan masyadu gid nagalit ti Panginuun sa kanda. Si Akan inda anak ni Karmi. Si Karmi anak ni Sabdi. Si Sabdi anak ni Sira. Inda sida ginan sa lahi ni Huda.

² Ati ginan sa Hiriku nagsugu si Huswi manga tawu mantiid ati sa Hay, usa ka banwa sa butlakan Bitil arani sa Bit Abin. Nakan nanlakaw ti manga tawu hampay mantiid.

³ Pagka nuli sida, magkun sida sa kan Huswi, “Unman kailangan man-gira kita tanan sa Hay, dahil pira-pira lang ti manga mag-uli ati. Pagpadara lang kawu 2,000 ngatay 3,000 tawu hampay man-gira ati.”

⁴ Nakan manga 3,000 Israilita ti nan-gira sa Hay, dapat tinalu sida manga taga Hay.

⁵ Linagas sida ginan sa puwirtahan banwa tugka sa Sibarim, manga 36 sa kanda ti nagkaramatay habang maglus-ug sida sa kabantudan. Nakan natalaw ti manga Israilita ag nadala sida.

⁶ Dahil sa karukuan, ginitas ni Huswi hanggan manga takinan sa Israil kanda manga rutay ag pinaulian galbuk kanda manga ulu, bag-u napadapa sida sa atubangan Kaban Panginuun tugka sa yabi.

⁷ Magkun si Huswi, “Panginuun Diyus, hayga ipinadipay waya nimu kami sa Sapa Hurdan nu ipatalu lang waydi nimu kami sa manga Amuriyu? Mayad waya napatayak yi lang kami sa baliw dipay Hurdan.

⁸ Panginuun, hintay duy kang masabi taynguna inmatras ti manga Israilita sa kanda manga kalaban?

⁹ Mabaritaan inda manga Kananiyu hanggan iba waya taga sitay, ag palibutan nida kami bag-u panmatyun. Malu, unu kanmu buwatun hampay maalagaan kanmu makamaskihan pag ngaran?”

¹⁰ Magkun ti Panginuun sa kan Huswi, “Pagtindug kawu! Hayga kawu madapaan?

¹¹ Nagsalan ti Israil; linabag nida kang kasunduan. Namuul sida manga bagay ihinandug yi buu sa kangku. Tinakaw nida inda, nagpudil sida tungkul sa inda, ag ipinaamut nida inda sa kanda manga kasiyunan.

¹² Imaw inda kay dahilan nu hayga unman sida makalaban sa kanda manga kalaban. Nalagiw sida sa kanda manga kalaban, dahil sida mismu rurisun diman bilang handug buu sa kangku. Unman yi aku mangiba sa kanyu nu balaw niyu rurisun ti manga bagay ihinandug yi buu sa kangku.

¹³ “Pagtindug kawu ag sabihi ti manga tawu lumpiyuha kanda sadili para sa aldaw dahil aku, ti Panginuun Diyus Israil, magkumun: ‘Kamu pag manga Israilita, may itinagu kamu manga bagay ihinandug yi buu sa kangku. Unman kamu makalaban sa kanyu manga kalaban hanggan sa unman mab-ul inda pag manga bagay sa kanyu.

¹⁴ Nakan aldaw surip, pag-atubang kamu sa kangku angay sa kanyu lahi. Ti itudlu niku nagkasala pag lahi pagpakarani angay sa kanda lahi. Ti itudlu niku nagkasala pag lahi pagpakarani angay sa kanda magtal-anakan. Bag-u ti itudlu niku nagkasala pag magtal-anakan pagpakarani angay sa kada usa ka tawu.

¹⁵ Ti itudlu niku pag tawu nanagu manga bagay ihinandug yi buu sa kangku sunugun kaibahan kay magtal-anakan hanggan ti tanan niya kasiyunan. Dahil linabag niya kang kasunduan, ag nagbuwat siya kakay-ahan sa Israil.’ ”

¹⁶ Pagka surip, maaga waya ipinakarani ni Huswi sa Panginuun ti manga Israilita angay sa kanda lahi. Ag ti pinili sa kanda ti lahi ni Huda.

¹⁷ Ipinakarani niya ti manga lahi ni Huda, ag ti pinili sa kanda ti lahi ni Sira. Ipinakarani niya ti manga lahi ni Sira, ag ti pinili sa kanda kay magtal-anakan ni Sabdi.

¹⁸ Ipinakarani niya ti magtal-anakan ni Sabdi, ag ti pinili si Akan. (Si Akan anak ni Karmi. Si Karmi anak ni Sabdi. Ag si Sabdi anak ni Sira sa lahi ni Huda.)

¹⁹ Magkun si Huswi sa kan Akan, “Anak, dayawa ti Panginuun, ti Diyus Israil; pagsabi kawu kay tutuu sa kay atubangan. Unu kanmu binwat? Danga inda paglihiman sa kangku.”

²⁰ Nagsagut si Akan, “Tutuu nagsalan aku sa Panginuun, ti Diyus Israil. Imaw inda kang binwat:

²¹ Sa manga bagay naagaw nita, may nakitan aku usa ka marinu pag rutay ginan sa Babilunya, pilak manga duwa ka kilu may tunga, ag usa ka barita gintu manga tunga kilu. Naibug gid aku sa inda pag manga bagay, nakan bin-ul niku. Ilinbung niku inda sa daga sa sulud niku turda. Ti pilak ati gid sa sirung.”

²² Nakan nagsugu si Huswi sa manga tawu pagpalagiw atabug sa turda ni Akan. Ag ati nakitan nida ti manga bagay ilinbung, ti pilak ati gid waydi sa sirung inda.

²³ Dinara nida inda sa kan Huswi ag sa tanan Israilita, bag-u ipinauli sa kadayawan Panginuun.

²⁴ Bag-u dinara ni Huswi ag tanan Israilita si Akan sa Karatagan Akur, hanggan ti pilak, ti rutay, ti usa ka barita gintu, kay manga anak, kay manga baka, manga asnu, manga karanidu, turda, ag ti tanan niya kasiyunan.

²⁵ Magkun si Huswi sa kan Akan, “Hayga ipinadamhak nimu kami? Nakan taynguna kawu waydi ti ipadamhak Panginuun.” Rargu binintuk manga Israilita si Akan tugka sa namatay. Binintuk diman nida kay magtal-anakan bag-u sinunug kay manga kasiyunan.

²⁶ Bag-u tinakbunan nida si Akan manga batu. Asan di inda pag manga batu tugka kainda. Ag ati pag rugar pag-ingarnan Karatagan Akur tugka kainda. Bag-u nadura ti pangagalit Panginuun.