Huswi 6 - Hanunuu

Ti Pagkadamhak Hiriku

¹ Tinalakpan gid mayad manga mag-uli ati ti sabian Hiriku dahil sa manga Israilita. Unman may makasulud ngatay makaluwas manga tawu sa banwa.

² Magkun ti Panginuun sa kan Huswi, “Ipasakup niku sa kanyu ti Hiriku hanggan kay hari ag manga sundalu.

³ Kawu hanggan ti tanan nimu sundalu manpalibut sa banwa usa ka bisis kada sirang, sa sulud unum ka sirang.

⁴ Paunahun nimu sa Kaban Kasunduan ti pitu ka manughandug ti kada usa sa kanda may dara budyung. Sa ikapitu pag sirang, pagpalibut kamu sa banwa pitu ka bisis, kaibahan ti manga manughandug magpatunug kanda manga budyung.

⁵ Nu madnugan yi niyu ti aba pag tunug nida budyung, pagringgit mabaskug kamu tanan. Bag-u matumpag ti alad batu banwa ag makasulud kamu tanan unman may ampara.”

⁶ Nakan si Huswi kay anak ni Nun nagtawag sa manga manughandug ag sinabihan, “Daran-a niyu ti Kaban Kasunduan. Pag-una ti pitu sa kanyu ti kada usa may dara budyung.”

⁷ Ag sinabihan diman niya ti manga tawu, “Paglakaw yi kamu. Palibuti niyu ti banwa. Ti iba ka manga sundalu pag-una sa pitu ka manughandug may dara manga budyung.”

⁸ Angay sa sinabi ni Huswi, inmuna ti pitu ka manughandug sa Kaban Kasunduan Panginuun bag-u pinatunug nida ti manga budyung.

⁹ Ti iba ka manga sundalu inmuna sa inda pag manga manughandug, bag-u ti iba waya gid magdasun sa Kaban Kasunduan. Unman gid may apas ti magpatunug manga budyung.

¹⁰ Dapat sinabihan ni Huswi ti manga tawu danga magringgit ngatay mag-ingay nu unman waya siya magsabi pagringgit.

¹¹ Angay sa isinugu ni Huswi, ipinalibut nida usa ka bisis sa banwa ti Kaban Panginuun. Bag-u nanbalik sida sa kanda kampu ag ati pag naturug igu yabi.

¹² Pagka surip, maaga waya gid binmangun si Huswi. Dinara maan manga manughandug ti Kaban Panginuun,

¹³ ti pitu sa kanda inmuna maan sa Kaban Panginuun magpatunug kanda manga budyung. Ag katunda diman ti binwat manga sundalu — ti iba sa kanda sa unahan Kaban Panginuun ag ti iba sa uryan, habang parargu pagpatunugun ti manga budyung.

¹⁴ Pagka sa ikadwa pag sirang, pinalibut maan nida ti banwa kas-a ginan, pagkatapus binmalik sida sa kanda kampu. Katida ngani kanda binwat sa sulud unum ka sirang.

¹⁵ Pagka sa ikapitu pag sirang, madlum surip waya nagbangun yi sida bag-u pinalibutan nida ti banwa makapitu ginan, sa katida diman pag paraan. Sa tunda lang pag sirang pinalibut nida ti banwa makapitu ginan.

¹⁶ Sa ikapitu pag palibut nida, pinatunug manga manughandug kanda manga budyung ag magkun si Huswi sa manga tawu, “Pagringgit kamu! Ipinakaun yi Panginuun sa kanta inda pag banwa!

¹⁷ Ti buu banwa ag ti tanan asan rurisun lubus bilang handug sa Panginuun. Si Rahab lang ti babayi baraydan hanggan kay buu magtal-anakan ti iribri dahil itinagu niya kanta manga manugtiid.

¹⁸ Danga gid kamu magbuul una hintay pag bagay ihinandug yi sa Panginuun. Nu mamuul kamu una hintay, midamhak gid kamu, ag kamu ti bumaliw dahilan nu rumas-ug ti kadamhakan sa Israil.

¹⁹ Ti tanan pag bagay binwat sa pilak, gintu, galang, hanggan baul pasamanan para sa Panginuun, ag dapat ipauli inda sa taraguan kayamanan Panginuun.”

²⁰ Pinatunug manga manughandug kanda manga budyung, bag-u nanriringgitan ti manga Israilita pagka nadnugan nida inda. Nagkaratumpag gid ti alad batu sa banwa ag nansalakay sida. Nakasulud sida unman may ampara, bag-u nasakup nida ti banwa.

²¹ Isinagda nida buu sa Panginuun ti banwa sa panab-anan pagmatay sa manga lalaki ag babayi, gurangun ag anak, hanggan manga baka, karanidu ag manga asnu.

²² Sinugu ni Huswi ti duwa ka tawu manugtiid, “Ataga niyu kay balay babayi baraydan, palwasan niyu siya hanggan kay buu magtal-anakan angay sa kanyu itinaratu sa kanya.”

²³ Nakan linmakaw sida duwa ag dinara nida sa luwas si Rahab, kaibahan kay ama, ina, manga patar-ari ag ti buu nida magtal-anakan. Ipinalwas nida sida tanan ag pinatahan sa luwas kampu Israil.

²⁴ Sinunug nida ti buu banwa ag ti tanan asan purya lang sa manga binwat ginan sa pilak, gintu, galang, hanggan baul. Pinanbuul nida inda hampay ipauli sa taraguan kayamanan Panginuun.

²⁵ Dapat irinibri ni Huswi si Rahab hanggan kay magtal-anakan dahil itinagu niya ti manga lalaki sinugu ni Huswi maniid sa Hiriku. Kainda tugka kay manga lahi mag-uli sa Israil.

²⁶ Tunda pag udas, pinasandaman ni Huswi ti manga Israilita: “Saadan Panginuun ti una si unu ti manhangad pumatindug uman sa inda pag banwa Hiriku. Mamatayan anak panganay ti pumatindug sa inda pag patakinan batu. Bag-u ti mamuwat manga sabian inda mamatayan kap-usan pag anak.”

²⁷ Giniyahan gid Panginuun si Huswi, ag nibantug siya sa buu daga.