Huswi 5 - Hanunuu

Ti Pagturi

¹ Nabaritaan tanan hari Amuriyu sa isalpan Hurdan hanggan tanan hari Kananiyu sa baybay Dagat Miditiranyu nu kabitay pinamara Panginuun ti Sapa Hurdan katpung nandipay ti manga Israilita. Nakan nadala sida ag nagmatalaw manlaban sa manga Israilita.

² Ati katpung, magkun ti Panginuun sa kan Huswi, “Pagbuwat kawu manga patarum human sa tanang batu, bag-u turia ti manga Israilita.” (Inda ti ikadwa pag turi sa manga Israilita.)

³ Nakan nagbuwat si Huswi manga patarum, bag-u pinanturi ti manga Israilita ati sa Bantud Tinurian.

^4-6 Inda kay dahilan nu hayga pinanturi ni Huswi ti manga lalaki: Pagka nighit ti manga Israilita sa Ihiptu, ti tanan lalaki tinuri yi. Dapat ti manga iinanak sa sulud upatpulu ka timpu sa kanda maglakaw sa pangawakawaan unman naturi. Ag sa ati katpung pag udas, ti manga lalaki may kang-ud pag idad hampay lumaban nagkaramatay dahil unman sida nagsunud sa Panginuun. Sinabihan sida Panginuun kuntay unman gid nida makitan ti marinu ag abunda pag daga kay itinaratu sa kanda ginurang ipakaun sa kanda.

⁷ Ti manga inmilis sa kanda pag manga anak lalaki nida imaw kay tinuri ni Huswi, dahil unman sida naturi katpung malakawan.

⁸ Pagka naturi sida, asan lang sida sa kanda kampu tugka sa umayad kanda manga biyag.

⁹ Bag-u magkun ti Panginuun sa kan Huswi, “Kainda bin-ul niku sa kanyu ti kakay-ahan bilang panawuhun sa Ihiptu.” Nakan ati pag rugar pag-ingarnan Gilgal kainda tugka.

¹⁰ Habang makampuhan di waya ti manga Israilita sa Gilgal, sa karatagan Hiriku, idinaus nida ti Pista Pag-alaala sa Karibrihan. Idinaus nida inda sa yabi ika-14 pag sirang sa un-an pag bulan.

¹¹ Pagkasurip, nangaun sida manga naani sa tunda pag daga: manga sinanglay tirigu hanggan tinapay unman may pamadaka.

¹² Tunda ginan inmapas ti pagkaragdag mana, ag unman yi may mana ti manga Israilita. Tunda ginan kanda karan-unun manga naani wadi ginan sa daga Kanaan.

¹³ Habang ati si Huswi sa arani Hiriku, kadaka niya nakitan ti tawu matindugan sa kay atubangan may bitbit baladaw. Pinaingana siya ni Huswi, “Sundalu aw kawu nimi ngatay kalaban?”

¹⁴ Nagsagut ti tawu, “Balaw aku kanyu sundalu ngatay kanyu kalaban. Nag-ataytag aku bilang kumandir sundalu Panginuun.” Napadapa si Huswi bilang paggalang sa kanya ag nagpaingana, “Hintay duy kanmu gustu ipabuwat sa kangku, sa kanmu manugsirbi?”

¹⁵ Nagsagut ti kumandir sundalu Panginuun, “Lubada kanmu lapak, dahil banal pag rugar kanmu pagtindugan. Ag sinunud ni Huswi ti pag-isugu sa kanya.”