Huswi 4 - Hanunuu

Nagpatindug Palatandaan ti manga Israilita

¹ Pagka nakadipay yi ti tanan nasakupan Israil sa Sapa Hurdan, magkun ti Panginuun sa kan Huswi,

² “Pagpili kawu 12 ka tawu, usa sa kada lahi,

³ bag-u sugua ti kada usa sa kanda kibuul usa ka batu sa karaw-an sapa, ati sa may pagtindugan manga manughandug. Pagkatapus daran-un nida inda sa rugar kanyu kampuhan taynguna pagyabi.”

⁴ Nakan tinawag ni Huswi ti 12 ka tawu kay pinili ginan sa kada linahi Israil, bag-u sinabihan,

⁵ “Pag-atag kamu sa karaw-an sapa, sa atubangan Kaban Panginuun niyu Diyus. Ti kada usa sa kanyu pagbuul ag pagpas-an usa ka batu para sa kada linahi Israil,

⁶ bag-u rargu niyu tumpukun hampay bumaliw usa ka tanda bilang alaala sa binwat Panginuun. Aban, nu mamaingana kanyu manga anak sa kanyu nu unu kay ibug sabihun inda pag manga batu,

⁷ tultulan niyu sida kuntay inmapas kay magbulus ti Sapa Hurdan pagka idinipay ti Kaban Kasunduan Panginuun. Inda pag batu usa ka alaala para sa nasakupan Israil tugka aban.”

⁸ Sinunud 12 ka Israilita ti isinugu ni Huswi sa kanda. Angay sa sinabi Panginuun kan sa Huswi, namuul sida 12 ka batu sa karaw-an sapa, usa ka batu para sa kada linahi Israil. Dinara nida ti manga batu sa kanda kinampuhan bag-u ipinauli ati.

⁹ Nagpauli diman si Huswi 12 ka batu sa karaw-an sapa, sa rugar tinindugan manga manughandug nandara sa Kaban Kasunduan. Tugka kainda asan di tunda pag manga batu.

¹⁰ Unman inmighit sa karaw-an sapa ti manga manughandug tugka sa natapus manga tawu ti tanan isinugu Panginuun sa kan Huswi, angay diman sa kay isinugu ni Muysis sa kan Huswi.

¹¹ Pagka nakadipay yi sida tanan, idinipay diman manga manughandug ti Kaban Panginuun. Ag inmuna maan ti manga manughandug sa manga tawu.

¹² Nagdipay diman ag inmuna sa manga tawu ti manga lalaki armadu ginan sa lahi ni Rubin, ni Gad, ag katunga lahi ni Manasis, angay sa isinugu ni Muysis sa kanda.

¹³ Inda pag 40,000 armadu manga lalaki nanlawuy sa atubangan Panginuun ag nag-atag sa karatagan Hiriku hampay lumaban.

¹⁴ Sa tunda pag sirang, pinahalgaan Panginuun si Huswi sa atubangan manga Israilita. Ag iginalang si Huswi manga tawu sa buu niya buhi parihu sa binwat manga tawu sa kan Muysis.

¹⁵ Pagka nakadipay ti manga Israilita sa Sapa, magkun ti Panginuun sa kan Huswi,

^16-17 “Sugua ti manga manughandug may dara Kaban Kasunduan pag-ighit yi sida sa karaw-an Sapa Hurdan.” Ag sinunud inda ni Huswi.

¹⁸ Nakan napasimang ti manga manughandug sa sapa dara ti Kaban Kasunduan Panginuun. Pagtata nida sa saruy sapa, binmulus maan ti danum ga sa kabag-u diman.

¹⁹ Ti pagdipay manga Israilita sa Sapa Hurdan nangyari katpung ikasampulu pag sirang sa un-an pag bulan. Bag-u nankampu sida sa Gilgal, sa butlakan baliwa Hiriku.

²⁰ Ati pag-ipinauli ni Huswi ti 12 ka batu kay ipinab-ul sa Sapa Hurdan.

²¹ Magkun si Huswi sa manga Israilita, “Aban, nu mamaingana kanyu manga anak sa kanyu nu unu kay ibug sabihun tunda pag batu,

²² sabiha niyu kuntay nanlakaw ti manga Israilita sa mamara pag daga katpung nandipay sida sa Sapa Hurdan.

²³ Sabiha niyu sa kanda kuntay pinamara Panginuun niyu Diyus ti Sapa Hurdan tugka sa nakadipay kamu parihu sa binwat niya sa Dagat Marara tugka sa nakadipay kita.

²⁴ Binwat niya inda hampay kilalan-un tanan tawu sa kalibutan kuntay makamaskihan gid ti Panginuun, ag hampay pirmi kamu maggalang sa Panginuun niyu Diyus.”