Huswi 3 - Hanunuu

Nagdipay ti manga Israilita sa Hurdan

¹ Taynguna, maaga gid nagbangun si Huswi hanggan ti tanan Israilita. Nighit sida sa Sitim bag-u nag-atag sa Sapa Hurdan. Kinmampu dapu sida ati bag-u di nagdipay.

² Pagkalawuy tulu ka sirang, namalibut sa kampu ti manga takinan

³ bag-u magkun sa manga tawu, “Nu makitan niyu pagdaran-un manga manughandug ginan sa lahi ni Libi ti Kaban Kasunduan Panginuun niyu Diyus, pagdasun kamu sa kanda,

⁴ hampay maalaman niyu nu naan kamu paglumakaw, dahil unman waya gid kamu nakalakaw siyun ginan sa kabag-u. Dapat danga lang kamu magpakarani sa Kaban Kasunduan; pagmay-imaw agwat manga 1,000 mitrus.”

⁵ Bag-u sinabihan ni Huswi ti manga tawu, “Lumpiyuha niyu kanyu sadili, dahil aldaw ipakakit Panginuun sa kanyu ti makadululaw pag manga bagay.”

⁶ Sinabihan diman ni Huswi ti manga manughandug, “Daran-a yi niyu ti Kaban Kasunduan bag-u pag-una kamu sa manga tawu.” Ag sinunud ngani nida ti sinabi ni Huswi.

⁷ Taynguna, magkun ti Panginuun sa kan Huswi, “Taynguna pag sirang, dayawun kawu nimu kaparihu Israilita, bag-u maalaman nida mag-iba aku sa kanmu parihu sa kang pag-iba sa kan Muysis.

⁸ Sabihi ti manga manughandug may dara Kaban Kasunduan nu rumas-ug yi sida sa Sapa Hurdan, pagpat-ung sida sa danum.”

⁹ Nakan tinawag ni Huswi ti manga tawu, “Abala kamu, dahil tultulan niku kamu nu hintay ti sinabi Panginuun niyu Diyus.

¹⁰ Taynguna maalaman niyu mag-iba sa kanyu ti buhi pag Diyus, dahil ipatabug gid niya sa kanyu ti manga Kananiyu, Hitiyu, Hibiyu, Pirisiyu, Girgisiyu, Amuriyu ag manga Hibusiyu.

¹¹ Pihua niyu ti Kaban Kasunduan Panginuun makamaskihan sa buu kalibutan umuna sa kanyu habang magdipay kamu sa Sapa Hurdan.

¹² Nakan kainda, pagpili kamu 12 ka tawu, usa sa kada linahi Israil.

¹³ Nu mandipay yi ti manga manughandug may dara Kaban Panginuun makamaskihan sa buu kalibutan, umapas ti bulus danum sa Sapa Hurdan. Inda pag danum ginan sa babaw pumat-ung sa usa ka rugar.”

^14-15 Tig-arani ati katpung, magbaha ti sapa Hurdan. Nighit ti manga tawu ginan sa kanda manga kampu hampay mandipay. Mag-una sa kanda ti manga manughandug may dara Kaban Kasunduan. Pagka nagdipay ti manga manughandug sa sapa,

¹⁶ rargu inmapas ti bulus danum. Nagpat-ung ti danum sa usa ka rugar pag-ingarnan Adam — usa ka banwa arani sa Saritan. Unman may danum magbulus atabug sa Dagat Namatay, nakan nakadipay ti manga tawu sa rugar arani sa Hiriku.

¹⁷ Matindugan sa karaw-an mamara sapa ti manga manughandug may dara Kaban Kasunduan Panginuun habang magdipay ti tanan nasakupan Israil. Unman sida nighit siyun ginan tugka sa ud nakadipay ti tanan.