Huswi 24 - Hanunuu

Nagtaratu ti manga Israilita kuntay Tupadun maan Nida ti Kasunduan Diyus

¹ Kainda, ipinatipun ni Huswi ti tanan linahi Israil sa Sikim. Tinawag rargu niya ti manga manugpamahala, ti manga takinan, hanggan ti manga manughusay, ag ti manga may kangaranan sa Israil, bag-u nagpakarani sida sa atubangan Diyus.

² Magkun si Huswi sa tanan tawu, “Imaw inda ti pagsabihun Panginuun, ti Diyus Israil: Sa kabag-u, kanyu manga ginurang mag-uli sa dipay Sapa Iyupratis ag nagsamba sa iba ka manga diyus. Usa sa kanda si Tira kay ama ni Abraham ag ni Nahur.

³ Dapat bin-ul niku si Abraham sa ati pag rugar ag ipinaatag sa daga Kanaan, ag pinakan-an mayamu pag manga linahi. Anak niya si Isaak,

⁴ ag anak waydi ni Isaak si Isaw ag si Hakub. Ipinakaun niku sa kan Isaw ti kabantudan Siir bilang kanya pag kabahagi, dapat si Hakub ag kay manga anak nag-ati sa Ihiptu.

^5-6 Pagka sa uryan, ipinadara niku si Muysis ag si Aarun hampay iribri kamu sa Ihiptu, bag-u pinadaran-an niku manga sarut ti Ihiptu, ag ilinwas niku kamu hanggan kanyu manga ginurang. Dapat pagka nakaras-ug yi kanyu manga ginurang sa Dagat Marara, linagas sida manga Ihipsiyu may manga kabayu ag manga kalisa.

⁷ Nanhagad sida awat sa kangku, ag pinaulian niku madlum sa karaw-an nida ag manga Ihipsiyu. Ag rargu niku linimus ti manga Ihipsiyu sa dagat. Nakitan gid ngap niyu ti binwat niku sa manga Ihipsiyu. Bag-u nangulian kamu sa pangawakawaan sa dugay pag panahun.

⁸ “Pagkatapus dinara niku kamu sa daga manga Amuriyu sa butlakan Sapa Hurdan. Nanlaban sida sa kanyu, dapat pinanalu niku kamu. Ipinadamhak niku sida sa kanyu ag sinakup niyu kanda daga.

⁹ Bag-u nanlaban sa Israil ti hari Muab, si Balak, kay anak ni Sipur. Sinugu niya si Balaam kay anak ni Biyur kuntay saadi kamu.

¹⁰ Dapat unman niku pinahintulutan si Balaam mabwat niya inda sa kanyu. Bagkus ngap, binasbasan kamu ni Balaam, ag irinibri niku kamu sa kamang ni Balak.

¹¹ “Bag-u nandipay kamu sa Sapa Hurdan ag nakaras-ug sa Hiriku. Nanlaban sa kanyu ti manga taga Hiriku, katunda diman ti manga Amuriyu, Pirisiyu, Kananiyu, Hitiyu, Girgisiyu, Hibiyu ag Hibusiyu. Dapat pinapanalu niku kamu laban sa kanda.

¹² Pinadaran-an niku manga putyukan ti duwa ka hari Amuriyu hampay tabugun sida bag-u kamu rumas-ug. Nanalu kamu balaw dahil sa kanyu manga baladaw ag ugyung.

¹³ Pinakan-an niku kamu daga balaw niyu binudlayan. Pinauli niku kamu sa manga banwa balaw kamu ti nagpatindug. Magkaun kamu taynguna manga ubas ag manga ulibu balaw kamu ti nagtanum.”

¹⁴ Nakan magkun si Huswi, “Galanga niyu ti Panginuun ag sirbihi may katapatan. Bugyahi yi niyu ti manga diyus pagsambahun kaybi niyu manga ginurang sa baliw dipay Sapa Iyupratis ag sa Ihiptu, bag-u pagsirbi kamu sa Panginuun.

¹⁵ Dapat nu dayu kamu manirbi sa Panginuun, mamili kamu taynguna pag sirang nu si unu kanyu sirbihan. Manirbi aw lugud kamu sa manga diyus pag sirbihan niyu manga ginurang sa baliw dipay Sapa Iyupratis, ngatay sa manga diyus manga Amuriyu kanda daga taynguna kanyu pag-ulian. Dapat aku inda hanggan kang magtal-anakan mansirbi sa Panginuun.”

¹⁶ Sinmagut ti manga tawu, “Unman gid sa kanmi naisipan ti pumatlikud sa Panginuun ag manirbi sa iba pag manga diyus.

¹⁷ Ti Panginuun nita Diyus imaw ti nagpalwas sa kanta ag sa kanta manga ginurang sa pagkapanawuhun ati sa Ihiptu. Nakitan diman nita ti manga makadululaw niya binwat. Iningatan niya kita sa kanta maglakaw sa manga nasyun nita magkalawyan.

¹⁸ Ag ipinatabug niya sa kanta ti manga Amuriyu ag ti iba waya pag manga nasyun mag-uli sitay. Nakan manirbi diman kami sa Panginuun, dahil siya kanmi Diyus.”

¹⁹ Magkun si Huswi sa manga tawu, “Unman kamu makasirbi sa Panginuun dahil banal siya pag Diyus ag balaw niya gustu may pagsambahun kamu tuhay. Unman niya baliwalaun kanyu maralaban ag manga kasalanan.

²⁰ Nu dayuun niyu ti Panginuun ag sumirbi kamu sa tuhay pag manga diyus, mangisug siya sa kanyu ag parusahan niya kamu. Ipadamhak niya kamu una kaybi sa kabag-u mayad siya sa kanyu.”

²¹ Dapat magkun ti manga tawu sa kan Huswi, “Manirbi di gid kami sa Panginuun.”

²² Magkun si Huswi, “Kamu mismu ti manga patunay sa kanyu sadili kuntay manirbi kamu sa Panginuun.” Nagsagut sida, “Hu, manga kastigus kami.”

²³ Bag-u magkun si Huswi, “Nu katunda, dayua yi niyu kanyu manga diyus-diyusan ag sirbihan niyu ti Panginuun, ti Diyus Israil.”

²⁴ Sinmagut ti manga tawu, “Sirbihan nimi ti Panginuun nimi Diyus, ag sundun kay manga sugu.”

²⁵ Sa tunda pag sirang nagbuwat si Huswi kasunduan sa manga tawu ati sa Sikim, ag ipinakaun niya sa kanda ti manga kasuguan hanggan ti manga surundanun.

²⁶ Isinurat inda ni Huswi sa Ribru Kasuguan Diyus. Bag-u nagbuul siya daka pag batu ag ipinatindug sa puun kayu insina arani sa banal pag rugar Panginuun.

²⁷ Ag magkun si Huswi sa tanan manga tawu, “Inda pag batu imaw kanta kastigus kuntay nagpakihampang ti Panginuun sa kanta. Pumatutuu inda laban sa kanyu nu unman kamu mantupad sa kanyu sinabi sa Diyus.”

²⁸ Pagkatapus pinauli ni Huswi ti manga tawu sa kanda manga rugar.

Namatay si Huswi ag si Iliyasar

²⁹ Pagka sa uryan, namatay ti suruguun Panginuun si Huswi, anak ni Nun, sa idad 110.

³⁰ Ilinbung siya sa kay daga ati sa Timnat Sira, sa kabantudan Ipraim, sa salatan Bantud Gaas.

³¹ Nagsirbi sa Panginuun ti manga Israilita katpung sa udas ni Huswi. Ag una namatay yi si Huswi, parargu di gid sida sa pagsirbi sa Panginuun habang buhi waya ti manga manugpamahala manga Israilita nakalakaw tanan binwat Panginuun para sa Israil.

³² Kay manga but-ul ni Husi dinara manga Israilita ginan sa Ihiptu ilinbung sa Sikim, sa daga binili ni Hakub halaga 100 bilug pilak sa manga anak ni Hamur kay ama ni Sikim. Inda pag bahagi nasakupan daga ipinakaun sa manga lahi ni Husi.

³³ Namatay diman si Iliyasar kay anak ni Aarun ag ilinbung sa Gibiya, ti banwa sa kabantudan Ipraim, ti ipinakaun sa anak ni Iliyasar sa kan Piniis.