Huswi 23 - Hanunuu

Kay Bilin ni Huswi sa manga Israilita

¹ Sa kadugayun, pinakan-an Panginuun kaariwayahan ti Israil sa kanda manga kalaban sa sangput. Gurangun yi gid si Huswi,

² nakan ipinatawag niya ti tanan Israilita, hanggan kanda manga manugpamahala hanggan ti takinan, ag manughusay. Magkun siya sa kanda, “Gurangun yi gid aku.

³ Nakitan gid ngap niyu ti tanan binwat Panginuun niyu Diyus sa inda pag manga nasyun dahil sa kanyu. Ti Panginuun niyu Diyus imaw ti linmaban para sa kanyu.

⁴ Hinuray-huray yi niku sa kanyu bilang maranahun niyu manga lahi ti tanan daga manga nasyun kanta nasakup, ginan sa Sapa Hurdan sa butlakan atabug sa Dagat Miditiranyu sa isalpan, hanggan diman ti manga daga manga nasyun unman waya nita nasakup.

⁵ Maapu diman niyu kanda manga daga, angay sa itinaratu Panginuun niyu Diyus sa kanyu. Dahil tabugun sida Panginuun niyu Diyus.

⁶ “Pagpakarig-un kamu, ag siguraduha gid niyu tupadun ti tanan nakasurat sa Ribru Kasuguan ni Muysis. Danga gid niyu inda pagdayua.

⁷ Danga kamu magpausa sa siyun pag manga nasyun nasawad sa kanyu karaw-an, ag danga kamu magbanggit ngaran nida manga diyus ngatay manumpa sa ngaran nida. Danga diman kamu magsamba ngatay magsirbi sa kanda,

⁸ bagkus ngap pagmatutum kamu sa Panginuun niyu Diyus, parihu sa kanyu pagbuwatun tugka kainda.

⁹ “Ipinatabug Panginuun sa kanyu ti daraka ag makapangyarihan pag manga nasyun, ag tugka kainda unman waya gid may una usa ti nakatalu sa kanyu.

¹⁰ Una si unu sa kanyu makatabug 1,000 tawu, dahil ti Panginuun niyu Diyus imaw ti lumaban para sa kanyu, angay sa kay itinaratu.

¹¹ Nakan siguraduha gid mahalun niyu ti Panginuun niyu Diyus.

¹² “Dapat nu pumatlikud kamu sa kanya ag pumausa sa manga nasawad pag nasyun sa kanyu karaw-an, ag umasawa ngatay magpalakay sa kanda,

¹³ pihu gid unman yi ipatabug Panginuun niyu Diyus sa kanyu inda pag manga nasyun. Bagkus ngap, bumaliw dilikadu sida sa kanyu parihu sa suduk, ag bumaliw sida pabuyat sa kanyu parihu sa latigu nu malaptik kawu sa dayu ngatay dugi nu matbuk kanmu mata. Parargu inda tugka sa magkaramatay kamu sa siyun pag marinu daga ipinakaun sa kanyu Panginuun niyu Diyus.

¹⁴ “Arani yi aku mamatay. Alam niyu sa buu niyu tagipusuun ag karadwa tinupad Panginuun niyu Diyus ti tanan mayad pag manga bagay kay itinaratu sa kanyu. Unman gid may una usa ti unman niya natupad.

¹⁵ Dapat kainda tinupad Panginuun niyu Diyus ti tanan niya itinaratu sa kanyu, tupadun diman niya sa kanyu ti ipinasandam niya pag parusa tugka sa maipadamhak niya kamu sa siyun pag marinu daga ipinakaun niya sa kanyu.

¹⁶ Tutuu, mangyari inda sa kanyu nu lumabag kamu sa kasunduan Panginuun niyu Diyus isinugu niya tupadun niyu, ag nu mansamba kamu ag sumirbi sa iba pag manga diyus. Ipadara gid niya sa kanyu kay pangagalit ag rargu kamu midamhak sa siyun pag marinu daga ipinakaun niya sa kanyu.”