Huswi 22 - Hanunuu

Binmalik sa Kanda Rugar ti manga Linahi Israil sa Butlakan Baliwa

¹ Taynguna, tinipun ni Huswi ti manga nasakupan lahi ni Rubin, ni Gad, ag katunga lahi ni Manasis.

² Magkun si Huswi sa kanda, “Binwat niyu ti tanan isinugu sa kanyu ni Muysis ti suruguun Panginuun ag sinunud diman niyu ti tanan isinugu niku.

³ Tugka kainda unman niyu pagpabay-anan kanyu kaparihu manga Israilita. Ag sinunud niyu mayad ti tanan isinugu Panginuun niyu Diyus sa kanyu.

⁴ Ag taynguna, natanggap yi niyu kaparihu manga Israilita ti kaariwayahan itinaratu Panginuun niyu Diyus sa kanda. Nakan pag-uli yi kamu sa kanyu manga rugar sa dipay Sapa Hurdan, sa daga ipinakaun sa kanyu ni Muysis suruguun Panginuun.

⁵ Dapat danga gid niyu pagkalimti tupadun ti manga sugu ag manga tudlu ipinakaun sa kanyu ni Muysis imaw ti manugsirbi Panginuun. Mahala niyu ti Panginuun niyu Diyus, pagpangabuhi kamu angay sa kay kagustuhan, tupada kay manga sugu, pagmarig-un sa kanya, ag sirbihi niyu siya buu tagipusuun hanggan karadwa.”

⁶ Binasbasan sida ni Huswi ag pinauli.

⁷ (Ti katunga lahi ni Manasis pinakan-an ni Muysis daga sa Basan, ag kay katunga waya gid lahi pinakan-an ni Huswi daga sa isalpan Sapa Hurdan kaibahan iba manga lahi.) Pagka pauli yi sida, binasbasan sida ni Huswi

⁸ magkun, “Man-ululi kamu dara kanyu mayamu pag manga kayamanan — hayup, pilak, gintu, galang, baul ag manga rutay. Ayawi niyu kanyu manga katawuhan sa kanyu rugar una hintay sa kanyu naagaw sa kanyu manga kalaban.”

⁹ Ag rargu nuli ti manga nasakupan lahi ni Rubin, ni Gad, ag katunga lahi ni Manasis. Tinayakan nida kanda kaparihu manga Israilita sa Silu, sa daga Kanaan, bag-u nagbalik sa Gilyad sa kanda kabahagi pag daga angay sa isinugu Panginuun sa panab-anan ni Muysis.

¹⁰ Pagras-ug nida sa Gililut, arani sa Sapa Hurdan, namatindug sida ati daka pag harandugan. Inda pag rugar sakup waya Kanaan.

^11-12 Taynguna, nabaritaan iba manga Israilita nagpatindug harandugan arani sa Sapa Hurdan sa dipay Israilita, sa katugkaan Kanaan sa Gililut, ti lahi nida ni Rubin, ni Gad, ag katunga lahi ni Manasis. Nakan nagtipun sida sa Silu hampay mansalakay laban sa kanda.

¹³ Sinugu manga Israilita si Piniis anak ni manughandug Iliyasar pag-atag sa Gilyad, sa lahi ni Rubin, ni Gad ag sa katunga lahi ni Manasis.

¹⁴ May kaibahan siya sampulu ka takinan ginan sa kada linahi Israil. Kada usa sa kanda manga takinan nida manga lahi.

¹⁵ Pagras-ug nida sa Gilyad, magkun sida sa lahi ni Rubin, ni Gad, ag sa katunga lahi ni Manasis,

¹⁶ “Gustu maalaman tanan nasakupan Panginuun nu hayga kamu pinmatlikud sa Diyus Israil. Naglaban kamu sa Panginuun sa pagpatindug niyu harandugan para sa kanyu sadili. Unman yi kamu magsunud sa kanya.

¹⁷ Udyi aw lugud nita magkatandaan kanta kasalanan ati sa Piyur? Dahil ati pinadaran-an kita Panginuun sarut, ag mag-agwanta waya ngani kita tugka kainda.

¹⁸ Ag taynguna gustuhun waya niyu pumatlikud sa Panginuun. Nu manlaban waya ngani kamu sa kanya kainda pag sirang, aldaw mangisug gid siya sa tanan nasakupan Israil.

¹⁹ Nakan nu kailangan niyu ti harandugan dahil kanyu daga pagbaliwun mauring, pagdipay kamu atay sa kanmi, sa daga Panginuun nu naan asan ti Turda pagsambahan sa kanya, ag ati yi kamu pagmuli. Dapat danga lang kamu magpatindug iba ka harandugan purya sa harandugan Panginuun nita Diyus, dahil inda usa ka paglaban sa kanya ag sa kanmi.

²⁰ Nalimtan yi aw lugud niyu si Akan kay anak ni Sira? Katpung linabag niya ti sugu tungkul sa manga bagay ihinandug buu sa Panginuun, pinarusahan siya ag kay buu nasakupan Israil. Balaw lang siya ti namatay dahil sa kay kasalanan.”

²¹ Nagsagut ti manga lahi nida ni Rubin, ni Gad ag kay katunga lahi ni Manasis sa ati pag manga takinan:

²² “Ti Panginuun imaw ti Makamaskihan pag Diyus! Ti Panginuun imaw ti Makamaskihan pag Diyus! Alam niya nu hayga binwat nimi inda, ag kailangan diman niyu maalaman. Nu nanlaban gid waydi kami ngatay naglabag sa Panginuun, matya niyu kami sa inda pag sirang.

²³ Nu linabag nimi ti Panginuun sa panab-anan pagpatindug nimi sadili harandugan para sa manga handug pagsunugun, manga handug pasalamat, ngatay manga handug para sa mayad pag pakiusa sa Panginuun, mana ti Panginuun mismu ti manparusa sa kanmi.

²⁴ “Binwat nimi inda dahil magkadala kami barang rumas-ug ti udas sabihun niyu manga lahi sa kanmi pag manga lahi, ‘Unu kanyu labut sa Panginuun, ti Diyus Israil?

²⁵ Binwat Panginuun katugkaan ti Sapa Hurdan hampay ipasaman kamu sa kanmi. Kamu pag manga lahi ni Rubin ag ni Gad, unman gid kamu may labut sa Panginuun.’ Barang imaw inda kanda sabihun ag paapasun nida kanmi manga lahi sa pagsamba sa Panginuun.

²⁶ Nakan ipinatindug nimi ti harandugan, balaw para sa manga handug pagsunugun ag sa iba waya pag manga handug,

²⁷ nu unman para bumaliw tanda sa kanmi, sa kanyu, ag para sa kanta manga lahi kuntay pagsambahun nimi ti Panginuun sa panab-anan manga handug pagsunugun, manga handug para sa mayad pag pakiusa sa Panginuun, ag iba waya pag manga handug ati sa kay Turda. Nakan unman makasabi kanyu manga laki aban sa uryan sa kanmi manga lahi kuntay unman sida may labut sa Panginuun.

²⁸ Ag nu mangyari gid waydi inda kanda sabihun sa kanmi manga lahi, sumabi diman waydi sida, ‘Malu bantayi! Namatindug harandugan kanmi manga ginurang parihu sa harandugan Panginuun, balaw para sa manga handug pagsunugun ag sa iba waya pag manga handug, nu unman bilang palatandaan sa kanmi ag sa kanyu kuntay usa lang ka Diyus kanta pagsambahun.’

²⁹ “Unman nimi mabwat manlaban ngatay pumatlikud sa Panginuun sa panab-anan pagpatindug nimi sadili harandugan para sa manga handug pagsunugun, manga handug pasalamat, ag sa iba waya pag manga handug. Balaw nimi ibalyu ti harandugan Panginuun nita Diyus asan sa atubangan niya Turda.”

³⁰ Nagbaya si Manug-asiwa Piniis hanggan ti manga takinan manga magtal-anakan manga Israil pagka nasaydan nida ti sinabi manga lahi ni Rubin, ni Gad, ag katunga lahi ni Manasis.

³¹ Nakan magkun si Piniis anak ni Iliyasar usa ka manughandug, “Alam nita taynguna kaibahan nita ti Panginuun dahil unman kamu naglaban sa kanya. Irinibri niyu ti Israil sa parusa Panginuun.”

³² Bag-u nuli sa Kanaan si Piniis hanggan ti manga takinan bag-u sinabi nida sa manga Israilita kanda pinaghampangan sa manga lahi ni Rubin ag ni Gad ati sa Gilyad.

³³ Pagka nadnugan nida inda, nagbaya sida ag nagdayaw sa Diyus. Ag unman yi sida nagtultul tungkul sa pagsalakay sa daga pag-ulian manga lahi ni Rubin ag ni Gad.

³⁴ Iningarnan manga lahi nida ni Rubin ni Gad ti harandugan “Kastigus”, dahil magkun sida, “Kastigus inda para sa kanta tanan ti Panginuun Diyus nita.”