Huswi 21 - Hanunuu

Ti manga Banwa para sa Lahi ni Libi

¹ Taynguna, ti manga takinan manga lahi ni Libi nag-atag sa kan manughandug Iliyasar, sa kan Huswi anak ni Nun, ag sa manga takinan kada linahi Israil

² ati sa Silu sa daga Kanaan. Magkun sida, “Nagsugu ti Panginuun sa panab-anan ni Muysis kuntay ayawi kami manga banwa kanmi ulianan hanggan manga paraharaban para sa kanmi manga hayup.”

³ Nakan angay sa isinugu Panginuun, pinakan-an ti manga lahi ni Libi manga banwa hanggan manga paraharaban ginan sa manga daga manga Israilita.

⁴ Ti un-an nakatanggap manga banwa imaw ti manga lahi ni Kuhat. Ti iba sa kanda kay manga lahi ni Aarun, ag pinakan-an sida 13 ka banwa ginan sa daga manga lahi ni Huda, Simyun ag ni Binhamin.

⁵ Ti iba ka manga lahi ni Kuhat pinakan-an 10 ka banwa ginan sa manga lahi ni Ipraim, Dan, ag katunga lahi ni Manasis.

⁶ Ti manga lahi ni Girsun pinakan-an 13 ka banwa ginan sa daga manga lahi ni Isakar, Asir, Niptali, ag katunga lahi ni Manasis sa Basan.

⁷ Ti manga lahi ni Mirari pinakan-an 12 ka banwa ginan sa daga manga lahi ni Rubin, ni Gad, ag ni Sabulun.

⁸ Nakan sa panab-anan lunggungan, pinakan-an manga Israilita ti manga lahi ni Libi manga banwa hanggan manga paraharaban, angay sa isinugu Panginuun sa kan Muysis.

^9-10 Imaw inda kay manga ngaran manga banwa ginan sa daga manga lahi ni Huda ag ni Simyun ipinakaun sa manga lahi ni Aarun. Inda sida manga lahi ni Kuhat kay anak ni Libi. Sida ti un-an nabunut pakan-an manga banwa.

¹¹ Ipinakaun sa kanda ti Kiryat Arba (imaw ti Hibrun) sa kabantudan Huda, kaibahan yi ti manga paraharaban sa kay sangput. (Si Arba imaw kay ama ni Anak.)

¹² Dapat ti manga katanmanan ag manga baryu sa sangput inda pag banwa ipinakaun yi sa kan Kalib anak ni Hipuni bilang kay kabahagi.

¹³ Nakan ipinakaun sa manga lahi ni manughandug Aarun ti Hibrun usa sa manga banwa darangpan, nu naan pag makapatagu ti tawu nakamatay balaw niya sinadya. Ipinakaun waya gid sa kanda ti Libna,

¹⁴ Hatir, Istimwa,

¹⁵ Hulun, Dibir,

¹⁶ Ain, Huta ag Bit Simis, kaibahan kanda manga paraharaban: 9 ka banwa tanan ginan sa daga manga lahi ni Simyun ag ni Huda.

^17-18 Pinakan-an diman sida upat ka banwa ginan sa daga lahi ni Binhamin. Inda ti Gibyun, Giba, Anatut, ag Almun, kaibahan siyun kanda manga paraharaban.

¹⁹ 13 tanan ka banwa, kaibahan siyun kanda manga paraharaban, ti natanggap manga manughandug lahi ni Aarun.

^20-22 Ti iba ka lahi ni Kuhat ginan sa lahi ni Libi nakatanggap upat ka banwa ginan sa daga lahi ni Ipraim. Inda ti Sikim (sa kabantudan Ipraim usa sa manga banwa darangpan, nu naan pag makapatagu ti tawu nakamatay balaw niya sinadya), ti Gisir, Kibsaim ag Bit Hurun, kaibahan siyun kanda manga paraharaban.

^23-24 Pinakan-an diman sida upat ka banwa ginan sa daga lahi ni Dan. Inda ti Iltiki, Gibitun, Ayalun ag Gat Rimun, kaibahan siyun kanda manga paraharaban.

²⁵ Ag ginan waydi sa daga katunga lahi ni Manasis sa isalpan, natanggap nida inda pag duwa ka banwa: ti Taanak ag ti Gat Rimun, kaibahan kanda manga paraharaban.

²⁶ 10 tanan ka banwa, kaibahan siyun kanda manga paraharaban, ti natanggap manga lahi ni Kuhat.

²⁷ Ti manga lahi ni Girsun ginan sa lahi ni Libi nakatanggap duwa ka banwa ginan sa daga katunga lahi ni Manasis sa butlakan. Inda ti Gulan sa Basan (usa sa manga banwa darangpan, nu naan pag makapatagu ti manga tawu nakamatay balaw sinadya), ag ti Biistira, kaibahan siyun kanda manga paraharaban.

^28-29 Pinakan-an diman sida upat ka banwa ginan sa daga lahi ni Isakar. Inda ti Kisyun, Dibirat, Harmut, In Ganim, kaibahan kanda manga paraharaban.

^30-31 Ag ginan sa daga lahi ni Asir, natanggap nida ti upat ka banwa: ti Misal, Abdun, Hilkat ag Rihub, kaibahan kanda manga paraharaban.

³² Pinakan-an waya gid sida tulu ka banwa ginan sa daga lahi ni Niptali. Inda ti Kadis sa Galiliya (usa diman sa manga banwa darangpan, nu naan pag makapatagu ti tawu nakamatay balaw niya sinadya), ti Hamut Dur, ag ti Kartan, kaibahan kanda manga paraharaban.

³³ 13 tanan ka banwa, kaibahan siyun kanda manga paraharaban, natanggap manga lahi ni Girsun.

^34-35 Ti manga nasawad pag manga lahi ni Libi — ti manga lahi ni Mirari — nakatanggap upat ka banwa ginan sa daga lahi ni Sabulun. Inda ti Hukniyam, Karta, Dimna, ag Nahalal, kaibahan kanda manga paraharaban.

^36-37 Pinakan-an diman sida upat ka banwa ginan sa daga lahi ni Rubin. Inda ti Bisir, Yahas, Kidimut, ag Mipaat, kaibahan kanda manga paraharaban.

^38-39 Pinakan-an waya gid sida upat ka banwa ginan sa daga lahi ni Gad. Inda ti Ramut sa Gilyad (usa sa manga banwa darangpan, nu naan pag makapatagu ti tawu nakamatay balaw niya sinadya), ti Mahanaim, Hisbun, ag Hasir, kaibahan kanda manga paraharaban.

⁴⁰ 12 tanan ka banwa, kaibahan siyun kanda manga paraharaban, ti natanggap manga lahi ni Mirari ginan sa lahi ni Libi.

^41-42 48 tanan ka banwa, kaibahan kanda sadili paraharaban, ti natanggap manga lahi ni Libi ginan sa daga magkaapu manga Israilita.

⁴³ Nakan ipinakaun Panginuun sa Israil ti tanan daga kay itinaratu sa kanda manga ginurang. Pagka nasakup yi nida inda, ati yi sida pag nuli.

⁴⁴ Pinakan-an sida Panginuun kapayapaan sa kanda manga kalaban sa sangput, angay sa itinaratu Panginuun sa kanda manga ginurang. Unman sida natalu nida manga kalaban dahil pinanalu sida Panginuun sa tanan nida kalaban.

⁴⁵ Tinupad gid Panginuun ti tanan niya itinaratu sa nasakupan Israil.