Huswi 20 - Hanunuu

Ti manga Banwa Darangpan

¹ Taynguna, magkun ti Panginuun sa kan Huswi,

² “Sabihi ti manga Israilita pagpili sida manga banwa darangpan angay sa sinabi niku kaybi sa kanyu sa panab-anan ni Muysis.

³ Ti tawu nakamatay balaw tikis makapalagiw atag ag makapatagu sa manga tawu magkaibug bumalus sa kanya.

⁴ Makapalagiw siya sa usa sa inda pag manga banwa, ag sumarangu sa manga manug-asikasu ati sa may puwirtahan banwa ag manpaliwanag sa kanda tungkul sa nangyari. Bag-u pasuldun siya ag ati pauliun.

⁵ Nu lagsun siya ati magkaibug bumalus sa kanya, unman siya ipakaun manga mag-uli ati. Apinan nida siya dahil balaw tikis ti pagmatay niya sa kay kaparihu, ag binwat niya inda dahil sa kay pangagalit.

⁶ Mangulian siya sa tunda pag banwa tugka sa mabista kay kasu sa atubangan kadamlan, ag tugka sa mamatay ti pangulu manughandug magsirbi sa tunda pag panahun. Bag-u makauli yi siya sa kanda.”

⁷ Nakan pinili manga Israilita ti Kadis sa Galiliya sa kabantudan Niptali, ti Sikim sa kabantudan Ipraim, ag ti Kiryat Arba (imaw ti Hibrun), sa kabantudan Huda.

⁸ Sa butlakan Sapa Hurdan arani sa Hiriku, pinili nida ti Bisir sa pangawakawaan karatagan sakup lahi ni Rubin, ti Ramut sa Gilyad sakup lahi ni Gad, ag ti Gulan sa Basan sakup lahi ni Manasis.

⁹ Imaw inda ti manga banwa darangpan pinili para sa manga Israilita hanggan sa manga day-uhan mag-uli kaibahan nida. Ti una si unu ti makamatay balaw sinadya mahimu makadangup ati, hampay unman siya matyun sa gustu bumalus sa kanya, habang udwaya magkabista kay kasu sa atubangan kadamlan.