Huswi 2 - Hanunuu

Nanugu Manugtiid si Huswi Atabug sa Hiriku

¹ Taynguna, lihim nanugu si Huswi duwa ka tawu ginan sa kampu manga Israilita atabug sa Sitim hampay maniid sa daga Kanaan, lalu yi gid sa banwa Hiriku. Pagka nakaras-ug ti duwa ka manugtiid sa Hiriku, ati pag dinmayun sida sa balay ni Rahab, usa ka babayi baraydan.

² Nabaritaan hari Hiriku may nanras-ug manga Israilita sa tunda pag yabi hampay tiidan sida.

³ Nakan nanugu ti hari hampay sabihan si Rahab kuntay, “Palwasan nimu ti manga tawu magdayun sa kanmu balay, dahil nagsitay sida hampay tiidan kanta rugar.”

^4-6 Magkun si Rahab, “Tutuu duy may manga tawu nandayun sitay dapat unman niku alam nu taga naan ginan sida. Ginminan sida pagka madulum yi ag pagka pagtalakpan yi ti puwirtahan banwa. Unman niku alam nu naantabug sida, dapat nu usigun niyu sida kainda, barang matakdan waya niyu sida.” (Dapat kay tutuu, itinagu ni Rahab ti duwa ka tawu sa babaw atup niya balay bag-u tinabunan manga pinamulud halaman buruwatun pisahan linu kay pag-ipauga ati.)

⁷ Ginminan ti manga suruguun hari hampay lagsun ti duwa ka manugtiid. Pagkaluwas nida, rargu tinalakpan ti puwirtahan. Sa kanda maglagas nakaras-ug sida tugka sa may diripayan Sapa Hurdan.

⁸ Habang udwaya magkaturug ti duwa ka manugtiid, nandayik si Rahab sa babaw atup bag-u

⁹ magkun sa kanda, “Alam niku ipinakaun Panginuun sa kanyu inda pag daga ag masyadu gid magkadala sa kanyu ti manga tawu atay.

¹⁰ Nabaritaan nimi nu kabitay pinamara Panginuun ti Dagat Marara katpung linmuwas kamu ginan sa Ihiptu. Nabaritaan diman nimi nu kabitay niyu minatay ti duwa ka hari manga Amuriyu sida ni Sihun ni Ug, ati sa butlakan Hurdan.

¹¹ Nadala kami pagka nabaritaan nimi inda ag naduraan kabisugan ti kada usa sa kanmi dahil sa kanyu. Dahil ti Panginuun niyu Diyus imaw ti Diyus sa langit hanggan sa daga.

¹² Nakan kainda, pagsumpa kamu sa ngaran Panginuun pakakitan niyu kaayadan kang magtal-anakan, parihu sa kang binwat kaayadan sa kanyu. Pakan-i niyu aku puruyba

¹³ balaw niyu aku matyun hanggan kang gurang, bag-u kang manga patar-ari ag kanda buu kasunu balay.”

¹⁴ Magkun ti duwa ka manugtiid sa kan Rahab, “Ibuwis nimi kanmi buhi para sa kanyu! Nu balaw nimu isabi kanmi pagtiid sitay, pakakitan gid nimi kawu kaayadan. Tupadun gid nimi inda nu ipakaun yi Panginuun inda pag daga sa kanmi.”

¹⁵ Inda si Rahab mag-uli sa balay duut sa alad batu sa banwa, nakan inawatan niya ti duwa ka manugtiid makadugsun lakaw sa gaha sa panab-anan lubid.

¹⁶ Magkun si Rahab sa kanda, “Pag-atag kamu sa kabantudan hampay balaw kamu makitan manga maglagas sa kanyu. Pagpatagu kamu ati sa sulud tulu ka sirang tugka sa makauli sida. Pagkatapus makaparargu yi kamu sa kanyu pag uli.”

¹⁷ Magkun ti duwa ka manugtiid sa kan Rahab, “Tupadun nimi kanmu ipinasumpa sa kanmi,

¹⁸ dapat kailangan buwatun diman nimu inda: Nu girahun yi nimi kanyu daga, higutan inda pag maragang lubid sa kanmi dinugsunan pag gaha. Tipunun nimu sa kanmu balay kanmu gurang, hanggan manga patar-ari ag ti buu nida magtal-anakan.

¹⁹ Nu may usa ka manluwas ag mangatag sa dalan, balaw yi kami may saragtun nu mamatay siya. Dapat may saragtun kami nu mamatay siya sa sulud nimu balay.

²⁰ Dapat nu kanmu itultul kuntay kami nagtiid, balaw duy nimi tupadun kanmu ipinasumpa sa kanmi.”

²¹ Sinmagut si Rahab, “Hu, pasnu aku.” Bag-u pinaginan yi ni Rahab sida, ihinigut ni Rahab ti maragang lubid sa gaha.

²² Pagka nakaighit yi ti duwa ka manugtiid, nag-atag sida sa kabantudan. Ati sida pag napatagu sa sulud tulu ka sirang habang paghanapun sida manga suruguun hari sa manga dalan. Unman sida nakitan, nakan nuli yi lang ti manga suruguun hari.

²³ Naglus-ug ti duwa ka manugtiid ag nandipay sa sapa, bag-u binmalik kan Huswi. Itinultul nida sa kan Huswi ti tanan nangyari.

²⁴ Magkun sida, “Tutuu gid pag-ipakaun Panginuun ti buu daga sa kanta. Magkadala ati ti tanan tawu sa kanta.”