Huswi 19 - Hanunuu

Ti Ipinakaun pag Daga sa Lahi ni Simyun

¹ Ti ikadwa pag hinurayan daga imaw ti manga magtal-anakan lahi ni Simyun. Kanda daga ati sa may karaw-an daga ipinakaun sa lahi ni Huda.

² Kaibahan inda sa Biirsiba (ngatay Siba), Mulada,

³ Hasar Suwal, Bala, Isim,

⁴ Iltulad, Bitul, Hurma,

⁵ Siklag, Bit Markabut, Hasar Susa,

⁶ Bit Libaut ag Saruhin — 13 ka banwa tanan, kaibahan ti manga baryu sa kay sangput.

⁷ Dugang waya gid sitay ti Ayin, Rimun, Itir ag Asan — 4 ka banwa, kaibahan ti tanan manga baryu sa sangput inda,

⁸ tugka sa Baalat Biir (imaw ti Rama) sa Nigib. Imaw tunda pag daga ti natanggap lahi ni Simyun hinuray angay sa kada magtal-anakan.

⁹ Kay iba inda pag bahagi daga ginan sa bahagi lahi ni Huda dahil ti ipinakaun pag daga sa kanda subra daka. Nakan kay natanggap lahi ni Simyun pag daga ati sa karaw-an daga lahi ni Huda.

Ti Ipinakaun pag Daga sa Lahi ni Sabulun

¹⁰ Ti ikatlu pag hinurayan daga imaw ti manga magtal-anakan ni Sabulun. Ti katugkaan daga nida ginan sa Sarid.

¹¹ Ati ginan, atabug inda sa isalpan: sa Marala, sa Dibisit ag diritsu sa bululusan danum sa butlakan Hukniyam.

¹² Ginan sa baliw bahagi Sarid, atabug sa katugkaan sa butlakan sa tugkaan Kislut Tabur, bag-u diritsu sa Dibirat tugka sa Hapya.

¹³ Ati ginan, atabug inda sa butlakan sa Gat Hipir, sa It Kasin ag sa Rimun bag-u paliku atabug sa Niya.

¹⁴ Ti katugkaan Sabulun sa salatan maglawuy sa Hanatun ag atabug sa Luung Ipta Il.

¹⁵ Dusi ka banwa ti sakup Sabulun, kaibahan ti manga baryu sa kay sangput. Dugang waya gid ti manga banwa Katat, Nahalal, Simrun, Idala ag Bitlihim.

¹⁶ Imaw tunda pag manga banwa ag manga baryu ti natanggap lahi ni Sabulun, hinuray angay sa kada magtal-anakan.

Ti Ipinakaun pag Daga sa Lahi ni Isakar

¹⁷ Ti ikap-at pag hinurayan daga imaw kay magtal-anakan lahi ni Isakar.

¹⁸ Inda ti manga banwa sakup nida: Hisriil, Kisulut, Sunim,

¹⁹ Haparaim, Siun, Anaharat,

²⁰ Rabit, Kisyun, Ibis,

²¹ Rimit, In Ganim, In Hada, ag Bit Pasis.

²² Ti katugkaan daga abut sa Tabur, sa Sahasuma, ag sa Bit Simis, ag tugka sa Sapa Hurdan. 16 ka banwa ti sakup Isakar, kaibahan ti manga baryu sa kay sangput.

²³ Imaw tunda ti manga banwa ag manga baryu natanggap lahi ni Isakar, hinuray angay sa kada magtal-anakan.

Ti Ipinakaun pag Daga sa Lahi ni Asir

²⁴ Ti ikalima pag hinurayan daga imaw ti manga magtal-anakan lahi ni Asir.

²⁵ Inda ti manga banwa sakup nida: Hilkat, Hali, Bitin, Aksap,

²⁶ Alamilik, Amad ag Misal. Ti katugkaan inda pag daga sa isalpan aput sa Karmilu ag Sihur Libnat.

²⁷ Paliku inda tag sa butlakan atabug sa Bit Dagun ag abut sa Sabulun ag sa Luung Iptail. Bag-u atabug inda sa salatan sa Bit Imik ag Niil. Atabug waya gid inda sa salatan sa Kabul,

²⁸ Ibrun, Rihub, Hamun, Kana ag tugka sa Daka Sidun.

²⁹ Paliku inda atabug sa Rama ag sa may alad batu pag banwa Tiru, ag tabug sa Husa, ag tugka lang sa Dagat Miditiranyu. Ti iba waya gid pag manga banwa sakup nida imaw ti Mihibil, Aksib,

³⁰ Umma, Apik ag Rihub — 22 ka banwa tanan, kaibahan ti manga baryu sa kay sangput.

³¹ Imaw tunda ti manga banwa ag manga baryu natanggap lahi ni Asir, hinuray angay sa kada magtal-anakan.

Ti Ipinakaun pag Daga sa Lahi ni Niptali

³² Ti ikan-um pag hinurayan daga imaw ti manga magtal-anakan lahi ni Niptali.

³³ Ti katugkaan nida daga umpisa ginan sa Hilip ag sa may puun kayu insina sa Saananim atabug sa Adami Nikib ag Habniil tugka sa Lakum, ag tugka lang sa Sapa Hurdan.

³⁴ Ati ginan, paliku inda sa isalpan atabug sa Asnut Tabur, bag-u sa Hukuk, tugka sa katugkaan Sabulun sa kanaway, sa katugkaan Asir sa isalpan ag sa Sapa Hurdan sa butlakan.

³⁵ Ti may alad batu pag manga banwa sakup inda pag daga imaw ti Sidim, Sir, Hammat, Rakat, Kinirit,

³⁶ Adama, Rama, Hasur,

³⁷ Kadis, Idrii, In Hasur,

³⁸ Irun, Migdal Il, Hurim, Bit Anat ag Bit Simis — 19 ka banwa tanan, kaibahan ti manga baryu sa kay sangput.

³⁹ Imaw tunda ti manga banwa ag manga baryu natanggap lahi ni Niptali, hinuray angay sa kada magtal-anakan.

Ti Ipinakaun pag Daga sa Lahi ni Dan

⁴⁰ Ti ikapitu pag hinurayan daga imaw ti manga magtal-anakan lahi ni Dan.

⁴¹ Inda ti pag manga banwa kanda sakup, ti Sura, Istaul, Ir Simis,

⁴² Saalabin, Ayalun, Itla,

⁴³ Ilun, Timna, Ikrun,

⁴⁴ Iltiki, Gibitun, Baalat,

⁴⁵ Hihud, Bini Birak, Gat Rimun,

⁴⁶ Mi Harkun, ag Rakun, hanggan diman ti daga maatubangan sa Hupa.

⁴⁷ Nakurian kaybi ti manga lahi ni Dan sa pag-agaw sa kanda daga, nakan ginira nida ti Lais ag pinanmatay ti manga mag-uli ati. Naagaw nida inda ag ati sida nangulian. Pinalitan nida kay ngaran inda Dan angay sa kanda ginurang si Dan.

⁴⁸ Imaw tunda ti manga banwa ag manga baryu natanggap lahi ni Dan, hinuray angay sa kada magtal-anakan.

Ti Ipinakaun pag Daga sa kan Huswi

⁴⁹ Pagkatapus nahuray manga Israilita kanda daga, pinakan-an nida bahagi daga si Huswi anak ni Nun.

⁵⁰ Angay sa isinugu Panginuun, ipinakaun nida sa kanya ti banwa kay hinagad — ti Timnat Sira sa kabantudan Ipraim. Ipinatindug maan niya inda pag banwa ag ati siya pag nuli.

⁵¹ Ti naghuray daga sida ni manughandug Iliyasar, Huswi kay anak ni Nun, hanggan ti manga takinan kada linahi Israil. Binwat nida inda sa panab-anan lunggungan sa kadayawan Panginuun, sa sabian Turda Taragbuan ati sa Silu. Nakan natapus ti paghururayan daga.