Huswi 18 - Hanunuu

Kay Pagkahuray-huray sa Iba waya pag Daga

¹ Pagka natapus masakup manga Israilita tunda pag daga, naniripnan sida tanan sa Silu, bag-u namatindug Turda Taragbuan.

² May pitu waya ka lahi manga Israilita ti udwaya nahurayan daga.

³ Nakan magkun si Huswi sa manga Israilita, “Kapira waya lugud niyu sakupun ti nasawad pag daga ipinakaun sa kanyu Panginuun, ti Diyus niyu manga ginurang?

⁴ Pagpili kamu tulu ka tawu sa kada lahi. Palakawun niku sida hampay alamun ti nasawad pag daga. Bag-u bumalik sida sitay sa kangku may dara mapa binwat nida magpakakit nu kabitay hurayun ati pag daga.

⁵ Kailangan hurayun ti daga sa pitu ka bahagi, balaw kasali ti daga manga lahi ni Huda sa salatan hanggan ti daga manga lahi ni Husi sa kanaway.

⁶ Pagkatapus madara ti mapa sa kangku, manlunggungan rargu aku sa kadayawan Panginuun nita Diyus nu sa kantapu pag lahi miatag ti kada bahagi daga.

⁷ Dapat ti manga Libita unman hurayan daga dahil kanda bahagi imaw ti pagsirbi sa Panginuun bilang manga manughandug. Ti manga lahi ni Gad, hanggan ni Rubin, ag kay katunga lahi ni Manasis nakatanggap yi manga bahagi daga sa butlakan Hurdan, ti ipinakaun sa kanda ni Muysis ti suruguun Panginuun.”

⁸ Pagka magkaginan yi ti napili pag manga tawu, magkun si Huswi sa kanda, “Usisaa niyu ti buu daga ag buwati niyu inda mapa. Bag-u pagbalik kamu sitay sa kangku sa Silu, dahil manlunggungan rargu aku sa kadayawan Panginuun nu sa kantapu pag lahi pag miatag ti kada bahagi daga.”

⁹ Nakan linmakaw ti manga tawu hampay usisaun ti daga. Bag-u binwatan nida inda mapa, kay daga hinuray sa pitu ka bahagi, ag ilinista nida ti manga banwa hanggan ti manga banwa sakup kada bahagi daga. Pagkatapus binmalik sida sa kan Huswi sa Silu.

¹⁰ Ag sa panab-anan lunggungan pinakan-an ni Huswi bahagi ti manga linahi Israil unman waya may daga.

Ti Ipinakaun pag Daga sa Lahi ni Binhamin

¹¹ Ti un-an pag bahagi daga niatag sa lahi ni Binhamin. Ati inda sa tab-anan manga daga ipinakaun kaybi sa lahi ni Huda ag sa manga lahi ni Husi.

¹² Kay katugkaan inda sa kanaway ginan sa Sapa Hurdan atabug sa kanaway lus-ugun Hiriku. Bag-u palus-ug inda sa isalpan sa manga kabantudan tugka sa pangawakawaan Bit Abin.

¹³ Ati ginan, atabug inda sa kanaway sa Lus (imaw diman ti Bitil). Bag-u palus-ug inda sa Atarut Adar, sa bantud kanaway sa sirung baliwa Bit Hurun.

¹⁴ Ati ginan, atabug inda sa isalpan sa bantud masranguhan sa Bit Hurun ag atabug sa kanaway. Nitugka inda sa Kiryat Baal (imaw diman ti Kiryat Harim), usa ka banwa lahi ni Huda. Imaw inda kay katugkaan sa isalpan.

¹⁵ Ginan sa luwas Kiryat Harim ti katugkaan sa kanaway. Ati ginan, atabug inda sa isalpan sa manga bulbugan Niptuwa.

¹⁶ Palus-ug inda sa sirung bantud masranguhan sa Luung Bin Hinum. Inda pag ratag ati sa may salatan Karatagan Ripaim. Ati ginan, atabug inda sa Luung Bin Hinum, sa kanaway dugsunan banwa manga Hibusiyu, atabug sa In Rugil.

¹⁷ Linmiku inda tag sa salatan atabug sa In Simis tugka sa Gililut maatubangan sa Dalan Patukad sa Adumim. Bag-u palus-ug inda sa Batu ni Buhan anak ni Rubin

¹⁸ ag maglawuy sa salatan dugsunan maatubangan sa Karatagan Hurdan, bag-u atabug sa karatagan Bit Araba.

¹⁹ Bag-u atabug inda sa salatan dugsunan Bit Hugla, ag nitugka inda sa salatan lalawyan danum Dagat Namatay, imaw diman ti katugkaan Sapa Hurdan sa kanaway. Imaw tunda ti katugkaan sa kanaway.

²⁰ Ti Sapa Hurdan imaw kay katugkaan sa butlakan baliwa. Imaw inda ti manga katugkaan daga natanggap lahi ni Binhamin angay sa kada magtal-anakan.

Ti Natanggap Lahi ni Binhamin pag manga Banwa

²¹ Imaw inda pag manga banwa ti ipinakaun sa lahi ni Binhamin, hinuray angay sa kada magtal-anakan: Hiriku, Bit Hugla, Imik Kisis,

²² Bit Araba, Simaraim, Bitil,

²³ Abim, Para, Upra,

²⁴ Kipar Amuni, Upni, ag Giba — 12 ka banwa tanan, kaibahan ti manga baryu sa kay sangput.

²⁵ Dugang waya gid sitay ti Gibyun, Rama, Biirut,

²⁶ Mispa, Kipira, Musa,

²⁷ Rikim, Irpiil, Tarala,

²⁸ Sila, Hailip, Hibus (imaw ti Hirusalim), Gibiya ag Kiryat Harim — 14 ka banwa tanan, kaibahan ti manga baryu sa kay sangput. Imaw tunda ti natanggap lahi ni Binhamin angay sa paghuray sa kada magtal-anakan.