Huswi 17 - Hanunuu

Ti Daga Katunga Lahi ni Manasis

¹ May ipinakaun diman daga para sa katunga lahi ni Manasis kay panganay pag anak ni Husi. Ti Gilyad ag ti Basan sa butlakan Sapa Hurdan ipinakaun yi sa magtal-anakan ni Makir dahil mayad sida pag sundalu. (Si Makir kay ama ni Gilyad imaw ti panganay pag anak ni Manasis.)

² Ti daga sa isalpan Sapa Hurdan ipinakaun sa iba pag manga lahi ni Manasis imaw kay magtal-anakan ni Abisir, Hilik, Asriil, Sikim, Hipir, ag Simida. Inayaw-ayaw inda angay sa kada magtal-anakan.

³ Kainda may usa ka tawu kay ngaran si Silupihad. Anak siya ni Hipir ag laki ni Gilyad. Si Gilyad anak ni Makir, ag si Makir anak ni Manasis. Si Silupihad unman may manga anak lalaki, nu unman manga babayi lang. Sida ni Mala, Nuwa, Hugla, Milka, ag Tirsa.

⁴ Nag-atag sida sa kan Iliyasar usa ka manughandug, sa kan Huswi anak ni Nun, ag sa manga takinan bag-u magkun, “Nagsugu ti Panginuun sa kan Muysis kuntay pakan-i kami daga parihu sa kanmi manga katawuhan lalaki.” Nakan pinakan-an sida nida bahagi angay sa isinugu Panginuun.

⁵ Imaw inda kay dahilan nu hayga kay lahi ni Manasis nakatanggap sampulu ka bahagi daga, balaw labut sa Gilyad ag Basan sa butlakan Hurdan,

⁶ dahil pinakan-an diman kabahagi kay manga lahi babayi kaibahan kay manga lahi lalaki. Ti Gilyad ipinakaun sa iba waya pag manga lahi ni Manasis.

⁷ Ti katugkaan daga lahi ni Manasis ginan sa Asir tugka sa Mikmitat, sa butlakan Sikim. Bag-u atabug inda sa kanaway tag sa daga manga tawu mag-uli arani sa bulbugan Tapwa.

⁸ (Ti manga daga sa sangput Tapwa imaw ti magkaapu lahi ni Manasis, dapat ti Tapwa mismu, sa may katugkaan lahi ni Manasis, magkaapu manga lahi ni Ipraim.)

⁹ Bag-u kay katugkaan atabug sa Luung Kana. May manga banwa sa salatan sa may luung imaw ti magkaapu lahi ni Ipraim, una kaibahan inda sa manga banwa lahi ni Manasis. Kay katugkaan lahi ni Manasis parargu atabug sa kanaway baliwa luung tugka sa Dagat Miditiranyu.

¹⁰ Ti daga sa salatan sa may luung magkaapu lahi ni Ipraim ag ti daga sa kanaway sa may luung magkaapu lahi ni Manasis. Ti katugkaan lahi ni Manasis sa isalpan imaw ti Dagat Miditiranyu. Ti ati sa kanaway pag lahi ni Manasis, imaw kay lahi ni Asir, bag-u ti ati sa butlakan imaw kay lahi ni Isakar.

¹¹ Imaw inda ti manga banwa sa daga manga lahi ni Isakar ag ni Asir ti ipinakaun sa lahi ni Manasis: ti Bit San, Ibliyam, Dur (ngatay Naput Dur), Indur, Taanak, Migidu, ag ti manga baryu sa kay sangput.

¹² Dapat inda pag manga banwa unman naapu manga lahi ni Manasis, dahil unman nida napaighit ti manga Kananiyu ati.

¹³ Dapat pagka marig-un yi ti manga Israilita, binwat nida panawuhun ti manga Kananiyu, dapat unman nida sida pinaighit.

¹⁴ Magkun ti manga lahi ni Husi sa kan Huswi, “Hayga usa lang ka bahagi daga ti ipinakaun nimu sa kanmi? Masyadu kami mayamu dahil pinapaladan gid kami Panginuun.”

¹⁵ Nagsagut si Huswi, “Nu mayamu gid waydi kamu ag diit lang para sa kanyu ti manga kabantudan Ipraim, pag-atag kamu sa katalunan manga Pirisiyu ag manga Ripaimiyu. Pagrayaw kamu ati pag rugar para sa kanyu sadili.”

¹⁶ Magkun ti manga lahi ni Husi, “Ti manga kabantudan diit lang para sa kanmi. Ag unman nimi kaya ti manga Kananiyu sa karatagan dahil may manga kalisa sida baul. Ag katida diman ti manga Kananiyu sa Bit San hanggan sa manga banwa sa sangput inda, ag sa Karatagan Hisriil.”

¹⁷ Sinmagut maan si Huswi, “Dahil mayamu masyadu kamu ag makapangyarihan, balaw lang usa kanyu bahagi,

¹⁸ bumaliw kanyu diman ti manga katalunan sa kabantudan. Una katalunan inda, rayawa lang niyu, dahil bumaliw kanyu inda ginan sa umpisa tugka sa suru. Ag pihu mapaighit niyu ti manga Kananiyu una makapangyarihan waya sida ag may manga kalisa baul.”