Huswi 16 - Hanunuu

Ti Ipinakaun pag manga Daga sa Lahi ni Ipraim ag ni Manasis

¹ Ti daga ipinakaun sa manga lahi ni Husi umpisa sa Sapa Hurdan arani sa Hiriku, sa butlakan manga bulbugan sa Hiriku, atabug sa pangawakawaan ag sa kabantudan tugka sa Bitil.

² Ginan sa Bitil (pag-ingarnan diman Lus), maglawuy inda sa Atarut nu naan mag-uli ti manga Arkiyu,

³ ag palus-ug inda sa isalpan atabug sa rugar manga Haplitiyu tugka sa katapusan ababa baliwa Bit Hurun. Ag parargu inda sa Gisir tugka sa Dagat Miditiranyu.

⁴ Imaw inda ti natanggap pag bahagi manga lahi ni Manasis ag ni Ipraim manga lahi ni Husi.

⁵ Inda ti bahagi lahi ni Ipraim angay sa hinuray sa kada magtal-anakan: kay katugkaan inda sa butlakan ginan sa Atarut Adar ag atabug sa babaw baliwa Bit Hurun

⁶ tugka sa Dagat Miditiranyu. Kay katugkaan sa kanaway ginan sa Mikmitat ag paliku sa butlakan sa Taanat Silu, ag maglawuy sa butlakan Hanwa.

⁷ Ag ginan sa Hanwa palus-ug inda sa Atarut ag Naara, bag-u maglakaw sa Hiriku atabug sa Sapa Hurdan.

⁸ Ginan sa Tapwa, kay katugkaan atabug sa isalpan, bag-u maglawuy sa Luung Kana tugka sa Dagat Miditiranyu. Imaw inda ti daga ipinakaun sa lahi ni Ipraim hinuray angay sa kada magtal-anakan.

⁹ Kaibahan sitay ti iba ka manga banwa ag manga baryu sakup daga manga lahi ni Manasis.

¹⁰ Unman nida pinalayas ti manga Kananiyu mag-uli sa Gisir; nakan may manga Kananiyu mag-uli kaibahan sa manga taga Ipraim tugka kainda, nakan binwat sida manga panawuhun.