Huswi 15 - Hanunuu

Ti Ipinakaun pag Daga sa Lahi ni Huda

¹ Inda pag daga ti natanggap lahi ni Huda, hinuray angay sa kada magtal-anakan: Ti daga aput tugka sa katugkaan Idum sa salatan, sa katugkaan gid pangawakawaan Sin.

² Ti katugkaan inda pag daga sa salatan ginan sa abagatnan Dagat Namatay

³ atabug sa kanaway Patukad sa Akrabim tugka sa pangawakawaan Sin. Aput inda sa salatan baliwa Kadis Barnia ag maglawuy sa Hisrun patukad sa Adar. Linmiku inda atabug sa Karka,

⁴ atabug sa Asmun, bag-u sa Luung Ihiptu tugka sa Dagat Miditiranyu. Imaw tunda ti katugkaan Huda sa salatan.

⁵ Kay katugkaan sa butlakan ti Dagat Namatay tugka sa luluwangan danum Sapa Hurdan. Kay katugkaan sa kanaway ati ginan sa luluwangan danum Sapa Hurdan

⁶ patukad sa Bit Hugla, ag atabug sa kanaway Bit Araba patukad sa Batu ni Buhan anak ni Rubin.

⁷ Ati ginan, atabug inda sa Karatagan Akur tugka sa Dibir, ag linmiku sa kanaway atabug sa Gilgal masranguhan sa Tukadun Adunim sa salatan baliwa luung. Ag aput inda sa manga bulbugan In Simis ag paluwas sa In Rugil.

⁸ Siyun ginan, atabug sa Luung Bin Hinum tugka sa salatan sa lus-ugun banwa manga Hibusiyu. (Pag-ingarnan diman inda Hirusalim.) Bag-u patukad sa katayungtungan bantud, sa isalpan Luung Bin Hinum, sa may katugkaan sa kanaway Karatagan Ripaim.

⁹ Siyun ginan, atabug inda sa Bulbugan Niptuwa, bag-u paluwas sa manga banwa arani sa Bantud Iprun. Bag-u palus-ug inda sa Baala (pag-ingarnan diman Kiryat Harim),

¹⁰ ag paliku sa isalpan baliwa sa Baala atabug sa Bantud Siir. Bag-u atabug inda sa kanaway sa lus-ugun Bantud Harim (pag-ingarnan diman Kisalun), atabug sa Bit Simis bag-u maglawuy sa Timna.

¹¹ Ati ginan parargu inda sa kanaway palus-ug sa Ikrun ag paliku atabug sa Sikirun, bag-u maglawuy sa Bantud Baala tugka sa Habniil. Kay katugkaan inda ti Dagat Miditiranyu,

¹² inda diman kay katugkaan sa isalpan. Inda ti manga katugkaan sa sangput daga hinuray sa manga magtal-anakan lahi ni Huda.

Ti Ipinakaun pag Daga sa kan Kalib

¹³ Sinugu Panginuun si Huswi pakan-an niya ti usa ka bahagi daga lahi ni Huda sa kan Kalib anak ni Hipuni. Inda pag daga ti Kiryat Arba, imaw yi ti Hibrun. (Iningarnan inda Arba kay ama ni Anak.)

¹⁴ Pinalayas ni Kalib sa ati pag daga ti tulu ka lahi ni Anak ti magtal-anakan ni Sisay, ni Ahiman ag ni Talmay.

¹⁵ Siyun ginan rargu ginira nida ti Dibir (pag-ingarnan Kiryat Sipir kaybi).

¹⁶ Magkun si Kalib, “Ipaasawa niku kang anak si Aksa sa tawu makatalu ngatay makasakup sa Kiryat Sipir.”

¹⁷ Si Utniyil anak ni Kinas kay patar-ari ni Kalib imaw ti nakaagaw sa banwa. Nakan ipinaasawa ni Kalib sa kanya kay anak si Aksa.

¹⁸ Pagka mag-asawa yi sida, sinabihan ni Aksa kay asawa kuntay manhagad sida dugang pag daga sa kay ama. Bag-u nag-atag si Aksa sa kan Kalib, ag pagka magdugsun yi siya sa kay asnu, pinaingana siya ni Kalib nu hintay kay kailangan.

¹⁹ Sinmagut si Aksa, “Pakan-i aku pahintulut. Gustu mana niku pakan-i nimu aku manga daga may bulbugan, dahil kanmu ipinakaun pag daga sa kangku sa Nigib unman may bulbugan.” Nakan ipinakaun ngani ni Kalib sa kanya ti rugar may bulbugan sa babaw hanggan sa lawud.

Ti manga Banwa Huda

²⁰ Inda ti manga banwa natanggap lahi ni Huda hinuray angay sa kada magtal-anakan:

²¹ Ti manga banwa sa salatan, sa suru Nigib arani sa katapusan Idum: Kabsiil, Idir, Hagur,

²² Kina, Dimuna, Adada,

²³ Kadis, Hasur, Itnan,

²⁴ Sip, Tilim, Bialut,

²⁵ Hasur Hadata, Kiryut Hisrun (imaw diman ti Hasur),

²⁶ Amam, Sima, Mulada,

²⁷ Hasar Gada, Hismun, Bit Pilit,

²⁸ Hasar Suwal, Biirsiba, Bisyutya,

²⁹ Baala, Iim, Isim,

³⁰ Iltulad, Kisil, Hurma,

³¹ Siklag, Madmana, Sansana,

³² Libaut, Silhim, Ayin, ag Rimun — 29 tanan ka banwa, kaibahan yi ti manga baryu sa kay sangput.

³³ Ti manga banwa sa manga tagudtud sa isalpan: Istaul, Sura, Asna,

³⁴ Sanwa, In Ganim, Tapwa, Inam,

³⁵ Harmut, Adulam, Suku, Asika,

³⁶ Saaraim, Aditaim, Gidira (ngatay Gidirutaim) — 14 banwa tanan, kaibahan ti manga baryu sa kay sangput.

³⁷ Ti Sinan, Hadasa, Migdal, Gad,

³⁸ Dilyan, Mispa, Huktiil,

³⁹ Lakis, Buskat, Iglun,

⁴⁰ Kabun, Lamas, Kitlis,

⁴¹ Gidirut, Bit Dagun, Naama ag Makida — 16 ka banwa tanan, kaibahan ti manga baryu sa kay sangput.

⁴² Ti Libna, Itir, Asan,

⁴³ Ipta, Asna, Nisib,

⁴⁴ Kayla, Aksib, ag Marisa — 9 ka banwa tanan, kaibahan ti manga baryu sa kay sangput.

⁴⁵ Ti Ikrun ag ti manga banwa ag ti baryu sa sangput inda,

⁴⁶ ag ti tanan banwa ag manga baryu arani sa Asdud ginan sa Ikrun atabug sa Dagat Miditiranyu.

⁴⁷ Ti Asdud ag ti Gasa, kaibahan kanda manga banwa ag manga baryu tugka sa Luung Ihiptu hanggan baybay Dagat Miditiranyu.

⁴⁸ Ti manga banwa sa kabantudan: Samir, Hatir, Suku,

⁴⁹ Dana, Kiryat Sana (imaw diman ti Dibir),

⁵⁰ Akab, Istimu, Anim,

⁵¹ Gusin, Hulun, ag Gilu — 11 ka banwa tanan, kaibahan ti manga baryu sa kay sangput.

⁵² Ti Arab, Duma, Isan,

⁵³ Hanim, Bit Tapwa, Apika,

⁵⁴ Humta, Kiryat Arba (imaw diman ti Hibrun), ag Siur — 9 ka banwa tanan, kaibahan ti manga baryu sa kay sangput.

⁵⁵ Maun, Karmilu, Sip, Huta,

⁵⁶ Hisriil, Hukdiyam, Sanwa,

⁵⁷ Kain, Gibiya, ag Timna — 10 ka banwa tanan, kaibahan ti manga baryu sa kay sangput.

⁵⁸ Ti Halhul, Bit Sur, Gidur,

⁵⁹ Maarat, Bit Anut, ag Iltikun — 6 ka banwa tanan, kaibahan ti manga baryu sa kay sangput.

⁶⁰ Ti Kiryat Baal (imaw diman ti Kiryat Harim) ag ti Raba — 2 ka banwa, kaibahan ti manga baryu sa kay sangput.

⁶¹ Ti manga banwa sa pangawakawaan: Bit Araba, Midin, Sikaka,

⁶² Nibsan, ti Banwa Asin ag ti In Gidi — 6 ka banwa, kaibahan ti manga baryu sa kay sangput.

⁶³ Dapat unman magkapaalis lahi Huda ti manga Hibusiyu mag-uli sa Hirusalim. Nakan tugka kainda ati di sida mag-uli kaibahan ti nasakupan Huda.