Huswi 14 - Hanunuu

Ti Pag-ayaw-ayaw Daga sa Isalpan Hurdan

¹ Inda ti pag-ayaw-ayaw iba waya pag manga daga sa Kanaan sa manga Israilita. Hinuray inda ni manughandug Iliyasar, ag ni Huswi anak ni Nun, hanggan manga takinan manga magtal-anakan kada linahi Israil.

² Angay sa isinugu Panginuun sa kan Muysis, ti manga daga hinuray sa siyam may tunga ka lahi sa panab-anan lunggungan.

^3-4 Ipinakaun yi ni Muysis sa duwa may tunga ka lahi kanda bahagi sa butlakan Hurdan. (Kay lahi ni Husi tinunga sa duwa ka lahi — kay lahi ni Manasis ag kay lahi ni Ipraim.) Unman pinakan-an daga kay manga lahi ni Libi, dapat pinakan-an sida manga banwa kanda ulianan hanggan manga padang para sa kanda manga hayup.

⁵ Katunda ti paghuray-huray manga daga sa manga Israilita angay sa isinugu Panginuun sa kan Muysis.

Ipinakaun sa kan Kalib ti Hibrun

⁶ Ati katpung nag-atag sa kan Huswi sa Gilgal ti pira ka tawu ginan sa lahi ni Huda. Kay usa inda si Kalib anak ni Hipuni usa ka Kinisiyu. Magkun siya sa kan Huswi, “Magkaala-ala aw waya nimu ti sinabi Panginuun sa kan Muysis, ti suruguun Diyus, tungkul sa kanta duwa katpung ati kita sa Kadis Barnia?

⁷ 40 di waya ati katpung kang idad pagka sinugu aku ni Muysis ginan sa Kadis Barnia hampay mantiid sa daga Kanaan. Ag sa kang pagbalik, sinabi niku sa kanya nu hintay ti sa kang isip tungkul sa daga.

⁸ Dapat pinadala niku manga kaibahan kanta manga kasimanwa. Dapat aku inda, matapat nagsunud sa Panginuun niku Diyus.

⁹ Nakan sa tunda pag sirang nagtaratu si Muysis sa kangku. Sinabi niya, ‘Dahil matinupadun kawu sa Panginuun niku Diyus, kanmu yi hanggan nimu manga lahi ti inatagan nimu pag daga katpung nantiid kawu.’

¹⁰ “45 yi ka timpu ti nakalawuy pagka sinabi tunda Panginuun sa panab-anan ni Muysis. Maglakaw di waya ati katpung ti manga Israilita sa pangawakawaan. Taynguna 85 yi kang idad ag buhi waya aku sa awat Panginuun angay sa kay itinaratu.

¹¹ Kang kabisugan parihu diman ga kaybi pag panahun kay nagsugu ni Muysis sa kangku. Kumaya waya aku gumira parihu sa kabag-u.

¹² Nakan mahimu yi aw ipakaun sa kangku inda pag kabantudan ti itinaratu sa kangku kaybi Panginuun. Kawu yi ngap ti nakadnug kaybi, ti manga lahi ni Anak mag-uli ati ag marig-un kanda manga banwa may manga alad batu. Dapat sa awat Panginuun palayasun niku sida sa tunda pag daga angay sa itinaratu niya sa kangku.”

¹³ Bag-u pinapaladan ni Huswi si Kalib anak ni Hipuni. Ipinakaun sa kanya ti Hibrun bilang kay maranahun.

¹⁴ Nakan tugka kainda, ti Hibrun magkaapu manga lahi ni Kalib anak ni Hipuni usa ka Kinisiyu, dahil tapat sinunud ni Kalib ti Panginuun Diyus Israil.

¹⁵ Kaybi Kiryat Arba kay ngaran Hibrun, bilang alaala sa kan Arba, ti pinakabantug sa manga lahi ni Anak. Tunda ginan, inmapas yi ti maggirirahan sa daga manga Israilita.