Huswi 11 - Hanunuu

Natalu manga Israilita ti manga Rugar sa Amihanan

¹ Pagka nabaritaan ni Habin hari Hasur, ti manga pagpanalu manga Israilita, nanpadara siya tultulanun sa inda pag manga hari: sa kan Hari Hubab sa Madun, sa manga hari Simrun ag Aksap,

² sa manga hari sa kabantudan sa amihanan, sa manga hari sa karatagan Hurdan sa abagatnan Danaw Galiliya, sa manga hari sa manga tagudtud sa isalpan, sa manga hari sa baybay Dur sa isalpan,

³ sa manga hari manga Kananiyu sa butlakan hanggan sa isalpan Sapa Hurdan, sa manga hari manga Amuriyu, Hitiyu, Pirisiyu, Hibusiyu mag-uli sa kabantudan, ag sa manga hari manga Hibiyu mag-uli sa arani Bantud Hirmun sa daga Mispa.

⁴ Rinmas-ug inda tanan pag manga hari, kaibahan kanda manga sundalu kanda kayamuun parihu sa baras baybay. Mayamu gid kanda manga kabayu hanggan manga kalisa.

⁵ Nagkausa inda pag manga hari ag nagkampu sa saruy Sapa Mirum hampay lumaban sa Israil.

⁶ Magkun ti Panginuun sa kan Huswi, “Danga kamu magkadala sa kanda, dahil aldaw sa kainda diman pag udas, panmatyun niku sida tanan para sa Israil. Pilayi niyu kanda manga kabayu, ag sunuga kanda manga kalisa.”

⁷ Nakan kadaka nan-gira si Huswi hanggan kay manga sundalu ati sa Sapa Mirum.

⁸ Ag ipinanalu sida Panginuun sa kanda manga kalaban. Binukad nida kanda manga kalaban tugka sa Daka Sidun ag sa Misriput Mayim, hanggan tugka sa Ratag Mispa sa butlakan init. Tinabu gid nida minatay kanda manga kalaban.

⁹ Bag-u binwat ni Huswi sa kanda ti pag-isugu Panginuun: pinamilay niya kanda manga kabayu ag pinangirub kanda manga kalisa.

¹⁰ Pagkatapus binmalik sida ni Huswi sa Hasur ag sinakup nida inda ag minatay kanda hari. (Ti Hasur imaw ti pinakamakapangyarihan pag kaharian ati katpung.)

¹¹ Pinanmatay diman nida ti tanan mag-uli sa Hasur. Ipinadamhak nida inda lubus, unman gid may nasawad buhi. Ag inirub nida ti banwa.

¹² Nasakup nida ni Huswi inda tanan pag banwa. Pinanmatay nida ti tanan mag-uli ati, hanggan kanda manga hari. Pinadamhak nida inda lubus angay sa isinugu ni Muysis suruguun Panginuun.

¹³ Dapat unman sinunug manga Israilita ti manga banwa sa manga kabantudan, purya sa Hasur.

¹⁴ Pinanbuul manga Israilita ti tanan kasiyunan ag manga hayup sa inda pag banwa. Dapat pinanmatay nida ti tanan mag-uli ati, ag unman gid may nasawad buhi.

¹⁵ Imaw tunda ti isinugu Panginuun sa kan Muysis kay buwatun, ag isinugu maan ni Muysis sa kan Huswi. Tinupad gid ni Huswi ti tanan isinugu Panginuun sa kan Muysis.

¹⁶ Nakan sinakup ni Huswi ti buu daga: ti kabantudan, ti tanan daga sa Nigib, ti tanan daga sa Gusin, ti manga tagudtud sa isalpan, ti Karatagan Hurdan, hanggan ti manga kabantudan ag manga tagudtud Israil.

¹⁷ Ti sinakup niya pag rugar ginan sa Bantud Halak patukad sa Siir tugka sa Baal Gad sa Ratag Libanun sa arani Bantud Hirmun. Dinakup niya ag minatay ti manga hari inda pag manga rugar

¹⁸ sa dugay pag girirahan nida.

¹⁹ Unman may nagbuwat kasunduan sa manga Israilita purya lang sa manga Hibiyu mag-uli sa Gibyun. Kay iba inda, tinalu nida sa labanan.

²⁰ Dahil pinaganit Panginuun kanda tagipusuun hampay lumaban sida sa manga Israilita, hampay mapapas sida lubus ag matyun unman may awa, angay sa isinugu Panginuun sa kan Muysis.

²¹ Sa tunda diman pag panahun, ginira ni Huswi ti manga lahi ni Anak mag-uli sa kabantudan Hibrun, Dibir, Anab, hanggan sa tanan kabantudan Huda ag Israil. Rinuris ni Huswi sida tanan hanggan kanda manga banwa.

²² Udyi may manga lahi si Anak nasawad sa sakup manga Israilita, dapat may nasawad waya sa kanda sa Gasa, sa Gat, ag sa Asdud.

²³ Nakan sinakup ni Huswi ti buu daga, angay sa isinugu Panginuun sa kan Muysis. Ipinakaun inda ni Huswi sa manga Israilita bilang kanda maranahun, ag hinuray nida inda angay sa kada lahi nida. Tunda ginan, inmapas yi ti girahan sa tunda pag daga.