Huswi 10 - Hanunuu

Tinalu Israil ti manga Hari sa Salatan

¹ Nabaritaan ni Aduni Sidik, hari sa Hirusalim, kuntay inagaw ni Huswi ti Hay ag pinadamhak niya inda lubus, minatay kay hari parihu sa binwat niya sa Hiriku hanggan sa kay hari. Nabaritaan diman niya ti manga taga Gibyun nagbuwat kasunduan sa manga Israilita ag nangulian kaibahan nida.

² Nadala gid siya hanggan kay manga nasakupan dahil alam nida ti Gibyun usa ka makapangyarihan pag banwa may sadili hari. Ag mas daka waya inda sa Hay ag kay manga sundalu antigu sa labanan.

³ Nakan nanpadara barita si Aduni Sidik tabug sa kan Hari Huham sa Hibrun, sa kan Hari Piram sa Harmut, sa kan Hari Hapya sa Lakis, ag sa kan Hari Dibir sa Iglun.

⁴ Inda kay pagsabihun: “Awati niyu aku sa paggira sa Gibyun dahil nagbuwat sida kasunduan sa kan Huswi ag sa manga Israilita.”

⁵ Nakan nagkarausa inda pag lima ka hari Amuriyu: ti hari Hirusalim, Hibrun, Harmut, Lakis, ag Iglun. Tinipun nida kanda manga sundalu ag ginira ti Gibyun.

⁶ Nanpadara barita ti manga taga Gibyun sa kan Huswi ati sa kanda kampu sa Gilgal. Magkun sida, “Danga kami pagpabay-ani kanmu manga suruguun. Pag-ataytag kamu kainda ag ribrihan kami. Awati kami dahil pag-arawatanan kami tanan hari Amuriyu mag-uli sa kabantudan.”

⁷ Nakan linmakaw si Huswi kaibahan ti tanan niya manga sundalu, hanggan ti tanan antigu maggira.

⁸ Magkun ti Panginuun sa kan Huswi, “Danga kawu magkadala sa kanda. Pag-ipakaun niku sida sa kanmu manga kamang. Unman may una usa sa kanda ti tumalu sa kanmu.”

⁹ Buu yabi maglakaw sida ni Huswi ginan sa Gilgal, ag ginira nida ti manga kalaban unman may nakamatang.

¹⁰ Pinadikla Panginuun ti manga kalaban pagka nakakit sida sa manga Israilita, ag mayamu ti pinanmatay sa kanda ati sa Gibyun. Kay iba sa kanda linagas ag minatay manga Israilita sa dalan patukad sa Bit Hurun tugka sa Asika ag Makida.

¹¹ Diritsu ti lagas manga Israilita sa kanda habang palus-ug sida ginan sa Bit Hurun. Ag pagka atabug sida sa Asika, pinauranan sida Panginuun daraka pag manga yilu ag nagkaramatay sida. Mas mayamu waya ti nagkaramatay sa kanda sa yilu kaysa baladaw manga Israilita.

¹² Katpung sirang pinapanalu Panginuun ti manga Israilita sa manga Amuriyu, nandarangin si Huswi sa Panginuun. Bag-u magkun siya mintaras magpatingi ti manga Israilita, “Init, pagpat-ung kawu sa tungud Gibyun! Bulan, pagpat-ung sa tungud Luung Ayalun.”

¹³ Nakan pinmat-ung ngani ti init hanggan ti bulan tugka sa natalu manga Israilita kanda manga kalaban. Inda pag manga nangyari nakasurat sa Ribru ni Hasar. Pinmat-ung ti init sa karaw-an langit, ag unman inda nisangday sa buu sirang.

¹⁴ Unman waya gid may nangyari ga kainda kaybi ginan sa kabag-u, nagsagut ti Panginuun sa darangin tawu parihu sa inda. Tutuu gid nanlaban ti Panginuun para sa Israil.

¹⁵ Bag-u binmalik si Huswi ag ti tanan Israilita sa kanda kampu sa Gilgal.

Minatay ti Lima ka Hari manga Amuriyu

¹⁶ Nakapalagiw ti lima ka hari ag napatagu sa lukib Makida.

¹⁷ Dapat may nakakit sa kanda ati pag napatagu, ag isinabi nida sa kan Huswi.

¹⁸ Nakan magkun si Huswi, “Tabuni niyu daraka pag manga batu ti tangpaan lukib bag-u kanyu paguwardiyahan.

¹⁹ Dapat danga kamu magpirmaminti ati nu unman lagsa niyu ag giraha ti nasawad pag manga kalaban. Danga pagpahintuluti niyu makasulud sida sa kanda manga banwa. Dahil ipatalu sida sa kanyu Panginuun niyu Diyus.”

²⁰ Harus tabu minatay ni Huswi hanggan manga Israilita kanda manga kalaban. Dapat may imaw waya gid nakaribri ag nakasulud sa kanda manga banwa may alad batu.

²¹ Bag-u nagbalik ti tanan sundalu sa kan Huswi sa kampu nida sa Makida. Tunda ginan, udyi may magkaibug magbagaw laban sa manga Israilita.

²² Taynguna, nagsugu si Huswi, “Bukasi niyu ti lukib ag daraha sitaay sa kangku ti lima ka hari.”

²³ Nakan ipinalwas nida sa lukib ti lima ka hari: ti hari Hirusalim, Hibrun, Harmut, Lakis, ag Iglun.

²⁴ Pagka nadara yi inda pag lima ka hari sa kan Huswi, tinipun ni Huswi ti tanan Israilita ag magkun siya sa manga kumandir niya manga sundalu, “Abala kamu, tat-i niyu inda pag manga li-ug hari.” Nakan napakarani ngani sida ag tinat-an nida tunda pag li-ug manga hari.

²⁵ Magkun si Huswi sa kanda, “Danga kamu magkadala ngatay magpanlumuy. Pagpakarig-un kamu ag pagpakatutum. Katida ngani ti buwatun Panginuun sa tanan niyu manga kalaban.”

²⁶ Bag-u minatay ni Huswi ti lima ka hari ag ibinitin sa lima ka puun kayu tugka malambung.

²⁷ Pagka nisangday yi ti init, ipinab-ul ni Huswi kanda manga bangkay ag ipinayamut sa nagpatag-an nida pag lukib. Bag-u tinakbunan daraka pag manga batu ti tangpaan lukib. Inda pag manga batu asan di kainda tugka.

Sinakup ni Huswi ti Iba waya pag manga Rugar manga Amuriyu

²⁸ Sa ati pag sirang, sinakup ni Huswi ti Makida. Pinanmatay niya ti tanan mag-uli ati, hanggan kanda hari. Pinadamhak niya inda lubus, ag unman gid may nasawad buhi. Binwat ni Huswi sa hari Makida ti binwat niya sa hari Hiriku.

²⁹ Ginan sa Makida, nag-atag si Huswi hanggan ti manga Israilita sa Libna bag-u ginira nida inda.

³⁰ Ipinakaun diman Panginuun sa kanda inda pag banwa hanggan kay hari. Pinanmatay nida ti tanan mag-uli ati, ag unman gid may nasawad buhi. Binwat ni Huswi sa hari Libna ti binwat niya sa hari Hiriku.

³¹ Ginan sa Libna, nag-atag si Huswi hanggan ti manga Israilita sa Lakis. Pinalibutan nida inda ag ginira.

³² Ipinakaun Panginuun ti Lakis sa manga Israilita sa ikadwa pag sirang labanan. Parihu sa kanda binwat sa Libna, pinanmatay nida ti tanan mag-uli sa Lakis.

³³ Mintaras paggirahun ti Lakis, si Huram, ti hari Gisir, hanggan kay manga sundalu nangawat sa Lakis, dapat tinalu diman ni Huswi sida, ag unman gid may nasawad buhi sa kanda.

³⁴ Ginan sa Lakis, nag-atag si Huswi hanggan ti manga Israilita sa Iglun. Pinalibutan diman nida inda ag ginira.

³⁵ Sa ati mismu pag sirang, nasakup nida ti Iglun ag pinanmatay ti tanan mag-uli ati. Pinadamhak nida inda lubus parihu sa kanda binwat sa Lakis.

³⁶ Ginan sa Iglun, tinmukad si Huswi hanggan ti manga Israilita sa Hibrun bag-u ginira nida inda.

³⁷ Inagaw nida ti banwa, bag-u minatay nida ti hari hanggan ti tanan mag-uli ati, hanggan diman ti manga tawu sa sangput baryu sakup Hibrun. Unman gid may nasawad buhi. Pinadamhak nida lubus ti banwa parihu sa kanda binwat sa Iglun.

³⁸ Siyun ginan, linmus-ug si Huswi hanggan ti manga Israilita bag-u ginira ti Dibir.

³⁹ Inagaw nida ti banwa ag minatay ti hari ag ti tanan mag-uli ati, hanggan ti manga tawu sa sangput baryu sakup Dibir. Pinadamhak nida inda lubus, ag unman gid may nasawad buhi. Ti binwat nida sa Hibrun ag Libna hanggan sa kanda manga hari binwat diman nida sa Dibir ag sa kay hari.

⁴⁰ Nakan nasakup ni Huswi ti buu daga — ti manga kabantudan, ti Nigib, ti manga tagudtud sa isalpan, hanggan sa lawud pag manga kabantudan, kaibahan kanda manga hari. Rinuris nida ti tanan mag-uli ati, ag unman gid may nasawad buhi. Binwat nida inda angay sa sugu Panginuun, ti Diyus Israil.

⁴¹ Sinakup ni Huswi ti manga rugar ginan sa Kadis Barnia tugka sa Gasa, ag ginan sa buu daga Gusin tugka sa Gibyun.

⁴² Sinakup ngani ni Huswi inda tanan pag manga daga hanggan kanda manga hari sa usa lang ka dasun-dasun paggira, dahil ti Panginuun, ti Diyus Israil, nangawat sa kanda sa paglaban.

⁴³ Pagkatapus nuli si Huswi hanggan ti manga Israilita sa kanda kampu sa Gilgal.