Huswi 1 - Hanunuu

Ti Pag-alistu hampay Sakupun ti Kanaan

¹ Pagka namatay yi si Muysis kay suruguun Panginuun, magsabi ti Panginuun sa kaawat ni Muysis, sa kan Huswi anak ni Nun,

² “Namatay yi si Muysis kang suruguun. Nakan taynguna pag-alistu yi kamu, kawu hanggan ti tanan Israilita, sa pagdipay sa Sapa Hurdan atabug sa daga kang ipakaun sa kanyu.

³ Angay sa kang itinaratu sa kan Muysis, kang ipakaun sa kanyu ti tanan daga kanyu maatihan.

⁴ Inda kanyu katugkaan ulian: ginan sa pangawakawaan sa salatan tugka sa kabantudan Libanun sa kanaway, ag ginan sa daka Sapa Iyupratis sa butlakan tugka sa Dagat Miditiranyu sa isalpan, hanggan ti daga manga Hitiyu.

⁵ “Unman may makatalu sa kanmu habang buhi kawu, dahil ibahan niku kawu parihu sa kang nag-iba sa kan Muysis. Balaw niku kawu tayakan ag pabay-anan.

⁶ Pagpakarig-un ag pagmatutum kawu, dahil kawu ti pumanguna sa inda pag nasakupan sa pagsakup sa daga kang itinaratu ipakaun sa kanda manga ginurang.

⁷ Basta pagpakarig-un lang kawu hanggan pagmatutum gid kanmu naisipan. Sunda gid nimu kaayad ti tanan kasuguan ipinakaun sa kanmu ni Muysis kang suruguun. Danga gid nimu inda pagkalimti, hampay marapanalu kawu sa tanan nimu pagbuwatun.

⁸ Danga gid pagkalimti basahun ti ribru Kasuguan. Isip-isipa nimu inda sirang yabi, hampay maalaman nimu nu kabitay matupad nimu ti tanan nakasurat asan. Sa panab-anan inda bumaliw abunda kanmu kahamtangan ag marapanalu kawu.

⁹ Alalahana nimu inda kang manga bilin sa kanmu: ‘Pagpakarig-un kawu hanggan pagkatutum. Danga kawu magkadala ngatay maglumuy, dahil aku, ti Panginuun kanmu Diyus, kaibahan nimu una naan tag kawu.’ ”

¹⁰ Nakan sinugu ni Huswi ti manga takinan Israil,

¹¹ “Palibuta niyu ti kampu bag-u sabihi ti manga tawu pag-alistu sida kanda manga karan-unun dahil sa ikatlu pag sirang kainda ginan, mandipay kita sa Sapa Hurdan hampay apuun ti daga pag-ipakaun Panginuun nita Diyus sa kanta.”

¹² Bag-u magkun si Huswi sa manga lahi ni Rubin, ni Gad, hanggan sa katunga lahi ni Manasis,

¹³ “Alalahana niyu ti sinabi sa kanyu ni Muysis suruguun Panginuun. Magkun siya pakan-an kamu Panginuun niyu Diyus kahusayan hanggan daga niyu maulianan. Ag imaw yi inda pag daga ti ipinakaun niya sa kanyu:

¹⁴ ti butlakan baliwa Sapa Hurdan. Pumirmaminti sitay kanyu manga asawa hanggan manga anak bag-u manga hayup. Dapat kanyu manga sundalu kailangan pumanguna sa pagdipay sa Hurdan hampay awatan kanyu manga patar-ari,

¹⁵ tugka sa matanggap nida ti kaariwayahan ginan sa Panginuun parihu sa natanggap niyu, ag masakup nida ti daga pag-ipakaun sa kanda Panginuun nita Diyus. Bag-u mahimu yi kamu makabalik sitay sa butlakan baliwa Hurdan, hampay apuun ti daga ipinakaun sa kanyu ni Muysis ti suruguun Panginuun.”

¹⁶ Sinmagut sida sa kan Huswi, “Tupadun nimi ti tanan nimu pag-isugu sa kanmi una naan tabug pag suguun nimu kami.

¹⁷ Sumunud kami sa kanmu parihu sa kanmi magsunud sa kan Muysis, basta mangiba sa kanmu ti Panginuun nimu Diyus parihu sa kay nag-iba sa kan Muysis.

¹⁸ Matyun una si unu ti balaw sumunud sa kanmu hanggan ti lumabag sa kanmu manga sugu. Pagpakarig-un ag pagmatutum lang duy kawu!”