Hunas 4 - Hanunuu

Nagalit si Hunas sa Pangaawa Panginuun

¹ Pag-ikadaut gid ni Hunas dahil pinatawad Panginuun ti taga Ninibi, magkaisug gid siya.

² Magkun siya sa Panginuun sa kay magdarangin, “Ungud gid, Panginuun, balaw gid aku nagsalan sa sinabi niku katpung ati di waya aku sa kanmi rugar, kanmu di ngani kaawaan ti manga taga Ninibi nu mansisi sida, dahil alam niku maawaun kawu ag mapinasunaidun pag Diyus. Mapagmahal kawu ag balaw susun magkagalit. Ag alistu magbag-u kanmu isip balaw mamadara parusa. Tunda ngani kay dahilan nu hayga napatagu aku atabug sa Tarsis.

³ Nakan Panginuun, bul-a yi lang kang buhi, dahil mayad waya ti namatay yi lang aku kaysa mabuhi waya.”

⁴ Sinmagut ti Panginuun, “Pag-ikagalit gid aw lugud nimu kang binwat sa Ninibi?”

⁵ Linmuwas sa banwa si Hunas bag-u tinmukaw baliwa sa butlakan. Nagbuwat siya parasirngan ag napahamuy ati habang mag-alagad nu hintay ti mangyari sa banwa.

⁶ Dapat magkainitan di si Hunas, nakan pinatubu Panginuun Diyus ti usa ka halaman langbaw tawu kay abwat hampay mahamuyan siya. Ikinabaya gid ni Hunas tunda pag halaman.

⁷ Dapat igu surip, ipinakaun Diyus sa basul tunda pag halaman ag narubay.

⁸ Pagka sinminggit ti init, pinahuyup Diyus ti mainit pag durus ginan sa butlakan. Ga malipung si Hunas pagka nasinggitan init kay ulu. Gustu niya mamatay yi lang, nakan magkun siya, “Mayad waya ti namatay yi lang aku kaysa mabuhi waya.”

⁹ Magkun ti Diyus sa kanya, “Pag-ikagalit gid aw lugud nimu dahil sa nangyari sa halaman?” Sinmagut siya, “Hu, pag-ikagalit gid niku, nakan mayad waya ti namatay yi lang aku.”

¹⁰ Magkun sa kanya ti Panginuun, “Maghinayang ngani kawu sa siti pag halaman tinmubu sa sulud usa lang ka yabi ag rargu narubay sa sulud diman usa ka yabi, lang madi balaw kawu ti nagtanum ngatay ti nagpatubu.

¹¹ Aku aw waya abi ti dayu manhinayang sa daka pag banwa Ninibi subra sa 120,000 tawu unman may alam tungkul sa kang manga kasuguan, bag-u may mayamu waya pag manga hayup?”