Hunas 3 - Hanunuu

Nag-atag si Hunas sa Ninibi

¹ Nagbagaw maan ti Panginuun sa kan Hunas.

² Magkun siya, “Pag-ati kawu kainda sa Ninibi, ti daka pag banwa, bag-u sabiha nimu sa manga taga ati ti pag-ipatultul niku sa kanmu.”

³ Rargu nag-atag si Hunas sa Ninibi angay sa kay sinabi Panginuun. Daka pag banwa ti Ninibi; manga tulu ka sirang inda nu lakawun.

⁴ Nagsulud si Hunas sa Ninibi. Pagka natapus ti usa ka sirang lalakawun, magkun siya sa manga taga ati, “May 40 wadi ka sirang ti magkasawad rurisun yi ti Ninibi!”

⁵ Naniwala ti manga taga Ninibi sa inda pag tultulanun ginan sa Diyus. Tanan-tanan sida, ginan sa pinakabantug tugka sa pinakapugri, nanrutay saku ag nanrukuan hampay ipakakit kanda magsisi.

⁶ Pagka nadnugan hari ti tungkul sa tultulanun ni Hunas, tinmindug siya ginan sa kay tukawan hari ag linukas niya kay kulimpay, bag-u nanrutay saku, rargu tinmukaw siya sa daga hampay ipakakit kay magsisi.

⁷ Nagbuwat siya usa ka paalam sa manga taga Ninibi magkun, “Angay sa sugu hari hanggan niya manga takinan, una si unu sa kanyu danga magkaun ag mag-inum, una kanyu manga baka, manga karanidu, hanggan manga kambing.

⁸ Pagrutay saku kamu tanan, hanggan yi ti manga hayup, bag-u pangungud kamu sa darangin tabug sa Diyus. Pagpatlikud kamu sa kanyu daut pagpangabuhi hanggan sa kanyu maggiit.

⁹ Barang bumag-u waya ti naisipan Diyus ag maparaw kay masyadu pag pangagalit sa kanta ag balaw yi niya kita rurisun.”

¹⁰ Nakitan Diyus kanda binwat, nu kabitay sida napatlikud sa kanda daut pagpangabuhi. Nakan nagbag-u kay naisipan, balaw yi sida rinuris parihu sa kay sinabi kaybi.