Hunas 2 - Hanunuu

Kay Darangin ni Hunas

¹ Pagka ati sa basad tiyan isda si Hunas, nandarangin siya sa Panginuun niya Diyus.

² Magkun siya, “Panginuun, sa kang kakurian nagdangup aku sa kanmu, ag sinagut nimu aku. Sa karamatyanun pag kahamtangan naghagad aku awat sa kanmu, ag pinatingihan nimu aku.

³ Itinagbung nimu aku sa kaabasad-basadan dagat. Sinangput aku danum ag natabunan manga ipinadara nimu pag balud.

⁴ Pinalayas nimu aku sa kanmu atubangan, dapat magsarig aku makapakarani di maan sa kanmu, ati sa kanmu banal pag Balay.

⁵ Tinmagbung aku sa danum, harus malimus yi gid aku. Natakbunan aku danum, bag-u pinulhutan manga ilamnun-dagat kang ulu.

⁶ Tinmagbung aku tugka sa kaabasad-basadan dagat, ga ipinirisu aku sa kaabasad-basadan daga ud may katapusan. Dapat bin-ul di nimu aku siti ginan pag kaabasad-basadan, Panginuun niku Diyus.

⁷ Igu ga mamatay yi aku, nagdangup aku sa kanmu, Panginuun. Ag pinatingihan nimu kang darangin ati sa kanmu banal pag Balay.

⁸ Ti manga tawu magsamba sa unman may pulus pag manga diyus-diyusan balaw matinupadun sa kanmu.

⁹ Dapat aku manhandug sa kanmu may tapil kanta pasalamat. Tupadun niku kang taratu manhandug sa kanmu. Kawu, Panginuun, ti magribri!”

¹⁰ Nakan sinugu Panginuun ti isda luwaan si Hunas. Nakan ilinwa ngani isda si Hunas sa baybay.