Hunas 1 - Hanunuu

Unman Nagsunud si Hunas sa Panginuun

¹ Nagbagaw ti Panginuun sa kan Hunas kay anak ni Amitay. Magkun siya,

² “Pag-ati kawu kainda sa Ninibi, ti daka pag banwa, bag-u pasandami ti manga tawu ati, dahil aput yi sa kangku kanda kadautan.”

³ Dapat linmihus si Hunas atabug sa Tarsis hampay patagu sa Panginuun. Naglus-ug siya sa Hupa bag-u ati siya pag nakakit usa ka barku kay biyahi atabug sa Tarsis. Nakan nagpakaun siya kay piliti bag-u sinmakay sa barku kaibahan manga manugpasigu sa barku hanggan iba waya manga sakay hampay patagu siya sa Panginuun.

⁴ Pagka sida sa kalalawdan yi, nagpadara ti Panginuun mabaskug pag durus sa dagat, bag-u binmagyu mabisug tugka sa ga marangga yi ti barku.

⁵ Nakan nadala ti manga manugpasigu sa barku, bag-u nanhagad awat ti kada usa sa kanda manga diyus. Iyinmut nida kanda manga pangarga tag sa dagat hampay gumaan ti barku. Si Hunas nakadugsun yi tunda katpung atag sa sirung baliwa pag bahagi barku, napahuway siya ati ag naturug hamuuk.

⁶ Sa tunda pag udas, nag-atag sa kanya ti kapitan barku ag magkun, “Hayga kawu maturugan waya? Pagbangun yi, paghagad awat sa kanmu diyus! Barang maawa waya siya sa kanta, ag awatan niya kita hampay balaw kita mamatay.”

⁷ Tunda katpung, nagharampangan ti manga manugpasigu sa barku, “Kalibang manlunggungan kita hampay maalaman nita nu si unu kay dahilan inda pag kakurian rinmas-ug sa kanta.” Nakan nanlunggungan ngani sida, bag-u ti nabunut kay ngaran ni Hunas.

⁸ Nakan hinampang nida siya, “Mahimu aw sabihun nimu sa kanmi nu si unu gid ti pinun-an inda pag kakurian rinmas-ug sa kanta, hanggan nu hintay kanmu buruwatun ag nu naan kawu ginan. Tultulan diman sa kanmi nu hintay kanmu nasyun hanggan lahi.”

⁹ Sinmagut si Hunas, “Hibriyu aku ag magsamba aku sa Panginuun, ti Diyus sa langit ti naglalang dagat hanggan daga.”

¹⁰ Tutuu gid nadala ti manga manugpasigu sa barku dahil itinultul yi ni Hunas sa kanda kuntay napatagu siya sa Panginuun. Magkun sida sa kanya, “Balaw mayad kanmu binwat.”

¹¹ Pagka inmamat binmaskug ti bagyu, magkun ti manga manugpasigu sa barku tag sa kan Hunas, “Hintay kanmi buwatun sa kanmu hampay humubung ti dagat ag balaw kami maunu?”

¹² Sinmagut siya sa kanda, “Kabyawa niyu aku bag-u lagpakan tag sa dagat, hampay humubung ti dagat ag balaw yi kamu maunu. Dahil alam niku aku ti pinun-an nu hayga rinmas-ug inda pag mabaskug bagyu sa kanyu.”

¹³ Unman nida sinunud si Hunas, bagkus ngap, nagpakabugsay sida pabalik tag sa saruy. Dapat nakurian sida dahil nagbisug ngap lalu ti bagyu.

¹⁴ Nakan nagdangup sida sa Panginuun. Magkun sida, “Ungud gid Panginuun, magpaawa-awa kami sa kanmu, danga kami pagmatya dahil sa kanmi buwatun sa kan Hunas. Danga diman kami pagsukta sa kanmi pagmatay sa kanya balaw diman nimi pihu nu ungud nagkasala ngani siya. Dapat alam nimi inda pag nangyari angay sa kanmu nabubut-un.”

¹⁵ Nakan kinabyaw ngani nida si Hunas ag ilinagpak tag sa maghagunung dagat, bag-u naghubung yi ngani ti mabaskug pag balud.

¹⁶ Dahil siyun pag nangyari, daka gid kay paggalang manga tawu sa Panginuun. Nakan nagsagda sida tabug sa kanya ag nanaratu pumarargu sa pagsirbi hanggan pagsagda sa kanya.

¹⁷ Nagpadara ti Panginuun usa ka daka pag isda hampay humalun sa kan Hunas. Nakan hinalun siya isda, bag-u ati yi siya sa basad tiyan isda sa sulud tulu ka sirang ag tulu ka yabi.