Hudas 1 - Hanunuu

¹ Inda ti may surat si Hudas kay panawuhun ni Hisu-Kiristu, kay diman waydi patar-ari ni Santiyagu. Inda kang surat tabug sa kanyu duy, sa manga pagmayadun dahil sa kanyu pakiusa sa Diyus Ama. Kamu manga pinili Diyus ag kamu pag-ingatan ni Hisu-Kiristu.

² Pagsa kanyu gid lubus kay pangaawa, kay kahusayan hanggan kay pagmahal Diyus.

Ti Pudilun pag manga Manugtudlu

³ Mahal niku pag manga patar-ari, kang gid mana gustu magsurat tag sa kanyu tungkul sa karibrihan nita tanan. Dapat ay pilit aku sumurat pumaanyu sa kanyu hampay kanyu ingatan ti katutuuhanan tungkul sa kanta pagsarig una may manga kalaban. Inda pag katutuuhanan kas-a lang ginan iinintirga sa manga napasakup sa Diyus.

⁴ Dahil may manga tawu napalakay sa kanyu unman sida sakup sa Diyus. Binaliktad ngap nida kay pakaun Diyus kaayadan bag-u ilinubus nida kanda buwat kalukuhan. Pagdayuun nida si Hisu-Kiristu kanta ngap Pangulu ag Panginuun. Kaybi di waya sinabi yi sa Banal Kasuratan magkun, may parusa nakahanda sa kanda.

⁵ Una alam yi niyu, kang waya gustu ipaalaala inda sa kanyu kuntay irinibri Panginuun ti nasyun Israil ginan sa daga Ihiptu bag-u pagka dugay pinapas di niya ti manga unman nagsarig sa kanya.

⁶ Isipa diman niyu tunda pag manga anghil ti naglakbang sa kanda sadili kahamtangan. Tinayakan ngap nida kanda sadili kahamtangan. Sida ginapus Diyus tunda unman magkabugtas pag tarikada pinirisu sa masyadu kadudulman hanggan sa udway kaudasan sintinsiya.

⁷ Isipa diman niyu ti banwa Suduma hanggan ti banwa Gumura ag kay manga kaarani pag banwa. Nagumun diman sida sa manga mahalay pag buwat hanggan sa kalukuhan nakan sida pinarusahan sa apuy unman may katabuhan, bilang ga usa ka paalaala sa tanan tawu.

⁸ Kumun diman tunda pag manga pudilun pag manga manugtudlu. Dahil sa kanda manga tagin-up, pirmi pagpayagtingun ngap nida kanda sadili bilug, ipagpasipala nida ti kamaskihan Diyus, pagmuransahun nida ti manga makapangyarihan sa langit.

⁹ Sa kanda katpung magtalaluhan diyablu tungkul sa bangkay ni Muysis ti pangulu anghil si Mikail unman nagpanghas nagbangdan sa diyablu. Sinabi lang niya sa diyablu, “Tamyawun kawu Panginuun.”

¹⁰ Dapat tunda pag manga tawu magmuransa ngap sa unman nida magkasalman. Ti manga bagay kanda yi nataw-an parihu ga manga hayup unman may buut, imaw yi kanda paggamitun sa ikadamhak nida.

¹¹ Madala gid kanda patabgan dahil naghuwad sida sa kay ugali ni Kain. Parihu sa kan Balaam sinukmahan nida ti kadautan basta may matanggap sida kuwarta. Parihu ga kan Kura, sa kanda maglaban sida midamhak aban.

¹² Daka gid pag kakay-ahan niyu, pagbul-an yi halaga kamu sa kanda magpaminsan sa kanyu karan-an magtar-arian, dahil aranghadu sida sa magkaun. Unman sida may pag-isipun nu unman kanda lang sadili. Sida ga manga rurum pagdarahun durus dapat unman waydi may ipakaun uran. Sida ga manga puun kayu unman magburak una mana kay udas mamurak, naayit una gamut, ungud namatay yi.

¹³ Sida ga manga humbak sa dagat, pagbulwatun nida kanda kahalayan, ga manga talang pag pamgasan. Kanda patabgan pihu gid atag sa masyadu kadudulman hanggan aban.

¹⁴ Ginan sa kan Adam nagkalinahi ti manga tawu kay ikapitu si Inuk. Kaybi di waya nagpurupita diman si Inuk tungkul sa katida pag manga tawu magkun, “Malu, pagbantay kamu, magras-ug ti Panginuun, kaibahan ti manga linibu-libu pag manga anghil Diyus,

¹⁵ hampay ti tanan manga tawu pilahun ti daut ti mayad, ag hampay parusahan ti tanan unman magkilala sa Diyus, dahil sa tanan nida buwat daut ag dahil sa kanda magmuransa sa Diyus. Unman sida mag-alaala sa Diyus, unman diman magkadala sa kanya.”

¹⁶ Tunda pag manga tawu maraibgun yi lang gid sa kasiyunan, manga mag-isip lunsay makuri, udyi mag-iblag kay naisipan ginan sa kay buwat daut pag kagustuhan, manga padayaw-dayawin, madunung magpalana magbagaw hampay mab-ul lang kanda pagkaibgan.

Manga Paanyu

¹⁷ Dapat duy, mahal niku pag manga patar-ari, alalahana di niyu ti ipinurupita manga apustul nita Panginuun Hisu-Kiristu.

¹⁸ Kaybi di waya sinabi yi nida sa kanyu magkun, “Nu sa uryan uryan aban pag panahun lumutaw ti manga palalibak, manga panawuhun ngani nida sadili daut pag kagustuhan, manga unman magkadala sa Diyus.”

¹⁹ Tunda pag manga tawu imaw ti pagpun-an arawayan, ti pag-isipun nida tagipusuun angay lang sa ugali kalibutan, unman sida inulianan Ispiritu.

²⁰ Dapat pagpakarig-un ngap kamu duy sa kanyu lubus pagsarig sa Diyus. Pagdarangin kamu angay sa udyuk Ispiritu Banal.

²¹ Danga magpablag kamu sa kay pagmahal Diyus; pag-alagad kamu sa kay pangaawa nita Panginuun Hisu-Kiristu, imaw ti makapakaun sa kanta tutuu pag buhi unman may katapusan.

²² Kaawai duy niyu ti manga mag-alinlangan.

²³ Ti iba bawia niyu ga ginan sa apuy. Ti iba kaawai diman waydi niyu, dapat ay lang pagmaaman kamu barang kamu mamaliwan waydi nida kayagtingan. Una kanda manga rutay namaliwan yi kahalayan.

²⁴ Diyus lang ti makaingat sa kanyu hampay kamu balaw malagpak sa kasalanan. Mipaatubang diman niya kamu tabug sa kay kadayawan unman yi may daut kamu una di, nu ud lubus yi ngap sa kabayaan.

²⁵ Siya yi lang ti Diyus kanta Manugribri sa panab-anan nita Panginuun Hisu-Kiristu. Diyus ti may kapurihan, kadayawan, kamaskihan hanggan kapangyarihan kaybi di waya ginan sa kabag-u, una taynguna una hanggan waya aban. Amin.