Hub 9 - Hanunuu

Nagbagaw si Hub

¹ Nagsagut si Hub,

² “Tutuu kanmu pagsabihun. Dapat kabitay pag makapatutuu ti tawu unman siya may kasalanan sa atubangan Diyus?

³ Una mandibati waya siya sa Diyus sa hurusayan, dahil sa usa ka libu paingana Diyus una lang usa balaw niya masagut.

⁴ Madunung ag makamaskihan gid ti Diyus. Si unu lugud ti nanlaban sa kanya nanalu?

⁵ “Unman may kahintay-hintay pagtandugun niya ti manga bantud ag magkarup-ag inda sa kay pangagalit.

⁶ Pagtandugun niya ti daga hanggan kay patakinan inda magkahalu.

⁷ Sa kanya pag sugu, mahimu balaw diman suminggit ti init ag balaw dumuag ti manga pamgasan.

⁸ Siya lang ti makabuklad sa langit hanggan ti makapapat-ung sa humbak dagat.

⁹ Siya ti naglalang sa magmirinsanan manga pamgasan pag ingarnan Usu, Uryun, Pliyadis, hanggan manga pamgasan sa salatan baliwa.

¹⁰ Magbuwat siya manga makadululaw pag manga bagay hanggan manga lilingutan balaw kaya masalman ag bilangun.

¹¹ Nu maglawuy siya sa kang arani balaw niku siya mag-akitan hanggan mag-asaydan.

¹² Nu may gustu siya bul-un unman may makaampara sa kanya. Si unu lugud ti makariklamu sa manga pagbuwatun niya?

¹³ Balaw pag-amparahun Diyus kay pangagalit. Una ti manga kaawat daragun kay ngaran si Rahab magyuk-ub sa dala sa kanya.

¹⁴ Nakan kabitay niku baliwahan kang sadili sa Diyus? Hintay pag manga bagaw kang gamitun hampay mamirdi sa kanya.

¹⁵ Una unman aku may kasalanan, balaw niku mabaliwahan kang sadili. Ti mabwat lang niku manpaawa-awa sa Diyus kang Manughusay.

¹⁶ Una magkahampang kami ag pumasnu siya, balaw diman niku siguradu aku patingihan.

¹⁷ Dahil pinakurianan niya aku ga dinaut bagyu, ag pagdugangan waya niya kang kakurian sa unman may dahilan.

¹⁸ Bilang mabugtas yi kang arup dahil sa manga kakurian kay pag-ipaagwanta sa kangku.

¹⁹ Nu kabisugan ti paghampangan, unman may tumalu sa kanya! Nu ilakaw sa hurusayan, si unu ti humabla sa kanya?

²⁰ Una waya unman aku may kasalanan, parusahan diman aku dahil sa kang manga binagaw sa pagbaliwa niku sa kang sadili.

²¹ Una unman may alangan sa kang buhi, unman inda may pulus sa kangku taynguna. Pagkadat-an yi niku kang buhi.

²² Parihu lang waydi niya ipadamhak ti matadlung ag ti daut.

²³ Magkasari lang siya nu mamatay rargu sa kakurian ti matadlung.

²⁴ Ipiniyar niya ti kalibutan sa manga daut. Pagtakluban niya ti manga mata manughusay hampay balaw humusay sa hustu. Nu balaw siya ti magbuwat inda, si unu waya nguna?

²⁵ “Madali lang maglawuy ti manga sirang sa buhi niku; mas mabaskug waya sa manugpalagiw. Maglawuy inda unman gid may kasulungan.

²⁶ Ungud, madali maglawuy kang buhi; parihu kabisug sa usa ka mag-ibuslug pag sarakyan pandagat aw ngatay ngap ga agila magdagit karan-unun.

²⁷ Una nap-ut yi kang magdangup ag magpanrukuan ag magkasari yi aku,

²⁸ pagkulbaan di maan aku sa dala sa manga nalakawan niku pag manga kakurian. Dahil alam niku balaw niya aku kilalan-un kuntay unman may kasalanan.

²⁹ Nu sabihun niya aku may kasalanan, unman may pulus nu baliwahan niku kang sadili.

³⁰ Una waya sabunun niku kang buu bilug hampay malumpiyu aku,

³¹ italnud di maan niya aku sa malutuk pag kali, hampay una kang sadili rutay pag ikay-a aku.

³² Balaw tawu ti Diyus parihu sa kangku, unman niku siya kaya sagtun ihabla waya sa hurusayan.

³³ Mana may manab-anan sa kanmi duwa hampay may manhusay,

³⁴ mana maampara niya ti magbakul Diyus sa kangku, hampay balaw yi aku madala.

³⁵ Nu katida mahampang yi niku ti Diyus unman may pagkadalaan, dapat kainda unman waya niku inda mabwat.”