Hub 8 - Hanunuu

Nagbagaw si Bildad

¹ Sinmagut si Bildad taga Suwa,

² “Tugka kapira kawu pag magbagaw katunda? Maingay lang kawu, unman may pulus kanmu manga pagsabihun.

³ Balaw mahimu pihitun Diyus Makamaskihan ti katutuuhanan aw ngatay likuun ti katadlungan.

⁴ Nagsalan kanmu manga anak laban sa Diyus nakan ngani kailangan lang parusahan niya sida.

⁵ Dapat nu pumakarani kawu sa Diyus Makamaskihan, manhagad pangaawa sa kanya,

⁶ bag-u mangabuhi malumpiyu ag matadlung, una kainda rargu awatan niya kawu ag iuli kanmu magtal-anakan bilang pakaun sa kanmu.

⁷ Ag ti ipakaun pag kasiyunan sa kanmu subra waya kaysa kasiyunan nimu kaybi.

⁸ “Paingan-a ti manga paggurangunun. Alama nu hintay ti natandaan nida manga ginurang.

⁹ Dahil bilang kapira lang kita iinanak, pira-pira lang kanta magkaalaman, hanggan kanta manga sirang sitay sa kalibutan ga aninu balaw magdugay.

¹⁰ Patingihi sida, ag itudlu nida sa kanmu kanda magkaalaman.

¹¹ “Balaw mabuhi ti ilamnun sa danuman nu unman may danum.

¹² Sa pagtiad di waya mamatay yi sida una balaw waya kay udas puldun.

¹³ Katida diman ti mangyari sa tanan tawu magpakarayu sa Diyus. Ti tawu balaw maka-diyus maduraan di pagsarig.

¹⁴ Kay manga pagsarigan matpuk ga balay wata lawa.

¹⁵ Nu pasalandigan niya, magkarapuklut, nu hiyaptan niya, magkaradura.

¹⁶ Nu bantayun ga mayad kay kahamtangan niya, parihu sa tanum abunda sa danum ag singgit init. Malangba inda sa buu gardin

¹⁷ ag maggamut mayad sa manga batu.

¹⁸ Dapat nu naayit yi inda, udyi pag pansinun.

¹⁹ Imaw inda ti katapusan niya buhi, ag may mantubu maan tanum sa kay nagtubuan pag daga.

²⁰ “Sa kay tutuu, balaw pagbugyahan Diyus ti tawu matadlung ag balaw niya pag-awatan ti daut pag tawu.

²¹ Pasariun maan niya kawu ag pahuyawun sa kabayaan.

²² Pakay-ahun niya kanmu manga daut pag kalaban ag rurisun kanda magtal-anakan.”