Hub 7 - Hanunuu

¹ “Ti buhi tawu atay sa kalibutan makuri gid, parihu kay kakuri sa sirang-sirang tarabahu usa ka manugtarabahu,

² ngatay ga usa ka panawuhun mag-alagad malambung hampay makapahari yi, ngatay parihu diman sa usa ka manugtarabahu mag-alagad kay kaupahan.

³ Katida diman kang kahamtangan. Pira yi ka bulan aku magkakuri unman diman waydi may kabuluhan. Una yabi magkakurian aku.

⁴ Nu magpahuway aku sa yabi, pag-isipun niku nu kapira pag rumas-ug ti surip. Malumuy ti lakaw panahun, aburidu aku tugka sa suminggit ti init.

⁵ Kang bilug pudu sapat ag kugan. Maglimutyug kang manga garis ag magnana.”

Nandarangin si Hub sa Diyus

⁶ “Maglawuy kang manga sirang sa unman may pagsarigan. Madali maglawuy subra waya kay kadali sa busali manughabul.

⁷ Diyus, alalahana duy nimu kang buhi ga arup lang, udyi duy niku magkalakawan ti kasulungan.

⁸ Mag-akitan waya nimu aku taynguna dapat aban udyi. Nu hanapun nimu aku udyi nimu aku makitan.

⁹ Nu kabitay ti rurum magkaparaw ag unman yi mag-akitan, katida diman waydi ti magkamatay, udyi mag-ibalik.

¹⁰ Balaw yi siya makauli sa kay balay, malimtan yi siya manga magkilala sa kanya.

¹¹ “Nakan ngani duy balaw aku mahimu unman mamagaw, mas-ut yi duy kang dubdub. Kailangan yi duy niku sabihun kang daut hinanakit.

¹² Diyus, hayga nimu aku pagtanudan? Usa aw lugud aku ka daka pag hayup malangas ginan sa dagat nakan kanmu pagtanudan?

¹³ Nu magkaibug aku manpahuway ag manpahari hampay bumalay-balay kang mag-asaydan sakit,

¹⁴ pag padalaun nimu aku sa panab-anan manga tagin-up.

¹⁵ Nakan ngani mas mayad waya man-ugut yi lang aku ag mamatay kaysa mabuhi sa inda pag bilug.

¹⁶ Pagdayiun niku kang buhi. Udyi niku gustu mabuhi waya. Pabay-ani yi nimu aku, dahil udyi may pulus kang buhi.

¹⁷ “Unu gid lugud ti tawu nakan kanmu pag-alalahanun ag pagpahalgaan?

¹⁸ Pag-usisaun nimu siya kada surip bag-u pagsubukun sa tanan pag udas.

¹⁹ Pabay-ani lang dapu aku una balaw kadugay.

²⁰ Nagsalan aw lugud aku? Unu duy pag kasalanan ti nabwat niku sa kanmu, Manugbantay sa tawu? Hayga aku ti pinili nimu pakurian? Nakapabuyat aw lugud aku sa kanmu?

²¹ Nu nagsalan gid aku sa kanmu, hayga balaw yi lang nimu aku patawadun? Udyi dumugay mighit yi aku. Una aku hanapun nimu, unman yi makitan.”