Hub 6 - Hanunuu

Nagbagaw si Hub

¹ Bag-u magkun si Hub,

² “Nu kiluhun lang ti inagwanta niku ag nalakawan pag kakurian,

³ mas mabuyat waya kaysa baras sa baybay dagat. Imaw kay dahilan nu hayga magbagaw aku unman niku inisip mayad.

⁴ Dahil ga pinana aku Makamaskihan pag Diyus ugyung makahilu, kay hilu nanlingatag sa buu niku bilug. Ti madala pag manga ugyung Diyus mapatuyangan sa kangku.

⁵ Unman aw lugud aku may karampatan manriklamu? Una ngani ti talun asnu hanggan baka, mag-inga nu unman may ilamnun.

⁶ Ti tawu may magkasabi nu unman may asin kay karan-unun, lalu yi nu malagti itlug ti pagkan-un.

⁷ Una aku unman diman may gana kumaun tida.

⁸ “Mana iayaw Diyus sa kangku kang paghagadun. Matanggap yi mana niku ti kang paghingabtun.

⁹ Kang gustu bul-a yi lang mana aku Diyus.

¹⁰ Nu inda matupad, masulung diman aku, dahil una sa kang kakurian balaw gid niku pagdayuun ti bagaw Banal pag Diyus.

¹¹ “Dapat magkagasa yi gid aku mag-alagad ag udyi waydi aku may sarigan waya. Hayga kailangan padugayun waya kang buhi, nu unman waydi aku may sarigan?

¹² Balaw aku ga batu kay ka ganit ag balaw buwat sa galang kang bilug.

¹³ Unman yi aku may kabisugan hampay iribri kang sadili. Ti tanan awat bin-ul yi sa kangku.

¹⁴ “Bilang manga kakilala niku gustu niku ibahan niyu aku sa inda pag kahamtangan niku, una sa kanyu magbantay pagdayuun niku ti Makamaskihan pag Diyus.

¹⁵ Dapat kamu ti manga pagkilalan-un niku suud pag patar-ari balaw maaw masarigan; parihu kamu ga sapa maglapwas ti danum nu kas-a magkak-at.

¹⁶ Nu tigraramig magkatunas ti yilu hanggan ti snow.

¹⁷ Dapat nu turungun magkak-at inda.

¹⁸ Nakan ngani nu maglakaw ti manga magbaklay, unman sida may danum irinmun. Nu ati yi sida sa tigangan daga magkamatay yi sida.

¹⁹ Inda pag manga magbaklay manugnigusyu taga Tima ag taga Shiba magsarig sida makainum sa sapa,

²⁰ pat-ay nibuyu sida. Magsarig sida may danum ati, dapat unman maaw.

²¹ Kamu parihu sa ati pag sapa. Unman diman kamu may miawat sa kangku. Nadala kamu pagka nakitan niyu kang kahamtangan.

²² Dapat hayga? Nanhagad aw aku pamakaun sa kanyu? Nanuyu aw lugud aku sa kanyu kuntay awati niyu aku ginan sa kanyu kasiyunan,

²³ aw ngatay iribri niyu aku sa kamang niku manga kalaban? Unman!

²⁴ Ti kang lang pag-isuyu sa kanyu, sabiha niyu sa kangku ti kang-ud pag sagut sa kahamtangan niku, ag balaw yi aku mangingay. Sabiha niyu sa kangku nu unu ti nabwat niku salan.

²⁵ Una waydi mabuyat kanyu sabihun sa kangku basta tida ti tutuu. Dapat ti pag ibangdan niyu sa kangku balaw tutuu, balaw niyu kaya patutuuhanan.

²⁶ Gustu niyu itadlung ti manga pagsabihun niku, dahil para sa kanyu kang pagbagawun ga unman may pag-asa pag tawu unman may pulus.

²⁷ Hayga, matadlung aw lugud kamu? Magkabwat ngani niyu ti usa ka ilu buwatun usa ka suruguun, aw ngatay ipabili ti usa ka kakilala!

²⁸ Bantayi niyu aku! Kanyu aw isip magpudil aku sa kanyu?

²⁹ Apasi yi kanyu magbangdan sa kangku, dahil unman aku may kasalanan.

³⁰ Kanyu isip magpudil aku, dapat alam niku nu unu ti tutuu ag ti salan.