Hub 5 - Hanunuu

¹ “Hub, una manhagad kawu awat, unman may mangawat sa kanmu. Una waya ti manga anghil unman gid mangawat sa kanmu.

² Ti pangagalit hanggan ti pangimun magmatay sa balaw may intindi pag tawu hanggan sa unman may kadunungan.

³ Angay sa kang nakitan ag naalaman, mahimu umabunda ti pangabuhi usa ka balaw may intindi, dapat kadaka lang saadan Diyus kay magtal-anakan.

⁴ Kay manga anak unman may mapakaranyan makaawat sa kanda, ag unman may mangapin sa kanda sa husgadu.

⁵ Kay ani hanggan ti manga burak niya manga tanum magtubu sa dugihan pag ilamnun, bul-un lang manga tawu magkalun-us. Kay kasiyunan agawun lang manga tawu maraibgun sa manga kasiyunan.

⁶ Ti kakurian ag kaguluhan balaw magtubu sa daga.

⁷ Nu kabitay ti alimpatu maglayang tag tungud, katida diman ti tawu, imaw ti magdara kakurian sa kay sadili.

⁸ “Nu aku ga kanmu, manpakarani aku sa Diyus. Sabihun niku sa kanya kang kahamtangan.

⁹ Dahil magbuwat siya manga makadululaw pag manga bagay hanggan manga lilingutan balaw masalman ag dayu mabilang.

¹⁰ Magpadara siya uran sa babaw daga ag pagpadanuman ti manga taranmanan.

¹¹ Pag-ipaabwat niya ti manga mapinakumbabaun ag pag-alagaan ti manga magpanrukuan.

¹² Pag-ibuyu niya ti manga maradaya, hampay balaw sida manalu.

¹³ Pagsudkun niya ti madunung sa kanda kayabangan, ag pag-amparahun ti gayak manga maradaya.

¹⁴ Balaw sida makakit una marayaw, ag man-garapgap sida ga sa yabi una sa karaw-an sirang.

¹⁵ Pag-iribri Diyus ti manga pugri ginan sa kamatayan hanggan sa manga tawu makapangyarihan mag-api sa kanda.

¹⁶ Nakan may pagsarigan ti manga pugri, dapat ti daut kay pagtamyawun.

¹⁷ “Mapalad ti tawu pag-itadlung Diyus kay ugali. Nakan danga nimu ikadaut ti tamyaw Makamaskihan pag Diyus sa kanmu.

¹⁸ Dahil kay manga pagbiyagan kay di maan pagbulungun.

¹⁹ Pirmi di niya kawu iribri sa manga sarut ag mahawag.

²⁰ Iribri di niya kawu sa kamatayan sa udas kalun-usan ag gira.

²¹ Alagaan di niya kawu nu puyaan iba, ag unman kawu may kadalaan nu rumas-ug ti kadamhakan.

²² Ti kalun-usan ag kadamhakan kanmu lang kasarin-an. Balaw kawu magkadala sa maisug pag hayup,

²³ dahil balaw kawu maunu. Ag balaw yi kawu makurian magtanum sa tanman nimu mabatu.

²⁴ Pihu gid makapangabuhi kawu may kahusayan hanggan kanmu magtal-anakan, ag unman may madura sa kanmu manga hayup.

²⁵ Yumamu kanmu sinulput ga ilamnun sa daga kay kayamu.

²⁶ Lumawig kanmu buhi, ag balaw kawu mamatay nu balaw waya kay kaudasan.

²⁷ Angay sa kanmi naalaman ag nalakawan, napatutuuhanan nimi inda tanan tutuu. Nakan patingihi nimu inda ag isabuhi para sa ikamayad nimu.”