Hub 41 - Hanunuu

¹ “Hub, mabanwit aw lugud nimu ti daragun Libyatan? Mahigtan aw lugud nimu lubid kay dungus?

² Matuhug aw lugud nimu lubid kay irung ngatay makaw-itan taga kay sulang?

³ Manpaawa-awa aw lugud siya pirmi sa kanmu kuntay palpasi nimu siya? Pumakihampang aw siya sa kanmu kuntay kaawai nimu siya?

⁴ Mamwat aw lugud siya kasunduan sa kanmu kuntay kanmu yi siya panawuhun sa buu buhi niya?

⁵ Mabwat aw lugud nimu siya alaga parihu sa manuk ngatay ipabuya sa kanmu manga anak babayi hampay kanda buybuyahan?

⁶ Mabili aw lugud siya manga manug-ahinti ag gurutun hampay ilaku?

⁷ Madultan aw lugud nimu bangkaw kay lukub ngatay kay ulu?

⁸ Nu mablay nimu siya, balaw gid nimu malimtan nu kabitay kakuri sa pagdakup sa kanya, ag balaw yi nimu inda ulitun buwatun.

⁹ Unman may pulus ti paghingabut makadakup sa kanya, dahil makitan di waya nimu siya, mabul-an yi kawu isug.

¹⁰ Nu unman ngani may magpanghas bumalag sa kanya, si unu waya nguna ti pumanghas sa paglaban sa kangku?

¹¹ Si unu ti makasabi kuntay may utang ililsan aku sa kanya? Ti tanan sitay sa kalibutan kangku.

¹² “Tultulan waya gid niku kawu tungkul sa ginhawa Libyatan ag nu kabitay siya makapangyarihan ag mabisug.

¹³ Si unu nguna ti makalunit sa kay paknul ngatay ti makapadlut siyun?

¹⁴ Si unu lugud ti makapanganga sa kanya? Dahil kay manga ngipun maradala!

¹⁵ Kay dayu may madamul pag manga siksik ga sa manga magturungbawan panangga.

^16-17 Uruniban inda una ti durus balaw makalapus, ag unman may makalunit tunda.

¹⁸ Nu maghangus siya may masinglaw, hanggan kay manga mata magsinay parihu sa magbutlak init.

¹⁹ Magbuga siya apuy,

²⁰ ag magluwang ti anus sa kay irung parihu sa anus magkulkulu anglit may maglabdaban pamagba.

²¹ Kay arup makapabaga sa uring, dahil apuy ti magluwang sa kay bibig.

²² Mabaskug kay liug, ag ti makakit sa kanya dalaun gid.

²³ Una kay nayi madamul ag maganit.

²⁴ Maganit kay tagipusuun parihu sa galingan batu.

²⁵ Nu magbangun siya, magkataranta sa kadalaan ti makapangyarihan pag manga tawu.

²⁶ Unman may baladaw, bangkaw, pamana ngatay ugyung ti makasakit sa kanya.

²⁷ Para sa kanya ti baul ga sa dayami lang kay kalug-ud, ag ti galang bilang sa gabuk lang kayu.

²⁸ Nu panaun siya balaw siya magpalagiw. Ti manga pag ibintuk sa kanya pag manga batu ga upa lang para sa kanya.

²⁹ Ti kayu pamakul ga dayami lang para sa kanya. Pagkasarin-an lang niya ti hagipyus bangkaw pag ibunu sa kanya.

³⁰ Kay tiyan may manga siksik matarum ga basag buti. Nakan nu magyapang siya sa malutuk, may liud kay naglakawan.

³¹ Magburuk sa bura ti dagat parihu sa magkulkulu danum sa anglit ngatay magkulkulu lana sa kardiru.

³² Ti danum kay malakawan magbura malagti, nu bantayun ga malagti pag buhuk.

³³ Unman may pumarihu sa kanya sitay sa kalibutan. Usa siya ka linalang unman magkadala.

³⁴ Pag-ipaababa niya ti tanan palabi-labihun pag manga hayup. Siya ti hari sa tanan maisug pag manga hayup.”