Hub 4 - Hanunuu

Nagbagaw si Ilipas

¹ Nagbagaw si Ilipas taga Timan, magkun,

² “Mangisug aw kawu nu bumagaw aku? Balaw mahimu aku unman mamagaw.

³ Kaybi, pagpaanyuan nimu ti mayamu tawu magsarig sa Diyus, ag pagparig-unun ti magpanlumuy.

⁴ Ti manga bagaw nimu nakapabisug sa manga naglubay sa kanda pagsarig.

⁵ Dapat kainda kawu yi ti mag-agwanta sa kakurian, bilang kawu ti maglumuy ag magkaaburidu.

⁶ Kabay nu maggalang kawu sa Diyus ag magkabuhi kawu matadlung, may imaw kawu pagsarig ag pag-asa?

⁷ “Kainda, isipun nimu kaayad. May tawu aw matadlung ag unman may kasalanan nidamhak?

⁸ Angay sa kang nakitan ag naalaman, ti tawu magbuwat daut ag kaguluhan, katida diman kay patabgan.

⁹ Usa lang ka uyup pangagalit Diyus, pihu midamhak sida. Sa kay pangagalit, maruris sida.

¹⁰ Una waya parihu sida sa mabisug ag maisug pag liyun, puilun diman Diyus kanda manga ngipun.

¹¹ Lun-usun sida ag kay manga anak magkarawayak.

¹² “May sinabi sa kangku sa lihim lang. Iyinanas inda sa kangku

¹³ sa panab-anan tagin-up habang magkaturug hamuuk ti manga tawu.

¹⁴ Nadala aku ag tinakigan kang buu bilug.

¹⁵ May naglawuy ispiritu sa kang atubangan ag tinmindug kang manga bulbul.

¹⁶ Pinmat-ung inda pat-ay balaw niku masyadu naaninawan. Ag may nadnugan aku maalumanay pag busis magkun,

¹⁷ ‘May tawu aw matadlung sa atubangan Diyus? May imaw aw tawu malumpiyu sa magbantay niya Manuglalang?

¹⁸ Nu balaw ngani masarig ti Diyus kay manga anghil imaw kay suruguun, ag maghiling siya kanda manga salan,

¹⁹ lalu yi ti manga tawu binuwat lang niya ginan sa daga, malpus lang pisiun ga alibangbang!

²⁰ Buhi sida sa surip, igu yabi tigbak yi. Unman yi sida makitan hanggan waya aban.

²¹ Ga manga turda sida nawayak. Namatay kurang sa kadunungan.’