Hub 39 - Hanunuu

¹ “Alam aw lugud nimu nu kapira pag manganak ti talun pag manga kambing? Nakakit aw lugud kawu sa mag-anak manga karasyaw?

² Pagbilangun aw lugud nimu ti manga bulan nida magbuduy tugka sa manganak sida? Ag alam aw lugud nimu nu kapira gid sida pag manganak?

³ Malukuban sida ag mag-agwanta tugka sa makaanak.

⁴ Pagdaka nida anak sa pangawakawaan, maglakaw inda ag balaw yi magbalik.

⁵ Si unu lugud ti nagpakaun kalayaan sa talun asnu?

⁶ Aku ti nag-ayaw kay ulian ati sa pangawakawaan; ipinauli niku siya sa daga napabay-anan yi.

⁷ Magpakarayu siya sa maingay pag banwa ag balaw siya magkaibug rignukun.

⁸ Magpalibut-libut siya sa kabantudan maghanap kay maharab.

⁹ “Maitarabahu aw nimu ti simarun baka? Mipatayak aw lugud siya sa kanmu tudiran nu yabi?

¹⁰ Mahigtan aw lugud nimu siya ag maiaradu sa kanmu tanman?

¹¹ Makasarig aw lugud kawu sa kay kabisugan hampay buwatun niya kanmu mabuyat pag buruwatun?

¹² Makasarig aw lugud kawu sa kanya kuntay tipunun niya ag akutun kanmu naani atag sa giriukan?

¹³ “Mabisug nu magkabkabaw ti pakpak manuk ustrits, dapat balaw makalayang inda parihu sa talabung.

¹⁴ Pagtayakan ustrits kay manga itlug sa daga hampay mainit-initan inda.

¹⁵ Unman siya magkataranta kuntay barang matat-an inda ngatay mapisi talun hayup.

¹⁶ Magpasipala siya sa kay manga butu, ga balaw kanya tunda. Una kay binudlayan nagbaliw ud may pulus, unman siya maghinayang.

¹⁷ Dahil balaw niku siya pinakan-an kadunungan hanggan intindi.

¹⁸ Dapat nu magpalagiw yi bay siya, pagkasarin-an lang niya ti kabayu hanggan ti masakyan siti.

¹⁹ “Hub, kawu aw lugud ti magpakaun kabisugan sa kabayu? Kawu aw lugud ti magpakaun kay sarugan sa kay liug?

²⁰ Kawu aw lugud ti magpaluksu sa kanya parihu sa apan ag magpadala sa manga tawu sa kay ham-us?

²¹ Magpangayig siya sa daga mabaskug magpayabang sa kay kabisugan. Bag-u pumalagiw siya atag sa girahan.

²² Unman siya may pagkadalaan, ag balaw siya magkadala sa baladaw.

²³ Maglilitikan ag magkilislapan ti manga armas nakasakay sa kanya.

²⁴ Masyadu ti anus galbuk sa mabisug niya pag palagiw. Balaw gid siya magkaampara nu tumunug ti budyung.

²⁵ Magham-us siya nu mag-asaydan niya ti tunug budyung. Magkahingaruk niya ti gira una arayu waya siya, ag mag-asaydan niya ti manga riringgitan sa girahan hanggan ti manga hudyat manga kumandir.

²⁶ “Kawu aw lugud ti nagtudlu sa buyaw kuntay paglayang ag pag-atag sa salatan sa rugar balaw maramig?

²⁷ Kawu aw lugud ti nagsugu sa agila kuntay paglayang hanggan sa pagbuwat niya pugad sa abwat pag rugar?

²⁸ Ati pagmag-uli ti agila sa madirig; sa arabwat pag manga batu imaw kay paratag-an.

²⁹ Ati ginan siya pag magbantay sa kay daragitun, ag mag-akitan niya inda una arayu siya.

³⁰ Kay manga pispis manlup dugu, ag nu naan ti may buyuk, ati diman waydi pagmagkatigsun ti manga uwak.”