Hub 38 - Hanunuu

Nagbagaw ti Panginuun

¹ Bag-u nagsagut ti Panginuun sa kan Hub ginan sa buhawi,

² “Si unu kawu pag magkatalinduwa sa kang kadunungan? Ti kanmu manga pagbagawun magpakilala lang kuntay unman kawu may alam.

³ Alistuhan kanmu sadili, sagta kang manga paingana.

⁴ Naan lugud kawu katpung binuwat niku ti patakitan kalibutan? Tultuli aku nu may alam kawu.

⁵ Alam aw lugud nimu nu si unu ti nagpasya sa kabuuhan inda pag patakitan ngatay ti nagsukat inda? Alam aw lugud nimu!

⁶ Unu lugud ti magsupurta sa patakitan kalibutan? Ag si unu ti nagpauli sa inda pag patakitan

⁷ habang mirinsan magkarantahan may kabayaan ti manga pamgasan sa magkasurip ag maghuruyawan sa kabayaan ti tanan manga anghil?

⁸ Si unu lugud ti nagpauli tab-anan sa dagat pagka binmulwak inda ginan sa basad?

⁹ Aku ti nagpauli madamul pag rurum ag dulum imaw ti pinagkataklub dagat.

¹⁰ Pinaulian niku tab-anan ti dagat; ga parihu lang sa tinalakpan niku inda ag pinaulian agad.

¹¹ Sinabihan niku ti dagat, ‘Sitay lang tugka kawu ag danga kawu maglampas; sitay lang tugka kanmu daraka pag manga humbak.’

¹² “Hub, nakasugu yi aw lugud kawu sa surip kuntay pagluwang yi hanggan sa magkasurip kuntay paghanag-hanag yi,

¹³ hampay ti singgit init rumayaw sa buu kalibutan ag umapas ti kadautan pagbuwatun sa madulum?

¹⁴ Dahil sa rayaw init, ti kalibutan malinaw mag-akitan parihu sa marka pananda ngatay sa lukun rutay.

¹⁵ Ti rayaw makaampara sa manga daut, dahil unman sida makabuwat dahas sa iba.

¹⁶ “Nakaati yi aw lugud kawu sa manga bulbugan sa basad dagat aw ngatay sa pinaka-abasad baliwa pag dagat?

¹⁷ Naipakakit yi aw lugud sa kanmu ti manga sabian atag sa madulum pag ulian manga namatay?

¹⁸ Alam aw lugud nimu nu kabitay kadaka ti kalibutan? Tultuli aku nu alam nimu inda tanan!

¹⁹ Alam aw lugud nimu nu naan ginan ti rayaw aw ngatay ti dulum?

²⁰ Ag maipabalik aw lugud nimu sida sa kanda gininanan?

²¹ Alam aw waydi nimu! Dahil nianak yi aw lugud kawu sa kabag-u di waya ag dugay yi aw kawu sa kalibutan!

²² “Nakaati yi aw lugud kawu sa ulian gininanan snow ngatay uran yilu?

²³ Inda pag manga yilu pag-ialistu niku sa udas kaguluhan hanggan sa udas girahan.

²⁴ Alam aw lugud nimu nu naan ti lakawan atag sa rugar pagginanan kilat aw ngatay sa rugar pagginanan durus ginan sa butlakan?

²⁵ Si unu nguna ti nagbuwat lakawan uran hanggan bagyu?

²⁶ Si unu lugud ti magpadara uran sa tigangan pag daga, sa rugar unman may mag-uli manga tawu?

²⁷ Si unu lugud ti magpadara uran sa pangawakawaan hampay manubu ti manga ilamnun?

²⁸ Si unu lugud ti gininanan uran, tun-ug,

²⁹ hanggan yilu ginan sa langit?

³⁰ Magyilu ti danum parihu kay kaganit sa batu, hanggan ti tungud baliwa dagat.

³¹ Mahigutan aw nimu ngatay malubad ti kadamlan manga pamgasan pag-ingarnan Pliyadis ag Uryun?

³² Magiyahan aw nimu ti manga pamgasan sa kanda pagluwang sa kanda kang-ud pag udas? Magiyahan diman aw nimu ti kadamlan manga pamgasan pag-ingarnan Daka ag Diit pag manga Usu?

³³ Magkaalaman aw nimu ti manga surundanun magpangyari sa kalangitan aw ngatay maipatupad nimu inda sa kalibutan?

³⁴ Masugu aw nimu ti manga rurum kuntay pauranan kawu ka daka?

³⁵ Makasugu aw kawu sa kilat kuntay pagkiram? Mapasunud aw nimu inda sa kanmu?

³⁶ Si unu ti nagpakaun kadunungan ag intindi sa tawu?

³⁷ Si unu pag madunung ti makabilang manga rurum? Si unu ti makauyang danum ginan sa langit

³⁸ nu mamara ag maganit yi ti daga?

³⁹ “Kawu aw ti maghanap karan-unun manga liyun ag magbusug sa kanda

⁴⁰ habang malukuban sida sa kanda manga paratag-an aw ngatay sa marikut?

⁴¹ Si unu ti magpakaun sa manga uwak nu magkalun-us sida ag nu kanda manga pispis maghagad karan-unun sa kangku?