Hub 37 - Hanunuu

¹ “Pagkulbaan kang dubdub dahil sa tunda pag bagyu.

² Patingihi niyu ti busis Diyus maghagunung ga linti.

³ Pagpakilatun niya sa kalangitan hanggan sa pinakaarayu pag bahagi kalibutan.

⁴ Bag-u masaydan ti hagunung sa kay mabisug pag busis. Balaw niya pag-amparahun ti maglinti niya busis.

⁵ Makadululaw gid ti maghagunung busis Diyus. Magbuwat siya makadululaw pag bagay unman nita magkasalman.

⁶ Pagsuguun niya ti snow pumadna sa daga ag ti uran umuran mabaskug,

⁷ hampay makapahari ti manga tawu sa kanda tarabahu ag makapag-isip-isip sa manga binwat Diyus.

⁸ Ti manga hayup magpatagu sa kanda parataguan ag mamirmihan sida ati sa udas may bagyu.

⁹ Ti bagyu ag ti maramig pag durus ginan sa kay ulian.

¹⁰ Sa panab-anan arup Diyus magkabuu ti yilu, ag ti malapad pag bahagi danum magbaliw yilu.

¹¹ Pagpun-un niya danum ti manga rurum, ag pagpakilatun inda.

¹² Magpalibut-libut ti manga rurum sa buu kalibutan angay sa sugu Diyus.

¹³ Magpadara ti Diyus kay mabisug pag uran sa pagpakaun danum sa daga, ngatay sa pagtadlung sa tawu, ngatay sa pagpakakit kay pagmahal.

¹⁴ “Patingihi inda, Hub, ag isip-isipa ti pagbuwatun Diyus pag manga makadululaw pag bagay.

¹⁵ Alam aw lugud nimu nu kabitay kay magsugu Diyus sa manga rurum ag nu kabitay niya pagpaduagun ti kilat?

¹⁶ Alam aw lugud nimu nu kabitay maglutaw ti manga rurum sa tungud? Buwat inda makadululaw pag Diyus kay kadunungan unman may katugkaan.

¹⁷ Kawu paghulasan dahil sa mainit pag durus ginan sa salatan,

¹⁸ makaawat aw lugud kawu sa Diyus sa pagladlad langit ag paganitun inda ga salamin pag galang?

¹⁹ Nu matinudukun kawu, tultuli kami nu unu ti kailangan nimi sabihun sa Diyus. Unman nimi alam nu kabitay nimi itultul kanmi katuwiran dahil nadluman kanmi naisipan.

²⁰ Balaw aku magsabi sa Diyus kuntay mandibati aku sa kanya, dahil barang ipadamhak niya aku.

²¹ Unman may tawu makasumpung sa init dahil magsinggit inda masilaw sa kalangitan nu payagun durus ti manga rurum.

²² Gin sa kanaway rumas-ug ti Diyus magsiak parihu sa gintu ag kay rayaw makadululaw.

²³ Balaw nita masalman ti Makamaskihan pag Diyus abwat sa tanan, ag unman kita makapakarani sa kanya. Matadlung gid siya ag unman mag-api,

²⁴ nakan paggalangun siya manga tawu. Unman niya pagpansinun ti manga tawu mag-sabi sa kanda sadili kuntay madunung.”