Hub 36 - Hanunuu

¹ Nagparargu waya gid si Ilihu sa pagbagaw:

² “Agwantahi waya aku ngalay, dahil may imaw waya aku sarabihun hampay baliwahan ti Diyus.

³ Mayamu aku magkaalaman ag patutuuhanan niku sa kanmu kuntay kang-ud ti Diyus, ti naglalang sa kangku.

⁴ Pagpihuun niku sa kanmu unman aku magpudil, dahil aku kanmu kaatubang madunung gid.

⁵ “Makamaskihan gid ti Diyus, dapat unman siya may pagpuyaan. Magkaalaman gid niya ti tanan pag manga bagay.

⁶ Unman niya pagpahintulutan mabuhi ti daut, ag pagpakan-an niya katadlungan ti pag-apihun pag manga pugri.

⁷ Unman niya pagpabay-anan ti manga matadlung. Pagkilalahun niya sida kaibahan manga hari hanggan waya aban.

⁸ Dapat nu pagpakurianan sida ga tinarikadahan,

⁹ pag-ipaburayhaw Diyus ti kasalanan binwat nida may kayabangan.

¹⁰ Pag-ipadnug niya sa kanda kay paandam, ag pagsuguun niya sida kuntay patlikudi kanda kadautan.

¹¹ Nu sumunud sida ag sumirbi sa kanya, mabuhi sida abunda ag masulung sa buu nida buhi.

¹² Dapat nu unman sida sumunud, mamatay sida sa gira kurang sa intindi.

¹³ Ti manga balaw maka-diyus maghamnu galit sa kanda tagipusuun, ag una pagparusahan sida Diyus, unman sida maghagad awat sa kanya.

¹⁴ Anak waya magkaramatay sida sa kakay-ahan.

¹⁵ Dapat sa panab-anan manga aragwantahun, pagtudluan Diyus ti manga tawu. Magdunung sida magpatingi sa kanya sa panab-anan manga kakurian.

¹⁶ “Pag-ipakarayu kawu Diyus sa mahawag ag pagpakan-an kaariwayahan ag kaabundahan. Ag punu masarap pag karan-unun kanmu lamisa.

¹⁷ Dapat kainda magkalakawan nimu ti parusa dapat mana sa manga daut lang. Unman gid kawu makaaman sa katadlungan.

¹⁸ Pagdahan kawu sa magarya sa kayamanan ag madara sa mayamu pag kuwarta bilang suhul.

¹⁹ Makaawat aw kanmu kayamanan ngatay kanmu kakayahan sa kanmu kakurian?

²⁰ Danga pag-alalahana ti yabi, ti udas mipadamhak ti manga nasyun.

²¹ Pag-aman kawu danga magbuwat kadautan. Pagpakurianan kawu hampay makaaman kawu sa pagbuwat tunda.

²² “Alalahana nimu nu kabitay kay pagkamakamaskihan ti Diyus. Unman may manugtudlu ti pumarihu sa kanya.

²³ Unman may tumudlu sa kanya nu unu kay buwatun, ag unman may makasabi sa kanya kuntay nagsalan siya.

²⁴ Danga pagkalimti ti pagdayaw sa kay manga binuwat parihu sa pagbuwatun manga iba sa kanda magkanta.

²⁵ Nakitan tanan manga tawu kay manga binuwat, dapat ginan lang sa arayu.

²⁶ Makamaskihan gid ti Diyus, ag balaw gid nita masalman kay pagkamakamaskihan ag balaw mabilang nu pira yi kay idad.

²⁷ Ti Diyus imaw ti magpadayik sa danum ginan sa daga ag pagbuwatun niya manga uran.

²⁸ Mag-ibuhus ti uran ginan sa manga rurum para sa manga tawu.

²⁹ Unman may makaalam nu kabitay magkawayak ti manga rurum, ag nu kabitay maglinti ti langit nu naan pag mag-uli ti Diyus.

³⁰ Bantayi nu kabitay niya pagpakilatun sa kay palibut, ag nu kabitay inda magrayaw tugka sa saruy dagat.

³¹ Sa panab-anan inda pag kamaskihan Diyus, pagpangunahan niya ti manga nasyun ag pagpakan-an abunda pag karan-unun ti manga tawu.

³² Paghiyaptan niya ti kilat ag pagsuguun inda pumatama sa kay gustu patamaan.

³³ Ti linti magpasandam sa pararas-ugun bagyu, una ti manga baka may kaalaman kuntay may bagyu pararas-ugun.