Hub 35 - Hanunuu

¹ Bag-u nagsabi waya gid si Ilihu,

² “Mag-isip aw kawu kuntay kang-ud kawu sa kanmu pagsabihun kuntay unman kawu may kasalanan sa atubangan Diyus?

³ Dapat magpaingana diman kawu, ‘Unu ti mab-ul niku nu unman aku bumuwat kasalanan?’

⁴ “Sagtun niku kawu ag kanmu manga kakilala.

⁵ Pagtangda kawu sa langit ag bantayi kaayad nu kabitay kaabwat ti manga rurum.

⁶ Nu nagsalan kawu, unman tida makamaliw sa Diyus, una parargu waya kanmu magbuwat daut.

⁷ Ag nu matadlung kawu, unu pag kaayadan ti mipakaun nimu sa Diyus?

⁸ Ti mamaliwan lang sa kanmu mayad ngatay daut pag binuwat imaw ti kanmu kaparihu.

⁹ “Ti manga pag-apihun maghagad awat hampay iribri sida sa kamang manga makapangyarihan pag manga tawu.

¹⁰ Dapat unman sida magpaawat sa Diyus, ti naglalang sa kanda ag magpakaun kabisugan sa udas kakurian.

¹¹ Unman sida magdangup sa Diyus ti naglalang sa kanda mas madunung kaysa manga hayup ag manga manuk.

¹² Ag nu mamaawat gid waydi sida, unman sida sagtun Diyus dahil manga palabi-labihun sida ag daut pag manga tawu.

¹³ Tutuu gid, unman pagpatingihan Makamaskihan pag Diyus kanda maghagad awat unman may pulus.

¹⁴ Hub, lalu yi gid balaw niya patingihan kanmu hagad-awat, nu sumabi kawu kuntay unman nimu mag-akitan kay awat niya sa kanmu dinara kasaba sa kanya ag ipinaalagad lang niya kawu sa unman.

¹⁵ Magkun waya kawu unman magparusa ti Diyus una galit yi siya, ag unman gid niya pagbatiun ti kadautan pagbuwatun manga tawu.

¹⁶ Hub, unman may pulus kanmu manga pagbagawun. Malinaw gid unman nimu magkaalaman nu unu kanmu manga pagbagawun.”