Hub 34 - Hanunuu

¹ Magkun waya si Ilihu,

² “Kamu ti magsabi manga madunung ag mayamu naalaman, patingihi niyu aku kaayad.

³ Dahil nu kabitay ti dila mag-alam nu unu ti masarap ag ti bukun masarap pag karan-unun, ti tuli alam diman nu unu ti kang-ud ngatay bukun kang-ud pag manga bagaw.

⁴ Nakan alamun nita nu unu ti hustu; adalan nita nu unu ti mayad.

⁵ Dahil magkun si Hub, ‘Unman aku may kasalanan dapat unman aku pinakan-an Diyus katadlungan.

⁶ Una matadlung aku, pagbaliwun aku pudilun. Una unman aku may nabwat salan, pinakan-an niya aku sakit unman may kaayadan.’

⁷ “Unman may tawu parihu sa kan Hub unman pagdultan puya.

⁸ Magkaibug siya magkuyug sa manga daut ag makasalanan pag manga tawu.

⁹ Dahil magkun siya, ‘Unman may mab-ul ti tawu nu maghingabut siya pakan-an kabayaan ti Diyus.’

¹⁰ Nakan pagpatingi kamu sa kangku, kamu ti magsabi nakaintindi kamu. Ti Makamaskihan pag Diyus unman magbuwat daut.

¹¹ Pagbalusan niya ti tawu angay sa kay binuwat; pagmayadun niya inda angay sa kay ugali.

¹² Pihu unman bumuwat daut ti Makamaskihan pag Diyus. Balaw niya mabuwat likuun ti katadlungan.

¹³ May nanugu aw sa kanya hampay pamahalaan ti kalibutan? Unman!

¹⁴ Nu nalub-anan Diyus bul-un ti buhi ipinakaun niya sa tawu,

¹⁵ magkaramatay ti tanan manga tawu ag bumalik sa daga.

¹⁶ “Nu may intindi kawu, Hub, patingihi inda kang sabihun:

¹⁷ Makadumara aw lugud ti Diyus nu balaw niya gustu ti katadlungan? Bati, hayga nimu pihuun ti matadlung ag makamaskihan pag Diyus?

¹⁸ Unman aw siya ti magsungyaw sa daut pag hari ag sa takinan unman may pulus?

¹⁹ Unman siya may pagpalabihun manga takinan, ag unman niya pagbaliwahan ti manga mayaman kaysa pugri, dahil sida tanan parihu niya linalang.

²⁰ Una ti makapangyarihan pag manga tawu kadaka mamatay sa yabi, unman may naggaraw sa kanda.

²¹ Pagbantayan gid Diyus ti tanan pagbuwatun tawu.

²² Unman gid may madlum pag rugar nu naan makapatagu ti manga daut.

²³ Balaw yi kailangan tawagun waya Diyus ti tawu kuntay pag-atag sa kay atubangan hampay paingan-un ag pihuun.

²⁴ Balaw yi kailangan waya paingan-un siya nu paighitun yi niya ti makapangyarihan pag manga tawu sa kanda katungkulan ag ilisan iba.

²⁵ Dahil alam niya kanda pagbuwatun, pagbul-an niya sida kapangyarihan ag pag-ipadamhak una sa yabi.

²⁶ Pagparusahan niya sida sa atubangan manga tawu dahil sa kanda kadautan.

²⁷ Pagbuwatun niya inda dahil nag-apas sida sa pagsunud sa kanya, ag unman nida pagsundun kay manga palakaw.

²⁸ Pag-apihun nida ti manga pugri, ag nasaydan Diyus kanda maghagad awat.

²⁹ Dapat una pumatagu ag ud mangingay ti Diyus, unman may makasabi balaw kuntay mayad kay pagbuwatun. Dapat kay tutuu, magbantay ti Diyus sa manga tawu ag sa manga nasyun,

³⁰ hampay amparahun niya ti pagdumara manga balaw maka-diyus pag manga tawu makadaut sa manga nasakupan.

³¹ “Hub, hayga dayu kawu magpakarani sa Diyus ag sumabi, ‘Nagsalan aku, dapat balaw yi aku mamuwat kasalanan waya’

³² aw ngatay ‘Tultulan sa kangku kang kasalanan. Nu nagsalan aku, balaw yi niku inda buwatun maan.’

³³ Kabitay dungugun Diyus kanmu darangin nu balaw kawu mag-ampu kam kasalanan? Sa kanmu ti disisyun, balaw sa kangku. Nakan tultuli aku nu unu ti masabi nimu.

³⁴ Ti manga tawu madunung ag may intindi, magpatingi sa kangku,

³⁵ makasabi diman kuntay kanmu pagbagawun, Hub, unman may intindi ag unman may pulus.

³⁶ Kailangan usisaun gid waydi kawu lubus dahil magbagaw kawu parihu sa daut pag tawu.

³⁷ Pagdugangan waya nimu kanmu kasalanan sa panab-anan paglaban sa Diyus. Pagkadat-an ag pagpuyaan nimu ti Diyus sa kanmi atubangan.”