Hub 33 - Hanunuu

¹ “Taynguna, Hub, patingihi kaayad ti tanan bagawun niku sa kanmu.

² Alistu yi gid aku bumagaw sa kanmu kang sarabihun.

³ Bumagaw aku ginan sa kang nalub-anan tagipusuun. Sabihun niku sa matadlung kang magkaalaman.

⁴ Ti ispiritu Makamaskihan pag Diyus imaw ti nagbuwat sa kangku ag ti nagpakaun buhi.

⁵ Saguta aku, nu kaya nimu. Alistuhan kanmu manga katuwiran ag atubanga aku.

⁶ Parihu lang kita sa atubangan Diyus. Hinistuda diman ga kanmu ginan sa daga.

⁷ Nakan danga kawu magkadala sa kangku aw ngatay mag-isip apihun niku kawu.

⁸ “Nasaydan gid niku ti manga binagaw nimu. Magkun kawu,

⁹ ‘Unman aku may kasalanan; malumpiyu aku ag unman may salan.

¹⁰ Dapat paghanapan Diyus dahilan hampay pakurianan aku. Pagbaliwun niya aku kay kalaban.

¹¹ Pagtarikadahan niya kang manga lulud; pagbantayan niya ti tanan niku pagbuwatun.’

¹² “Dapat Hub, salan gid kawu sa kanmu sinabi. Unman aw ti Diyus abwat man kaysa tawu?

¹³ Bati, hayga nimu pagsabihun kuntay unman niya pagsagtun ti dangup tawu?

¹⁴ Kay tutuu, magbagaw pirmi ti Diyus, dapat ay unman inda magkapansin tawu.

¹⁵ Magbagaw siya sa panab-anan tagin-up habang magkaturug hamuuk ti tawu nu yabi.

¹⁶ Magyanas siya sa kanda tuli agud magpaandam sa kanda, bag-u inda ti magpadala sa kanda.

¹⁷ Pagbuwatun niya inda hampay umapas ti tawu sa pagbuwat salan ag pagpadayaw-dayaw,

¹⁸ hampay miribri siya sa kamatayan.

¹⁹ Nu kas-a pagtadlungun Diyus ti tawu sa panab-anan sakit magpakuri sa kanya parihu sa ud may apas pag magsakit but-ul,

²⁰ magpadura sa kay gana sa magkaun una sa masarap pag karan-unun.

²¹ Magniwang siya, ag magpanarabaw ti manga but-ul.

²² Arani yi siya mamatay ag miatag sa ulian manga namatay.

²³ “Dapat nu may usa lang sa linibu manga anghil ti manab-anan sa kanya ag sa Diyus bag-u pumaalala sa kanya nu unu ti dapat niya buwatun,

²⁴ kaawaan siya Diyus. Sumabi ti Diyus, ‘Ribrihan siya sa kamatayan. Nakakit aku panlukat sa kanya.’

²⁵ Bag-u bumalik ti makurasug pag bilug. Bumaskug maan siya parihu ga kay kalay-awan waya siya.

²⁶ Nu mandarangin siya sa Diyus dungugun niya siya. Tanggapun siya Diyus may kabayaan, bag-u iuli Diyus sa kanya kay mayad pag kahamtangan.

²⁷ Bag-u sumabi siya sa manga tawu, ‘Nagsalan aku, ag nagbuwat balaw mayad, dapat unman niku natanggap ti parusa angay mana sa kangku.

²⁸ Irinibri niya aku sa kamatayan, ag parargu aku sa pagpangabuhi.’

²⁹ “Hu, pirmi inda pagbuwatun Diyus sa tawu.

³⁰ Pag-iribri niya ti tawu sa kamatayan hampay mabuhi siya.

³¹ Hub, patingihi aku kaayad. Danga mag-ingay kawu ag pabay-ani aku mamagaw.

³² Nu may mabagaw gid waydi kawu, pagbagaw kawu, dahil gustu niku maalaman nu tutuu unman kawu may salan.

³³ Dapat nu unman kawu may mabagaw, danga mag-ingay kawu ag pagpatingi sa kadunungan niku.”