Hub 32 - Hanunuu

Si Ilihu

¹ Sa kadugayan inmapas waydi sa pagsagut sa kan Hub ti tulu niya ka ampud, dahil nangungud gid si Hub kuntay balaw siya may kasalanan.

² Bag-u may usa ka tawu siyun kay ngaran si Ilihu. Anak siya ni Barakil taga Bus linahi magtal-anakan ni Ram. Nangisug gid siya sa kan Hub dahil unman sinisi ni Hub kay sadili nu unman ti Diyus.

³ Nangisug diman siya sa tulu ka ampud ni Hub dahil unman nida napatutuuhanan kuntay nagsalan si Hub bangkus ngap ga ti Diyus waya ti may kasalanan.

⁴ Inalagad dap ni Ilihu matapus sida tanan sa pagbagaw bag-u di siya namagaw sa kan Hub, dahil mas gurangun sida kaysa kanya.

⁵ Dapat pagka nakitan niya ti tulu unman yi may magkasabi, nangisug gid siya.

⁶ Nakan magkun siya, “Anak waya aku, kamu gurangun yi, nakan magkaduwa-duwa aku magbagaw. Unman aku nagpanghas mamagaw sa kanyu tungkul sa kang magkaalaman.

⁷ Kang isip kamu ti dapat manudlu, dahil manga gurangun yi kamu ag mayamu yi kanyu naalaman.

⁸ Dapat kay tutuu, ti ispiritu Makamaskihan pag Diyus imaw ti magpakaun kadunungan sa tawu.

⁹ Una nangus gurangun yi, ti tawu balaw makapihu kuntay siya madunung ag may kaalaman nu hintay ti mayad.

¹⁰ Nakan pagpatingi kamu sa kangku. Sabihun niku kang magkaalaman.

¹¹ Nag-alagad aku habang mag-isip kamu nu unu ti kanyu kailangan sabihun. Namatingi aku sa kanyu manga katuwiran.

¹² Pinatingihan gid niku kamu mayad, dapat unman gid may una di usa sa kanyu ti nakapatuduk kuntay nagsalan si Hub; unman gid kamu makasagut sa kay manga katuwiran.

¹³ Danga kamu magsabi, ‘Nasalman nimi mas madunung siya. Pabay-ani lang ti Diyus ti sumagut sa kanya ag balaw ti tawu.’

¹⁴ Nu sa kangku nagdibati si Hub, balaw niku siya sagtun parihu sa kanyu isinagut.

¹⁵ Taynguna napud-an kamu ag udyi may isagut.

¹⁶ Kailangan aw waya niku mangalagad, kainda napud-an yi kamu ag udyi may isagut?

¹⁷ May sabihun diman aku; itultul waydi niku kang magkaalaman.

¹⁸ Dahil mayamu aku sarabihun, ga udyi gid niku inda maampara.

¹⁹ Parihu aku sa bag-u pag paknul sukadan intus ubas ga magkabusni yi.

²⁰ Kailangan mamagaw gid aku hampay gumaan kang mag-asaydan.

²¹ Unman aku may baliwahan ngatay dayawun.

²² Balaw aku madunung maghangal-hangal sa harakutan. Nu buwatun niku inda, parusahan mana aku niku Manuglalang.”