Hub 31 - Hanunuu

¹ “Nagtaratu aku sa kang sadili balaw gid aku mansinuk may pangaibug isip sa manga daraga.

² Dahil unu ti balus iayaw Makamaskihan pag Diyus sa langit sa pagbuwatun tawu?

³ Unman aw kadamhakan ag mibuyu para sa manga magbuwat kadautan?

⁴ Magkaalaman gid Diyus ti tanan niku pagbuwatun.

⁵ Nu magpamudil aku ag magpandaya,

⁶ mana parusahan aku Diyus. Dahil siya ti nakaalam nu nagsalan aku.

⁷ Nu unman aku magsunud sa hustu pag dalan ag pagsundun niku ti alangan isip mag-akitan niku manga mata, ag inuringan niku kang sadili,

⁸ mana magkaradaut kang manga tanum aw ngatay kan-un manga iba.

⁹ Nu nagarya aku manga babayi ngatay naibug aku sa asawa niku kaparihu,

¹⁰ mana bul-un ngatay ulidun iba lalaki kang asawa.

¹¹ Dahil ti magpamabayi makakaray-a pag kasalanan, ag kailangan gid parusahan ti magbuwat katunda.

¹² Parihu inda sa mag-irub pag apuy dumura sa tanan niku kasiyunan.

¹³ “Nu ud pinahalgaan niku ti karampatan niku manga panawuhun katpung nagriklamu sida sa kangku,

¹⁴ unu ti mabuwat niku nu pihuun aku Diyus? Unu ti isagut niku nu paingan-un niya aku?

¹⁵ Balaw aw lugud ti Diyus ti nagbuwat sa kangku imaw diman ti nagbuwat sa kang manga panawuhun?

¹⁶ “Nu unman aku nangawat sa manga pugri hanggan sa manga buranday babayi magkakuri,

¹⁷ ag nu inirangan niku karan-unun ti manga ilu, mana parusahan aku Diyus.

¹⁸ Dapat ginan di waya sa kalay-awan aku pag asikasuhun yi niku ti manga ilu; sa buu niku buhi unman aku nagpabaya sa manga buranday pag babayi.

¹⁹ Nu may mag-akitan aku tawu mag-agwanta sa ramig dahil kurang siya sa rutay,

²⁰ pag-ayawan niku siya rutay panramig binuwat ginan sa bulbul niku manga karanidu. Buu tagipusuun siya magpasalamat sa kangku.

²¹ Nu sinaktan niku kamang ti ilu, dahil alam niku mabisug aku sa hurusayan,

²² mana maplud kang takyay.

²³ Balaw niku mabuwat inda pag manga bagay dahil magkadala aku sa parusa ag sa kamaskihan Diyus.

²⁴ “Unman aku magsarig sa kang kayamanan ngatay mag-isip makapakaun inda sa kangku kasiguraduhan.

²⁵ Unman aku magpadayaw sa kang mayamu pag kayamanan hanggan sa tanan pag kasiyunan magkaapu niku.

²⁶ Unman aku nansamba sa init magsinggit marayaw, ngatay sa bulan maglakaw may karinuan.

²⁷ Unman diman nagarya sa lihim kang tagipusuun sa pagsamba siti.

²⁸ Nu tutuu binuwat niku inda pag manga kasalanan kailangan aku parusahan, dahil nagpaulam aku sa Diyus ati sa langit.

²⁹ “Unman aku magkasulung katpung nipadamhak kang manga kalaban ngatay rinmas-ug sa kanda ti kakurian.

³⁰ Unman aku nagsalan sa panab-anan pagsaad sa kanda.

³¹ Unman gid may linun-us sa kang kasunu balay.

³² Unman niku pinabay-anan maturug ti manga day-uhan sa manga baklayan dahil pirmi bukas kang sabian para sa kanda.

³³ Balaw niku pag-ipaulam kang manga kasalanan parihu sa pagbuwatun iba.

³⁴ Balaw aku namat-ungan lang aw ngatay nagpatagu dahil sa magkadala nu hintay ti pagsabihun manga tawu.

³⁵ “Nu may mamatingi lang mana sa kangku! Taynguna, alistu aku pumirma sa pagpatutuu kuntay unman aku may kasalanan. Nu may pag ibangdan sa kangku ti Makamaskihan pag Diyus, pumakihampang aku sa kanya kuntay sabihun niya tunda sa kangku aw ngatay isurat lang niya.

³⁶ Dahil isab-it niku inda sa kang labay ngatay ipauli sa kang ulu ga sangbaw sa pagpakakit alistu aku sa pag-atubang tunda.

³⁷ Tultulan niku ti Diyus sa tanan niku binuwat. Umatubang aku sa kanya parihu sa takinan balaw magkay-a.

³⁸ “Nu pinangaghasan niku kang daga ngatay linamin niku inda sa iba,

³⁹ ngatay pinaalangan niku ti naisipan manga manugtarabahu sa kang daga dahil bin-ul niku ti manga naani unman sida binayadan,

⁴⁰ mana manubu sa kang daga ti manga dugihan ag manga ilamnun sa halip tirigu ag sibada.” Sitay pag nap-ut kay bagaw ni Hub.