Hub 30 - Hanunuu

¹ “Dapat taynguna, pagpuyaan aku manga tawu anak waya kaysa kangku, kanda manga ama balaw gid masarigan. Masarigan waya ngani kang manga idu magbantay sa kang manga karanidu.

² Unu gid lugud ti mab-ul niku siti pag manga tawu manga malumuy ag unman may kusug?

³ Masyadu sida maniwang dahil sa masyadu pag kakurian ag kalun-usan. Maghirut wadi sida manga makali sa pangawakawaan una yabi.

⁴ Pag-ayitun nida ag pagkan-un ti manga tanum sa pangawakawaan, una waya masaluy pag manga gamut kayu anyamu.

⁵ Pagtabugun sida paarayu sa kanda manga kasimanwa ag pagringgitan ga manga mananakaw.

⁶ Mag-uli wadi sida sa manga luung, sa manga gil-ang batu, ag sa manga ukang daga.

⁷ Ga manga hayup sida mag-uwang sa katalunan, ag magdurutdutan sida sa manga dariit puun kayu.

⁸ Unman sida may pulus ag unman may magkilala sa kanda, ag pinalayas sida gin sa kanda daga.

⁹ “Ag kainda pagpuyaan aku nida manga anak sa panab-anan pag kanta. Binaliw nida aku karasarin-an.

¹⁰ Pagkadat-an nida aku ag pag-amanan. Unman sida magkay-a magbuga sa kang uyahun.

¹¹ Taynguna pinalumuy ag pinakurian aku Diyus, pagbuwatun nida kanda pagkaibgan buwatun sa kangku.

¹² Magdugma sa kangku inda pag manga daut tawu. Magpauli sida suduk sa kang lakawan, ag paghingabtun gid nida aku ipadamhak.

¹³ Pagharangan nida kang lakawan hampay ipadamhak aku. Magpanalu sida una unman may mag-awat sa kanda.

¹⁴ Pagdugmaun nida aku parihu sa manga sundalu maglakaw sa daka pag ukang nagba alad batu.

¹⁵ Masyadu gid kang kadalaan, nadura kang ikadayaw ag kayamanan parihu sa rurum pinayag mabisug pag durus.

¹⁶ Ag kainda ga mamatay yi aku; unman may apas kang pag-agwanta.

¹⁷ Nu yabi magngutngut kang manga but-ul; ti durungugun kang mag-asaydan unman may apas.

¹⁸ Sa kabisugan Diyus, dinuksulan niya aku. Hiniyaptan niya aku sa liug lambung

¹⁹ bag-u iyinmut sa malutuk. Ga parihu lang aku sa galbuk ag dapug.

²⁰ “Magtawag aku sa kanmu, Diyus, dapat unman kawu magsagut. Tinmindug aku sa kanmu atubangan, dapat tinurun lang nimu aku.

²¹ Nagbaliw mahigpit kawu sa kangku. Ginamit nimu kanmu masyadu pag kamaskihan sa pagpakuri sa kangku.

²² Parihu lang ga pag-ipapayag nimu aku sa durus ag pag-ipabaliskad sa bagyu.

²³ Alam niku pagdaran-un nimu aku sa ulian manga namatay, sa ulian itinagka nimu atagan tanan manga tawu.

²⁴ “Unman gid aku may inaway tawu mag-agwanta ag magpaawa-awa dahil sa kakurian.

²⁵ Paglumian ngani niku ti manga tawu magkakurian. Magkaawa gid aku sa manga pugri.

²⁶ Dapat pagka magsarig aku buwatan kaayadan, daut ngap ti binuwat sa kangku. Maghanap aku marayaw, dapat madlum ti rinmas-ug sa kangku.

²⁷ Unman may apas magkasaktan kang tagipusuun. Sirang-sirang magras-ug ti aragwantahun niku.

²⁸ Nanmiru kang lukub balaw dahil sa init sirang nu unman sa kang panakitun. Tinmindug aku sa atubangan kalamalayan ag maghagad awat.

²⁹ Kang busis ga uwang simarun idu ngatay uni bukaw.

³⁰ Namiru kang lukub ag nagkarapagpag kay kugan. Masyadu gid kang pagtagyumun.

³¹ Namanglaw ti tunug niku alpa ag palawta.”